آشیق درویشین آغیرلاماسی....
آشیق درویش وهاب زاده نین وفاتینین 19-جو ایل دؤنومو ایله آغیرلاماسی اورمودا کئچیریلدی. بو مراسم ایکی بؤلومدن تشکیل تاپمیشدی.
ایکینجی بؤلومده ساعت 5 ایله 8 آراسی اورمونون صفی الدین اورموی سالونوندا درویش اوچون حاضرلانان سازلی-سؤزلو آخشام گلنلره سونولدو.
ناهاردان سونرا قورولان مراسمین بؤلوملری:
1- بیرینجی بؤلوم، رحمتلیک آشیق عزیز شهنازینین آشیق درویشین وفاتیندا یازدیغی شعرین اوخونماسی ایله باشلادی. شعر اوخوندوقدان سونرا اورمونون حوزه هنری اداره سینین موسیقی بؤلومونون سوروملوسو داریوش علیزاده، آپاریجی اولاراق گلنلره خوش گلدین دئدی. سونرا دوللو مصطفانین آشیقلارا یازدیغی بیر شعری اوخودو و اورمولو رسام ارسلانی جنابلارینداندا آشیق درویشدن بیر رسم چکدیگی اوچون و او رسیمی ایلک دفعه آغیرلامادا آچیلیشینین اولدوغونا گؤره تشکر ائتدی و بو رسیمی سئن اوسته یئرلشدیردیلر.
2- آشیق درویشین بیرینجی و ان بؤیوک شاگردی سئن اوسته دعوت ائدیلدی. آشیق اسمعلی لطفی(1316) اوستادینین سازی ایله بیر غربتی هاواسی اوخودو.
3- آشیق صبور شریفی(1334) اوستادینا یازدیغی بیر شعری اوخودو.
4- اشیق عبدالله اشرفی(1330) اوستادینا حاضرلادیغی بیر هاوا ایله اونو خاطرلادی و بیر خاطره سینیده گلنلره تقدیم ائتدی.
5- شاعر محمود شامی سئن اوسته دعوت اولاراق، آشیق درویشین وفاتیندا یازدیغی شعری گلنلره اوخودو.
6- آشیق درویش حاقدا بیر کلیپ یایینلاندی. 12 دقیقهلیک بو کلیپده، آشیق درویشین باجیسی اونون حاقدا دانیشمیشدی و خاطرهلریندن دئمیشدی. بو کلیپین آردیجادا آشیق درویشین اوخودوغو هاوالاریندان بیری یایینلادی. بو هاوا شرور هاواسی ایدی.
7- کلیپدن، سونرا سیرا آشیق عربعلی رحیمی یه(1344) چاتدی. آشیق درویشین شاگردی اولان آشیق عرب، اوستادینین سازی ایله و اونون شعری ایله اوروجلوق آیینا گؤره گؤزل بیر گرایلی هاواسینی ایفا ائتدی.
8- اصلیتی و سوی کؤکو قوشاچایدان اولان آما تهراندا یاشایان و آشیق ادبیاتینین چالیشانلاریندان اولان جواد دربندی بو مراسمه بیر مکتوب گؤندرمیشدی. بو مکتوبو شاعر اتابک تیموری اوخودو.
9- بو بؤلومده،گنج یازیچی، شاعر و آشیق ادبیاتینین آراشدیرماچیلاریندان اولان احمد اسدی(1367) سئن اوسته دعوت اولوناراق، آشیق درویشین دونیایا گلمه سی، یاشاییشی و آشیق صنعتینده بوراخدیغی ایزی حاقدا بیر مقاله اوخودو. آردیجادا آشیق درویشه یازدیغی شعرینی تقدیم ائتدی.
10- شاعر ایرج بهزادنیا(1318) آشیق درویشه ایکی قطعه شعر یازمیشدی، اونلاری اوخویاراق آلقیشینی آلدی. سونرادا خاطره سینی تعریف ائتدی.
11- آشیق درویشین ان کیچیک شاگردی اولان، آشیق ذکریا ملکی(1350) اوستادینین سئودیگی کسمه کرم هاواسینی اوستاجاسینا ایفا ائتدی. اوخومامیشدان اؤنجه خاطره سینی تعریف ائتدی و آشیغین کیم اولدوغو حاقدا دانیشدی.
