رحمتلیک آشیق علی علیزاده نین خاطرلا منی آدلی کتابی یایینلاندی.
رحمتليك آشيق علي عليزادهنين شعرلري او مرحومون وفاتينين بيرينجي ايل دؤنومو عرفهسينده بير مجموعهده يايينلاندي. 302 صحيفه دن تشكيل تاپان بو كتاب، خاطرلا مني آديني داشييير و او مرحوم آشيغين 300 قاطارا ياخين شعرينه شامل اولور. بو مجموعه اورمولو شاعر ، آراشديريجي،يازيچي و رحمتليك آشيق علي عليزادهنين ياخين يولداشي بهرام اسدينين زحمتلري ايله توپلانيب و چاپا بوراخيليبدير.
اورمونون ياز نشرياتينين نشرلريندن اولان بو كتاب، ساتيشي 8000 تومن دير و يازنشرياتي ايله اورمونون حوزه هنري ادارهسينين امكداشليغي ايله يايينلانيب.
قئيد ائتمهليييك، آشيق علي عليزاده 1330-جو ايلده قاراداغين ورزقان بخشينين قيه قيشلاق كندينده آنادان اولوب. سونرالار اورمويا كؤچوب و بو شهرده آشيقليقلا مشغول اولموشدور. آشيق علي عليزاده 10/5/1390 تاريخينده اورهك دايانماسي(ايست قلبي) نتيجهسينده دونياسيني دگيشدي. او مرحوم ايران موسيقي فئستيواللارينين چوخونا قاتيليب و چوخلو مقاملاردا اله گتيرميشدير. اورمو راديو و تلويزيونوندا موسيقي بؤلومونون فعال شخصلريندن ايدي. آللاه رحمت ائيلهسين. آذربايجان ادبياتي و فولكلورو سئوداليلاري كتابي الده ائتمك اوچون ياز نشرياتي ايله گنج آشيقلار بلوقونا گئده بيلرلر. ها بئله آشاغيدا اولان ايميل و موبايل ساييسي ايلهده ايلگي قورا بيلرلر.
ياز نشرياتي: http://yaznashr.blogfa.com
گنج آشيقلار: http://gencashiqlar.blogfa.com
ايميل: yaznashr@gmail.com
موبايل: 09141477792
ـــــــــــــــــــــــــــــــــــــــــــــــــــــــــــــــــــــــــــ
بو کتابین بیر بؤلومو دوستلار حسرتی آدینی داشیییر و او مرحوم اوستادین دوستلاری اونون اؤلوم خبرینی ائشیتدیکلرینده بو شعرلری یازیبلار.
بهرام اسدی
كؤچدو بير صنعتكار، گئتدي بير آشيق
نيسگيلي سازينين تئلينده قالدي
هر ماهنيسي اولان ائله ياراشيق
ان گؤزل ماهنيسي ديلينده قالدي
ائللرين ايچينده ماهنيسي بيتدي
آخرت دئيهرك سون سفر ائتدي
اللرين اوستونده مزارا گئتدي
ائلي گؤز ياشينين سئلينده قالدي
آي آشيق، تئز ايدي گئديش هوسي
قولاقلارا دولدو سازين نالهسي
ائشيتمز اولدوق او غيرتلي سسي
سسينين حسرتي ائلينده قالدي.
فريده سليماني((آیتکین)):
شاعرلر كؤچنده فاني دونيادان
فرقتينده قالان ائللر آغلايار
هنر باغچاسينين گولو سولاندا
باغبان كدرلنر، گوللر آغلايار
بولبوللر گولوندن آيري اوچاندا
نؤوراغي پوزولوب گولدن قاچاندا
صنعتكار هجراندان صحبت آچاندا
بولودلار قارالار سئللر آغلايار
سهو ائدير اجلدن شفقت اومان
آيدين حقيقته كيمدي گؤز يومان
آشيغيندان آيري دوشسه بير زامان
ساز سوسار »آيتكين« تئللر آغلايار.
