GəncAşıqlar- گنج آشیقلار

قوجا اوشاقلارین اوستونه چیغیردی: اوتانمیرسیز؟ نیه بو دیلسیز و یازیق حیوانی اینجیدیرسیز. تئز بو تولکونو بوراخین!

آمّا اوشاقلار قوجایا گولدولر و دئدیلر: آی قوجا، نیه سنه دخلی اولمایان ایشه قاریشیرسان؟ بیز تولکونو توتموشوق و ایندی ایسه تولکو بیزیمدیر و هر نه ایسته­سک بونون باشینا گتیره بیلریک. سنین­ده چوخ اورگین بونا یانیر، گل بیزدن بونو آل. بیز حاضیریق بو تولکونو سنه ساتاق.

قوجا فکره جومدو. اورگی ایچیندن تولکویه یانیردی. آمّا تک باشینا ائده بیلمیردی اونو اوشاقلارین الیندن آلا. بیر طرفدن نئجه ائده بیلردی، جیبینده­کی پوللاری الدن وئره، دار گونلرینه و قوجالیقلارینا ساخلادیغی پوللاری.

آمّا تولکو ائله ناله­لر ائدیردی کی قوجانین اورگی پارام پارچا اولوردو، سونوندا اؤز تصمیمینی توتدو. پول کیسه­سینی چیخاردیب و اونون بوتون پوللارینی اوشاقلارا وئره­رک اؤز اؤزونه دئدی: (( من هله گوجوم وار، ایشله­یه بیلیرم، یئنیدن ایشله­ییب پول ییغا بیلرم.))

اوغلان اوشاقلاری پولو آلدیلار و قوجا اوچو سایمامیشدان، اونو تولکو ایله تک قویوب، قاچدیلار.

قوجا کیشی، تولکونو توردان چیخاردیب بوراخدی. آمّا یازیق حیوان او قدر جاندان دوشموشدو کی یئریندن بئله ترپننمه­دی. قوجا اونو قوجاغینا آلیب، مئشه­نین دیبینده، بیر اوزاق یئرده تولکونو یئره قویوب دئدی:

بالاجا تولکو، مئشه­ده قال و بیر داها بورادان ائشیگه چیخما و داها کنده ساری گئتمه! بوگونون اولایلاری سنه عبرت اولا! کند انسانلارین یئری و مئشه حیوانلارین یئری دیر.

تولکو گئدیب گؤزدن ایتمه­میشدن، تشکر و سایقی دولو گؤزلرله قوجانین اوزونه  باخدی.

قوجا الی بوش، کؤنلو خوش ائوه قاییتدی. قاری اوزون مدت اونا دونقوللانیردی و دئیینیردی کی نیه بو قدر ساده پوللاری الدن وئریبسن. آمّا زامانین کئچیشی  بو اولایی­دا یاددان چیخارتدی و قارینین تام یادیندان چیخدی.

بیر گون تولکو قوجانین ائوینین حیه­طینده تاپیلدی. آروادی قورخدو و او پوللار یادینا دوشدو کی الدن وئرمیشدیلر و دونقوللاناراق دئدی:

-او پول کی بیرینجی دفعه توپلایا بیلمیشدیک، بیر تولکو اوچون الدن وئردیک، بوندان علاوه من ده بیر قوجا کیشی نین گئجیکمه­سی اوچون بیر دونیا نگرانلیق چکدیم. بونلار بس دگیلدیرمی؟ هله بیر ده تولکو بگ بیزه قوناق گلیب! گئت، گئت یاراماز تولکو!

او آندا گئتدی بیر آغاج تاپسین و او آغاجلا تولکونو قووسون. تولکو آروادین باغیرتیلارینا قولاق وئرمه­دی و یئریندن بیر قاریش­دا اولا گئری چکیلمه­دی. قوجا ،آروادینین سسینه حیه­طه چیخدی کی گؤرسون نه اولوب.

