قدر بیلن تولکو(ژاپون خالق افسانه سیندن چئویرمه)/ تورکجه یه چئویرن: احمد اسدی

 

گونلرین بیر گونونده اوزاق کندلرین بیرینده بیر قاری ایله قوجا یاشاییردیلار. قوجا کیشی اؤز باخچاسیندا ایشله­ییردی و مئشه­دن آغاج و قورو اودونلاری ییغیب ساتیردی.

بو قاری ایله قوجا اؤز ماحاللاریندا دوزلوک، مهربانلیق و صداقتلری­ایله مشهور اولموشدولار، اونلارین آزارلاری میلچگه بئله یئتمیردی. ماحال جماعاتی اونلاری سایقی ایله یاد ائدیردیلر و چوخ محترم ساییردیلار. قاری بیر آز آجی دیل و دیک دانیشیق ایدی، آمّا بیر چالیشقان و سلیقه­لی قادین ایدی و ائوی تمیزلیک و نظم اؤرنگی ساییلیردی.

بو ایکیسی عؤمورلرینین بوتونون سحردن گئجه­یه­دک  ایشله­میش و عذاب چکمیشدیلر، آمّا هئچ واخت اؤزلرینه ثروت و مال ییغا بیلمه­میشدیلر، ایندی ایسه قوجالمیشلار و گونده­لیک تاپدیقلارینی ائله او گون خرجله­ییردیلر و گله­جکلرینه بیر پول توپلایانمیردیلار.

قوجا کیشی هرگون بئلی آغیر یوک آلتیندا اگیلیردی، ائوه قاییدان زامان، آروادینا سؤیله­ییردی: هله­لیک بیزیم یاشاییشیمیز یولوندا گئدیر، من­ده کی هله ایشله­یه بیلیرم و مئشه­یه  گئدیب اودون توپلاییب ساتا بیلیرم. آمّا بیر گون ایشله­یه بیلمه­سم، بیزیم یاردیمیمیزا کیم گله­جک؟

قاری اونون سؤزلرینی تصدیق­له­ییردی و باشینی ترپدیب دئییردی: دوز دئییرسن. بیزیم آخیریمیز نئجه اولاجاق؟ بو کی یاشاییش دگیل. من بیر دقیقه ده اولسون بئله ایشسیز قالمیرام آمّا بیرجه سکّه­ده قوجالیغیمیزا و ایشدن دوشدوگوموز  زامانا قیراغا قویوب توپلایانمیریق!

قوجا کیشی هر دفعه بازارا گئدیب، اودونلارینی ساتاندا، هر ایکیسی آرزولاییردیلار بیر نئچه سکه آرتیق قالا، آمّا هر نه قدر چالیشیردیلار هئچ نه ییغانمیردیلار. بیر گون دوزلاری یوخ ایدی، بیرگون چاره سیزلیکدن ائولرینین کیرالارینی اؤدویوردولر، بو ایشلره گؤره­ده آردیجیل اولاراق بورج آلیردیلار و بو  بورجلاری اؤده­مک بیر نئچه واخت اوزانیردی.

گونلرین بیر گونونده قوجا اوره­گی سئوینج­له ، دوداغی گولوشله دولو بازاردان ائوه گلیردی. بو دفعه بختی آچیلمیشدی و فلک اونون اوزونه گولموشدو. آخی بورجلارینی وئرندن سونرا بیر نئچه سکه­ده دار گون اوچون الینده قالمیشدیر.

قوجا ائله او حالدا پیادا کنده ساری گئدرکن، اؤز اؤزونه پیچیلداییردی: (( یقین کی آرواد بو پوللاری گؤردوکده چوخ سئوینه­جک. بو پولو آلیب صاندیغا قویاجاق، سونوندا بیز­ده دار گونوموزه آزدا اولسا بیر پول آییرا بیلدیک.))

قوجا سئوینجک ائوینه دوغرو گئدیردی. کندین یاخینلیقلاریندا، قوروموش چایین داشلاری اوسته بیر دسته اوغلان اوشاغینی گؤردوکی ، آتلانیب دوشوردولر و های کوی سالمیشدیلار. بیر اورک آغریدان هایقیرتی­دا، اوشاقلارین سسلری سیراسیندا قوجانین قولاغینا توخوندو. کندین اوشاقلاری دئمه بیر تولکونو تله­یه سالمیشلار و یازیق حیوانی اینجیدیردیلر. بیری قویروغونو چکیردی، او بیریسی بیر ایتی شیشی بدنینه باتیریردی و داها بیریسی تولکونو گولوش قایناغی ائدرک دئییردی:

ای حوققاباز تولکو! یاخشی کی سنی توتموشوق. سن کی اؤزونو چوخ زیرک و عاغیللی بیلیرسن، سن کی ادعا ائدیرسن کلگین انسانلاردان داها چوخدور، نیه بیزیم الیمیزدن قاچا بیلمیرسن و اؤزونو قورتارا بیلمیرسن؟!

قوجانین تولکویه اورگی یاندی. تولکو اورک آغریدان و یالواریشلی گؤزلرله قوجایا باخدی.

 

آردینی ادامه مطلب ده اوخویون