احمد اسدي:
ائل آشيغي نه تئز گئتدين
سنسيز گؤزوم لئيسان آغلار
كؤچركن بيزي ترك ائتدين
كؤنلوم ائيلر فغان آغلار
ائلينله اوتوروب دوردون
بو ائلده مجلسلر قوردون
فراقيندا اودلار يوردون
دردلي آذربايجان آغلار
باش اگيرم بو انسانا
فخر ائديب آذربايجانا
فاني جسميم قالسين يانا
باخ بو روح-روان آغلار
آشيق بير ده ساز آلايدين
آليب قوينونا چالايدين
احمد دئيير كاش قالايدين
فراقيندا گؤز قان آغلار.
آشیق سيد اسماعيل سیدساجدي:
آلديم قيشلاقلينين اؤلوم خبرين
اورهگيم كؤورهلدي، گؤزلريم دولدو
سن بير بولبولايدين گولشن باغيندا
نه تئز خزان ووردو گوللرين سولدو
شادليقدا اوخوردون هر واخت ائللره
ساراني آپاران آخان سئللره
تميز اورهكلره، شيرين ديللره
آدين داستان اولدو ديللرده قالدي
من سيد آشيغام چكرم زحمت
هر واخت بؤيوكلره ائيلهيك حرمت
اوستادين روحونا سيز دئيين رحمت
هامي گئدهجكدي، بو بئله يولدو.
آشيق علي عابديني(علي يكانلي):
آللاه اؤلنلره رحمت ائيلهسين
علي ده رحمته قاريشدي گئتدي
اوستاد آشيق كيمين گيردي ميدانا
بير آز سؤزلريندن دانيشدي گئتدي
دوشدو سينهسينه دويونلو داغلار
وفالي سئوگيسي هر زامان آغلار
سارالدي باغچالار، بولبوللر، باغلار
بولبولون گولشني ساويشدي گئتدي
بير كيمسه اولمادي قانا درديني
بير ساعات اليندن آلا درديني
سالدي اورهگينه بالا درديني
يوخسوللوق اودوندا آليشدي گئتدي
بو سؤزلري دئدي يكانلي علي
امداد ائيله بيزه يا مولا علي
دئسهلر نئج اولدو قيشلاقلي علي
هنر ميدانيندا چاليشدي گئتدي.
آشيق خدمت حاجيزاده:
اوزون يانسين قارا تورپاق
نه تئز آلدين جاني مندن
اسيرگهدين يار-يولداشين
كسدين شهرت شاني مندن
گؤزلريمين نورون آلدين
قوللاريمين زورون آلدين
يامان يئرده تورا سالدين
آلدين امتحاني مندن
ديواردان آسيلدي سازين
آغلار قالدي اوغلون، قيزين
زهر اولدو دادين، دوزون
نيه كسدين ناني مندن
آشيق خدمت، آغلا پنهان
هاميا وار بو امتحان
چال بير تجنيس كسمه ديوان
چالما دول هجراني مندن.
بيتاللَّه سليمي آوانسر:
آشيق، سني ايتيرندن
گن دونياني بيتيرندن
قوهوم-قارداش آغلار قاليب
قبر ائوينه گؤتورندن
آذربايجان آشيغيايدين
ائل-اوبا ياراشيغيايدين
گور سسين وار ايدي سنين
الحق جانان آشيقايدين
سازيندا بير داد وار ايدي
سؤزونده مين آد وار ايدي
سن دونياني دگيشنده
ائلده هاراي-داد وار ايدي
آشيق داي آتا مينمهديك
يانيب كول اولوب سؤنمهديك
يايدا كؤچدون يايلاقلارا
داها قيشلاغا دؤنمهديك
بيتاللَّه سنه سؤز يازير
سؤز ايتيرير، هردن آزير
فلك زامان قازماسيايلن
گئجه-گوندوز مزار قازير
آشيق علي عليزاده
مولام سنه وئرسين باده
حق اؤزو محشر گونونده
سني هر آن سالسين ياده.
آدیم احمد اسدی دیر. اورمودا یاشاییرام.