تولکونون گؤزو قوجایا ساتاشدیقدا، اوزونو اونا چئویردی و دئدی: قوجا بابا, سن منیم ،یاشاییشیمی یوخلوقدان قورتاریبسان. من هئچ واخت بو یاخشیلیغی یاددان چیخاردان دگیلم و  بو ایشین قارشیلیغیندا، الیمدن گلن ایشی سنه ائتمک ایسته­ییرم. بیر مدت چکدی کی منیم یارالاریم ساغالا، بونا گؤره گئج گؤروشونه گلدیم. ایندی­ایسه منه دئ سنین حاقیندا نه ائده بیلرم؟

قوجا کیشی تولکویه دئدی: من چوخدا اؤنملی بیر ایش گؤرمه میشم، اودا قالا هله انتظاریم اولا سن منه بیر ایش گؤره سن، صحبتینی بئله سالما ! من تکجه بونو سندن ایسته یه بیلرم کی، اوغلان اوشاقلاری بیر داها سنی تورا سالمامیشدان، تئز بورادان چیخیب گئده سن، بورادان گئت و مئشه یه قاییت. بو دفعه توتولارسانسا، من داها سنه کؤمک ائده بیلمه یه جگم، چون بیر سکه ده بئله جیبیمده یوخدور. تئز، تئز بورادان گئت!

تولکو دئدی: سیزین آرزینیز یوخ دور، آما  من یووامدا چاره سیزلیکدن یاتدیغیم بو نئچه واختدا سیزه بیر فیکیر ائیله میشم، قویون سیزه ده تعریف ائدیم. بیر تاپیناق وار، بو یاخینلیقلاردا، اوردا یاشایان قوجا راهبینده، آشپازخانا وسایلی و سو قابلارینی ییغماغا چوخ علاقه سی وار. او بیر کهنه قازان، قدیمی چایدان و بو کیمی شئی لری تاپماق اوچون هر یئره گئدیر. من اؤزومو بیر گؤزل و دگرلی قدیمی چایدان شکلینه چیخاردارام، سیزده اونو گؤتوروب، او راهبین یانینا آپارارسینیز. امینم ، او چایدان قارشیلیغیندا سیزه او قدر پول وئرر کی، قوجالیق چاغلارینیزین غم کدرین یاددان چیخارداسینیز و دا قوجالیغا فکر ائتمه یه سینیز.

قوجا تولکونون سؤزلرینی رد ائدیب و قبول ائتمه دی، دئدی هئچ نه یه احتیاجیم یوخدور، ان یاخشی سیدا بودور قیسا بیر زاماندا مئشه یه قاییداسان. آما تولکو قویروغونو ییغاراق، باشینی آشاغیا سالدی. قوجانین اطرافینا اوچو دؤور فیرلاناندان سونرا، بیردن بیره گؤزلردن ایتدی و اونون یئرینه بیر گؤزل و قدیمی گوموش چایدان قوجا ایله قاری نین اؤنونده تاپیلدی، بو چایدانین لولوگو، بیر یاتمیش تولکونون آغزینا چوخ اوخشاییردی.

قوجا ایله قاری حیرتدن اؤز یئرلرینده قورودولار. قاری قوجادان تئز حواسینی توپارلاییب، چایدانی گؤتوروب و دووارا چیرپدی. چایدان دمیر سسی وئریردی.

قاری اؤز اؤزونه دئدی:  (( سانیرام راهب بو چایدانا بیزه یاخشی پول وئرر))، ائله او چاغداندا اؤزونو او پوللارین صاحبی تانیدی. قوجانی چایدانی ساتماغا آلقیشلاییب و ماراقلاندیرماغا چالیشدی. دئدی چوخ آرام و سویوق قانلیلیقلا چایدانی گؤتور و راهبین یانینا گئت. تولکو دوغرو دئییردی. سن پوللارینی اونا گؤره اوشاقلارا وئرمیشدین. اودا ایسته ییب بو ایشینین وریندن سنه بیر ایش گؤره. بو قدر دگرلی و باها چایدان بیزیم نه ییمیزه گرکدیر؟ بو چایدان بوندان باهادیر کی بیزیم ائوده قالا و پاسلانا. تولکو اؤز قولو اوسته دورار و بیر داها تولکو اولماز منجه.

آخیردا قوجا چایدانی گؤتوروب و بیر کاغاذ ایپگه بورودو. آما هله ده اوره گیندن گلمیردی اونو ساتا. دئدی: من بو ایشی خوشلامیرام. راهب مندن چایدانی هاردان گتیردین، سوروشدوغو تقدیرده، من نه جواب وئریم اونا؟ هامی بیلیر بیز بیر یوخسول عائله ییک.

یئنه قاری اونو تشویشدن و نگرانچیلیقدان چیخارداراق، دئدی: یالنیز دئ ایللر اؤنجه تاپمیشام و بو نئچه واختی دؤزموشم، صاحبی تاپیلا، آما ایندیه قدر اونون یئیه سی تاپیلماییب. ایندی ده یئیه سی تاپیلمادیغی اوچون، اونو ساتماق نیتینه دوشموشم، ایسته میرم بو دگرلی و باهالی چایدان بیزیم ائوده قالا.