12- شاعر، یازیچی و آراشدیرماچی بهرام اسدی، شعرینی اوخوماغا دعوت اولوندو و شعرینی گلنلره تقدیم ائتدی. سونرادا آشیق درویش و اونون نیه بو قدر سئویلدیگی حاقدا دانیشدی.
13- اورمولو گنج و استعدادلی یازیچی حسین واحدی( 1360) آشیق درویشه حاضرلادیغی قیسا بیر مقاله نی اؤزو گله بیلمه دیگی اوچون دوستونون (نعمت پور جنابلارینین) واسطه سی ایله بو مراسمده اوخوتدوردو.
14- آشیق درویش حاقدا بیر کلیپ یایینلاندی و آردیجادا آشیق درویشین ایفا ائتدیگی قارص هاواسی یایینلاندی.
15- آشیق درویشی ذهنلرده جانلاندیران و اونون کیمی چالیب-اوخویان سولدوزلو آشیق رضا پوینده(1344) گلنلرین ایستکی ایله بیر هاوا یئرینه ایکی هاوا اوخودو. آشیق رضا بیر واسطه ایله آشیق درویشین شاگردی حساب اولونور. اونون ساز اوستادی رحمتلیک علیرضا واحدی، آشیق درویشین شاگردی اولموشدور.
16- قوشاچایدان گلن آشیق هدایت موسی اوغلو(1336)، آشیق درویشین قوشاچایا گئدیشلریندن صحبت آچدی و اونون اورالاردا نه قدر حؤرمتی اولدوغونو دئیه رک، خاطره لرین تعریفله دی.
17- شاعر باباعلی جوانمرد(1332) آشیق درویشه یازدیغی ایکی قطعه شعری تقدیم ائتدی.
18- آشیق علی یئکانلی(1340) آشیق درویشدن بیر خاطره دئیه رک، اونون حاقدا یازدیغی ایکی شعری سالوندا اولانلارا اوخودو.
19- گنج شاعر علی رشتبر(1358) صحنه یه دعوت اولوناراق، آشیق درویشه شعرینی تقدیم ائتدی.
20- مراسمین سونونجو بؤلومونده، آشیق عبدالله اشرفی و آشیق ذکریا ملکی قاباق قارشی اوخویاراق، بو مراسمین سون بؤلومونو اجرا ائتدیلر.
خاطرلاتمالی ییق،بو مراسمی حاضرلاییب، قوروب ، دولاندیرانلار داریوش علیزاده و احمد اسدی ایدیلر. بو مراسم غربی آذربایجانین آشیقلار درنگی نین یاردیمی ایله قورولموشدور.
آشیق اسمعلی اوستادینین سازی ایله اونون سبکینده بیر غربتی هاواسی اوخویور، بو آندا آشیق درویشین قیزی, آتاسینی خاطرلایاراق گؤز یاشینا مالک اولا بیلمه ییر.
آشیق صبور اوستادینا یازدیغی شعری اوخویور
آشیق عبدالله چالدیغی و اوخودوغو هاوادا اوستادینی یاد ائدیر
شاعر محمود شامی آشیق درویش حاقدا شعرینی اوخویور
آشیق عرب اوستادی آشیق درویشین اوروجلوغا یازدیغی شعرینی گرایلی هاواسی ایله و ائله آشیق درویشین اؤز سازی ایله چالیب اوخویور...
ندنسه آشیق عرب اوخویاندا، مراسمه قاتیلان خانیم لارین بیری اؤزونو ساخلایا بیلمه یرک، آشیق عربین نیسگیللی اوخوماغینا گؤره آغلاماغا باشلاییر...
شاعر اتابک تیموری ،جواد دربندی جنابلارینین بو آغیرلامایا گؤندردیگی مکتوبو اوخویور
احمد اسدی آشیق درویشین یاشامینا گؤره بیر مقاله و آردیجا آشیق درویشه یازدیغی شعرینی اوخویور
آشیق ذکریا آشیق درویشین سئودیگی هاواسی اولان کسمه کرمینی چالیر...
شاعر ،یازیچی و آراشدیرماچی بهرام اسدی آشیق درویشه بیر شعر تقدیم ائدیر
آشیق رضا گؤزل سسی و درویشین قایداسی ایله درویشی خاطرلاردا جانلاندیریر
شاعر علی رشتبر آشیق درویشه یازدیغی شعرینی اوخویور
آشیق عبدالله و آشیق ذکریا قاباق قارشی اوخویورلار
آشیق درویشین سازی
آدیم احمد اسدی دیر. اورمودا یاشاییرام.