قوجا کیشی آروادی ایله باش باشا قوشماق ایسته میردی، اونا گؤره ده راهب اوتوردوغو تاپیناقا گئتدی. اونون آلاچیغینا گیردی و چایدانی ایپکدن ائشیگه چیخارتدی.

راهب چایدانی گؤردوکده، سئوینجیندن چیغیردی و دئدی: بونا باخمایاراق، ایللر بویو نئچه جوره چایدان توپلامیشام  آما عؤمروم بویو بئله دگرلی و گؤزل چایدان گؤرمه میشم.  بو نوع هنرله دولو چایدان چتین تاپیلار. سیز بونو هاردان گتیریب سینیز؟

قوجا آروادی نین دئدیکلرین خاطرلادی و اونلاری دئمه گه باشلادی. راهبده دئدی: بونو ساتماق اوچون لاپ یاخشی ایش گؤروبسینیز و یئددی قیزیل سکه قوجایا وئردی.

قوجا اوره گی سئوینجله دولو ائوه دوغرو یولا دوشدو. او بو قدر پولو هئچ یئرده گؤرمه میشدی. او قالسین یانا، ایندیه دک قیزیل سکه بئله گؤرمه میشدی. اؤ اؤزونه دئدی: (( داها بیزیم قوجالیغیمیز اوچون چکدیگیمیز نگرانچیلیقلار آرادان گئتدی.))

راهب قوجا گئتدیگیندن سونرا شاگیردلرینی چاغیراراق، چایدانی اونلارا وئردی و دئدی آپارین بونو چای قیراغیندا، تمیزجه سینه یویون.

اوره گیم ایسته ییر، بیله م، بو چایدان دمله نن چایین نه دادی وار. یقین کی گؤزل اولار.

راهبین شاگیردلری چایدانی گؤتوروب چای قیراغینا گئتدیلر. اووج اووج قوم و تورپاق گؤتوروب، چایدانی سورتمگه باشلادیلار، ائله سورتدولر، اللرینین دریلری سویولدو و قیپ قیرمیزی اولدو، آما بو حین ده چایداندان بیر زاریلتی سسی ائشیتدیلر. چوخ تعجب لنیب ، چایدانی گؤزل پاریلداماغینا کیمی یاواش یاواش سورتمگه باشلادیلار. بو سری چایدان گولمگه باشلاییب و دئییردی: هه، هه،هه! قیدیقلاماغا باخ!

راهبین شاگیردلری قورخدولار، چایدانی تئز س ایله دولدوروب، راهبه دوغرو قاچدیلار و دئدیلر:

بو عجایب بیر چایداندیر. اونو قوم و تورپاق ایله سورتدوگوموزده بئله ساندیق ناله چکیر، او زاماندا ایسته دیک پاریلداماسینا گؤره یاواشجاسینا سورته ک ، گولدو.

راهب دئدی: ساکن اولون.تعجب یئری یوخدور. بو جور غیرعادی چایدان سورتودوگو آن، عجایب سسلرده وئرر البته. بو منیم عؤمرومده گؤدوگوم ان گؤل چایداندیر!

راهب شاگیردلرینه کؤموردن تونقال قورماغا امر وئردی، اود آلیشدیقدان سونرا، چایدانی اونون اوستونه قویدو.

سو هله قاینامامیشدی، چایدان اودون اوسته آددیلیب-دوشمگه باشلادی. اوجاق اوستونده اویاناییردی و هاوایا آتلاندی و غفیلدن بیر ناله چکیب، تولکو شکلینه چیخدی، جسمینده نه قدر گوج وار ایدی، توپلایاراق قاچماغا باشلادی.

راهب قوجانی چاغیراراق، اونو مجبور ائتدی پوللارینین هامیسینی قایتارا. قوجا اوندان عذر ایسته یرک، دئدی: یقین چایدانی جادو ائتمیشدیلر.

راهب دئدی: البته، دوز دئییرسن، ائله بوجوردو، آما منیم پوللاریم گئرچک پول ایدیلار، گرک منه قایتاراسان!

قوجا ائوه دؤندوگونو حین ده، اوره گینده تولکو ایله آروادینا یامان-یوووز دئییردی، میزیللاییردی کی آروادی نیه اونو بو ایشه مجبور ائله دی. بیر ایش کی  سونو آبیرسیزلیق و اوتانماق اولدو.

بیر نئچه گوندن سونرا تولکو یئنه ده تاپیلدی. یانمیش آیاقلاری توختامیش ایدی. قوجادان بو ایشین اولماسینا گؤره نئچه دفعه لر عذر ایسته ییب ، دئدی:

اود ائله آیاقلاریمی یاندیردی، داها ائده بیلمه دیم دایانام. اوندان قاباق، او زامان کی بدنیمی قوم و تورپاق ایله سورتوردولر، سانیردیم عؤمرومون سونونا یاخینلاشیرام. سونرا قیدیقلادیلار. یوخ، گؤزل فیکیر دگیل دیر. بیر آیری یول تاپمیشام، قاباقکیندان گؤزل و منطقلی.

ایندی ایسه من اؤزومو بیر گوجلو آت شکلینه چئویررم، سیزده منی آپاریب شهرده ساتارسینیز. شهرده یوکلرینی داشیماغا احتیاجی اولان وارلی-کارلی تاجرلر چوخدولار. سیز داها قوجالیغینیزین فیکرینی ائتمه یین، چون آتدا منیم کیمی بیر حیواندیر، کیمسه بو فیکره چاتماز اونو، قوم و تورپاق ایله سورته، سونرادا اود اوسته قویا.

تولکو، قوجانین اعتراضینا فرصت وئرمه دن، قویروغونو ییغیب، باشینی آلتا سالدی، ائله او آندا بیر گوجلو آتا دؤندو. باشینی غرورلا گؤیه قالدیردی. توکلری و دریسی قیزیل کیمی پاریلداییردی. آت صبیرسیزلیکله قیچینی یئره چیرپیردی و بئله نظره گلیردی، اونا مینمک اوچون بیریسینی آختاریردی.

قوجا کئچمیش خاطره لرینی یادا سالاراق، ایسته میردی، بیر داها تولکونون ایپی ایله قویو دیبینه گئده، آما یئنه قاری اصرار ائتدی و دئدی:  تولکونون سؤزونه قولاق وئر، آتی آپاریب بازاردا سات. بو آتی چوخ گؤزل بیر پولا سندن آلاجاقلار. آت بیزیم نه دردیمیزه دگر؟ بلکه ده ایسته ییرسن آت ایله مئشه یه گئده سن. آما بیز نئجه ائده بیلریک اونون قارنینی دویوراق؟ یوخ، لاپ یاخشی سی بودور، اونو ساتاق.

قوجا کیشی نه ائده بیلردی. آروادی اونو بیر لحظه ده اولسون، راحات بوراخماییردی. چاره سیزلیکدن، باشماقلارینی گئییب، آتینی اووسارلاییب، بازارا آپاردی. یول اوسته، میللت، باشلارینی آتا ساری دؤندریب، بو گؤزل لیکده آتی تحسین ائدیردیلر. بیری آتین یول گئتمگین تعریفله ییردی، بیر آیر سی رنگینی و بیر آیر سیدا پاریلدایان دری سینی.

هامی دئییردیلر: بو آتین یئیه سی ائده بیلر، اؤزونو خوشبخت سانا.

قوجا کیشی شهره  چاتاندان سونرا، آتچیلار بازارینی سوراقلادی، تزه اورا یئتیشمیشدی ، او شهرین ان وارلی تاجری اورایا گلدی، اونون آتینی گؤردوکده، بگندی و اونو کیمسه آلماسین دئیه، اون دؤرد قیزیل سکّه چیخاردیب، قوجایا وئردی، سونرادا دئدی:

-سن لاپ یاخشی واختدا گلیبسن. من صاباح آیری یئرلره یوک گؤندره­جگم، اونا گؤره ده بیر گوجلو آتا احتیاجیم وار ایدی، سن ده چوخ فیکیرلشمه، بو آتا مندن سونرا بو قدر پول وئرن تاپا بیلمه­سن.

قوجا کیشی قیزیل سکه لری آلیب، جیبینه قویاراق، ائوه دوغرو یولا دوشدو.

آما آتین باشینا نه گلدی؟

تاجر آتی آلدیقدان سونرا، نوکرلرینه دئدی، اونو تؤیله­یه آپارالار. اوردا آت ائده بیلردی تر تمیز و دوم دورو سو ایچه و نه قدر ده ایسته­ییر آرپا یئیه. سونرا دا بیر مهتر گلیب، اونون قشوولادی.

تولکو دئدی: بو دفعه نقشه­م لاپ یاخشی و اعلا چیخدی!

او گونون صاباحی وضعیت تام دگیشیلدی. آتلاری تؤیله­دن چیخارتدیلار و چای و دوزدان تشکیل تاپان یوکلری بئللرینه چاتدیلار.

تاجر ائوینین ایوانیندان چیغیردی: او تزه آلدیغیم آتی دا یوکله­یین، اونو ایشسیز قویمایین. او آت گوجلو بیر آتدیر و ائده بیلر او بیری آتلارین ایکی قاتی یوک  داشیا.

او بیری آتلارین ایکی قاتی! یازیق تولکونون بئلی او یوکون آلتیندا سیناردی. اصلینده او بیر کیچیک حیوان ایدی و ائده بیلمزدی، بیر آتین آغیر یوکونون داشیما عهده سیندن گله. آما تصمیم توتموشدو، هر یول ایله اولسون، قوجایا کؤمک ائده. بونا گؤره ده صبر ائدیردی و بئلی او آغیر یوکون آلتیندا سینمایا و دوام گتیره بیلسین دئیه، تمام هنر و جادوسونو ایشلتدی .

یوکلری آتا ووردوقدان سونرا، کروان یولا دوشدو. ایندی تولکو بیر آت شکلینه دوشموشدو و چتینلیکله ائده بیلیردی، آیاق اوسته دورا. توولانا توولانا یول گئدیردی، یئریدیگینده والای ووروردو. تزه شهردن ائشیگه چیخمیشدی، دای گوجو قالمادی و  یول گئدنمه­دی، سونرادا یئره سره لندی.

کروانچیلار دئدیلر: عجایب بیر آتدیر! گؤرونوشوندن گوجلو آتا اوخشاییر آما یوک داشیا بیلمیر. نه ائدک؟ بیز گرک گون اورتا چاغینا کیمی مقصده یئتیرک.

بیر بیرلری ایله مشورت ائتدیلر. آتیندا بیر ایکی دقیقه ایچینده اؤلمه سینیده نظر سالاراق، یوکونو گؤتوروب، او بیری آتلارا یوکله یه رک، اونو اؤز باشینا چؤلده بوراخدیلار.

تولکو بیر مدت اوزاناقلی، یورغون و جانسیز اوردا قالدی. کروان اوزاقلاشدیقدا و او دا گوجلندیکده، یاواش یاواش آیاغا دوروب، بیر تولکو کلینه دؤندو، مین مصیبت ایله، سورونه سورونه اؤزونو یوواسینا یئتیردی.

تولکو بیر مدتدن سونرا قوجا کیشی نین یانینا گلدی. قوجا و قاری اونو خوش اوز ایله قارشیلادیلار. او آتی بازاردا ساتدیغی زاماندان، اونلارین یاشاییشی راحاتجاسینا دوام ائدیردی. اونلار تولکودن سوروشدولار، آت شکلینده، نه باشینا گلدی. تولکو ده اولانلاری آنلاداراق، دئدی:

بؤیوک آتا، منیم جانیمی قورتاردیغینا گؤره، ایسته ییردیم، سیزه بیر کؤمک ائدیم، آما بو دفعه ده دایانا نمادیم. بیر کیچیک تولکو ائده بیلمزدی، آتین ایشینی گؤره، آما بونلارا باخمایاراق فیکر ائتمه یین منیم کیمی بیر کیچیک تولکو ائده بیلمز، اؤز قدرشناسلیغینی بیلدیره. قولاق آسین، سیزه دئییم، بو دفعه نه فیکر ائتمیشم.

تولکو سس سیز قالاراق، دانیشمادی. قویروغونو آیاقلارینا دولادی، باشینی آشاغیا سالدی، اوچ دؤور فیرلاندی، او دم قوجا کیشی ایله آرواد بیر گؤزل، اوزون قارا ساچلی گنج قیزی اؤنلرینده گؤردولر، قاباقلاریندا دایانیب. گنج قیز تعجبدن قوروموش قوجا ایله قاریا،گولومسه دی و سؤزلرینی بئله دوام ائتدیردی:

من سیزین نوه نیز اولاراق، سیزینله یاشایاجایام، بو آرادا چالیشاجاغام، سیزین قوجا واختینیزدا، سیزه یاردیم ائدم. بؤیوک آتا آتین ساتیشیندان اله گتیردیگینیز پوللاری گؤتورون گئدین شهرین بازاریندان، اوچ دست ایپک کیمینو آلین. بیری آغ، بیری یئلپیک شکیل لری ایله هولو رنگینده، اوچونجوده، ایچینده آغ داوودی گوللری اولان، بنؤوشه رنگینده  بی کیمینو.  بیرده ائنلی بیر پارچا آلین، بئله باغلاماق اوچون کمر ائدیم. سونرادا نئچه قوتودا بزنمه توزو آلین.

من کیمینولاری گئیه رم، اوزومه ده توزدان وورارام، سیز ده منی شهره آپاریب، اؤز نوه نیز دئیه تانیتدیرارسینیز. من شهرده اوخویوب، رقص ائدیب، سیزه چوخلو پوللار قازانارام.

قوجا کیشی تعجبدن، یئرینده قوروموشدو، بیر کلمه بئله دئیه­نمه­دی، آما آروادینین دیلی چوخ آخیجی و یاغلی اولموشدو. قوجانین قولوندان توتوب، قیراغا چکدی، سونرا دئدی: گئت شهره، هر نه دئییر آل گتیر. بو جور گؤزل و گنج قیز گرک، اونا یاراشان پالتارلار گئیه. آما آلمامیشدان قاباق بیر نفر ایله مشورت ائت، سن هئچ نه بیلمیرسن!

قوجانین اوره گی تیتر ه یرک، دئدی: عزیز تولکو، سن بوندان قاباق بیزه چوخ کؤمک ائدیبسن، ایندی ایسه یاخشیسی بودور قاییت گئت مئشه یه!

آما سونوندا تولکونون یالوارماغینین و آروادینین تحریکلرینه تسلیم اولاراق، اونلارین دئدیکلرینی ائله دی.

قیسا بیر زاماندا کندلی قوجانین اوخویان و رقاصه قیزی ، هر یئرده تانیندی و اؤزونه شهرت قازاندی. اوزاق یوللاردان اونون سسینی ائشیتمگه و اویناماغین گؤرمگه، گلیردیلر. وارلی و زنگین عائله لر، اؤزلرینه افتخار بیلیردیلر، بو قیز اونلارین تویلاریندا و قوناقلیقلاریندا گله و هنرینی گؤستره.

سونوندا تولکو ائده بیلدی، جانی خطره دوشمه­دن قوجایا خدمت ائتمگه بیر یول تاپا . شهرده اونا چوخ خوش کئچیردی. دایم ملت اونو دؤوره­له ییب و گؤزل سؤزلر دانیشیردیلار. شهر مئشه نین سس سیزلیگینه عکس اولاراق، سسلی بیر یئر ایدی و مئشه ایله فرقی وار ایدی.

بئله لیکله تولکو اوخویوردو و اویناییردی. هر سکه نی اله گتیردیکدن سونرا، قیراغا قویوردو. آما زامانین کئچیشی، اونو شهردن دویدوردو. شهرین سسی و قالماقالی اونو سارسیتدی، مئشه نین سکوتونو اؤزله دی. اونا گؤره ده یولداشلاریندان اجازه آلیب، نئچه گون اونلاری بوراخاراق کنده قاییتدی.

قوجا ایله قاری اونون هدیه لری ایله، یئمه لی یئمکلرینی گؤردوکده چوخ سئویندیلر. تولکو ییغدیغی پوللاری اونلارا وئردی و اونلارین قوجالیق نگرانچیلیقلارینی آرادان قالدیردی. اونلار چوخ یالواردیلار، تولکو یانلاریندا قالا، آما تولکو قبول ائتمه یه رک، دئدی:

چوخ چوخ تشکر ائدیرم بؤیوک آتا، منتدارام بؤیوک ننه! آما داها انسانلاردان دویموشام و تکجه بیر آرزیم وار. او دا مئشه نین سکوتونا و دینجلیگینه قاییتماق.

تولکو یوواسینا قاییتدی. هر واخت انسانلاری گؤرمک سئوداسینا دوشنده، قوجا ایله قارینین یانینا گلیردی. اونلارین باغچاسیندا اوتوروب، کئچمیشلری خاطرلاییردی. تولکونون اؤلوموندن سونرا – تولکونون عؤمرو انساندان آز اولدوغونا گؤره- قوجا ایله قاری اونا قدردانلیق اوچون بیر هئیکل تیکدیلر. بو هئیکل هله­ده وار  و تولکونون حق شناسلیغینین سیمگه­سیدیر.