نه زماندان آشیقلیغا علاقه تاپدینیز و بو ایشین دالیجا گلدینیز؟

منیم علاقه­م اوشاقلیق چاغلاریندا باشلاییب. بیزیم ائوده آتامین آشیقلارا چوخ علاقه سی وار ایدی. ائویمیز آشیق کاستلری ایله دولو ایدی. بیرگون من بون نوارلارین اوستوندن بیردنه اوخوماق اؤیره­نمیشدیم. ائوده اؤز-اؤزومه اوخویوردوم. آتام منیم اوخوماغیمی ائشیتدی. منی اوخوماغا آلقیشلادی. اوندان سونرا ائوه قوناق گلنده، قوناقلارا دئیه­ردی، مجید آشیق اولوب. باخین . اوندان سونرادا ائله 8-9 یاشیم وار ایدی ،آتام هر مجلسده منی اوخوداردی. آما ائودن مخالف ایدیلر. دئییردیلر، بو اوشاق درسیندن قالاجاق. بیر مدتده قویمادیلار منی اوخویام. 4 اوخوردوم، آتام بیر دنه منه ساز آلدی.74-جوایلده ایدی. آما ائوده بؤیوک آتام و ائویمیزین مخالفتینه گؤره، آتام سازی یولداشینین ائوینه قویموشدو. منیده گیزلیجه پنج شنبه-جمعه اورا آپاراردی . منده ائله اؤیره ندیگیم قدر ساز چالاردیم. بیر ایلدن سونرا او سازی ساتدیق. سونرا بیر آز بؤیودوم و تصمیم توتدوم اؤزومه ساز آلیب، رسمیتله آشیقلیغی دوام وئرم. 1379-جو ایلده بیردنه ساز آلدیم و باشلادیم چالماغا. حتی من عسگرلیکده ده سازی پادگانا آپارمیشدیم. تبریزده عسگر اولارکن، آشیق هاوالارینی پادگاندا اوخویاردیم. او بیری عسگرلر، سرهنگ اسدزاده آدلی بیر فرماندهیمیز وارایدی، اونا دئمیشدیلر، مجید آشیقدیر. اودا مندن سازی گتیریب، پادگاندا چالماغی ایسته دی. من صبحگاهلاری و مراسملرده ساز چالاردیم. حتی ساز چالماغیما گؤره تشویقی مرخصی لره ده گؤندردیلر. من سازی اؤیره­ندگیم واختلار ائله واخت اولاردی، 4-5 ساعت گؤروردون ساز چالمیشام. گئجه لری ساعت 4-ده قدر ساز چالاردیم. ائله گئجه لر وارایدی، گؤروردون ساز قوجاغیمدا یوخلامیشام. سحرلرده یوخودان دوراندا ، یئنه ساز چالاردیم، سونرا آیری ایشلریمه باخاردیم. ائله واختلار اولوردو، 3 گون ائودن ائشیگه چیخماییردیم.

سازی کیمدن اؤیره­ندینیز؟

من اوللر آشیق منافین یانینا گئدیب، اوندان اؤیره­نیردیم. سونرادا آشیق علی قره­ آغاجی و آشیق نباتعلی نین یانیندا اؤیره­ندیم. آشیق علی ایله آشیق نباتعلی منه چوخ کؤمکلیک ائتدیلر.

آشیق مجید، بیرینجی هاوا هانسینی اؤیره­ندی؟

من اول هاوا تکمیل صورتده، همدان گرایلیسینی اؤیره­ندیم. سونرادا دیوان، تجنیس، کوراوغلو دوبیتی­سی.

سئودیگینیز آشیق هاوالاری هانسی دیر؟

واللاه، هامیسی هاوالار خوشدور. دئیه بیلمه ریک بو هاوا خوشدور، بو پیس. گؤرورسن، ائله آشیق وار مثلاً بیر هاوانی سئویر و اونو او قدر تمرین ائله ییب. دا او هاوانین اوستادی دیر. ائله سی ده وار، آیری هاوانی سئویب تمرین ائله ییبدیر. هره نین بیر جوره تفکرو و ایسته­گی وار. آما منیم اؤزوم نارینجی، مسلمان کشووورسو،کسمه کرم، اورمیه امراهیسی و هجرانلاری او بیریلردن چوخ اوخویارام.

هانسی شاعرلرین شعرلرینی هاوالارینیزدا چوخ اوخویارسینیز؟

من رحمتلیک پورآذر، دده کاتب، بالوولو مسکین، دوللو مصطفی، او تایلی شاعرلردن مظاهر داشقین و بهمن وطن اوغلونون شعرلریندن چوخ اوخویارام. آما چوخ رحمتلیک دده کاتبین شعرلریندن اوخویارم. چون اوره­گیمه یاتیر.

آشیقلیغین ایندیکی دورومونداندا سؤز آچاق. ایندی بو صنعته علاقه آزالیب. سیزین کیمی آشیقلیغا گلن، دگرلی گنجلریمیزده چوخ آزدیر. غربی آذربایجانی توتساق، اورمو مکتبینده نئچه نفر بارماق حسابی اولار. سبب نه­دیر؟

باخین، آشیقلیغا دگر وئریلمه­دی. هم ملت طرفیندن، همده بو صنعت ایله باغلی قوروملار یعنی رادیو و تلویزیون و ارشاد اداره­سی طرفیندن. هله بیر مدتده قاداغا قویولدو. اوندان سونرادا تلویزیونا آشیقلاری قویمادیلار. دا یئنی نسلده، آشیقلیق ایله فاصله آچدی. آشیغین کیم و نه اولدوغونو دوشونه بیلمه دی. دئدی ائله بلکه آشیغا قولاق آسان قدیم و قوجا انسانلار اولار. ایندی­لیکده­ده بو ایشین حلینین چوخو تلویزیونون الینده­دیر. گونده یاریم و یا بیر ساعت آشیقلارا واخت آییرالار. اوستاد آشیقلاردا گئدیب، اورادا داستانلاردان اوخویالار، ملتین و گنجلرین علاقه­سیده چوخالار. یوخسا باخسانیز، ایندی دا آرادان گئدیر، آشیقلار نئچه قهوه­ده قالیبلار. اونلاردا گؤرورسن، بیری زئرزمیده دیر، بیری ایکینجی قاتدادیر. گؤز قاباغیندا دگیل لر. گؤز قاباغیندا اولمایان صنعتی هئچ کس تانیمایاجاق و آرادان گئده جک.

ایندی آشیقلارین چوخونون ان آز یاشلی­لاری گؤرورسن 45 یاشی وار. چوخودا 50-55 دن یوخاری یاشلاری وار. آللاه ائله مه سین نئچه ایلدن سونرا بونلار وفات ائتسه لر، دا بیزیم صنعتده آرادان گئده جک. چون بونلارا شاگردلیک ائدن یوخدور. وضعیت بئله گئتسه،صنعتیمیز آرادان گئده جک. بیر زمان اولار دئیه­رلر اورمیه هاوالاریدا وارایمیش. بئله آشیقلار وار ایمیش. من اؤزوم بو دورومدان چوخ ناراحاتام و الیمدن گلدیگی قدر دورومو دگیشدیرمگه چالیشیرام، آما من و یا نئچه نفر ایله ایش دوزه لمز. گرک ائلیمیز بو نتیجه یه یئتیشه کی، آشیقلیغی حفظ ائدیب قورویا.

بو دورومدا نه ائتمک گرک، الیمیزدن بیر ایش گلرمی؟

باخین، ایندی تبریز-قره داغ آشیقلارینین هاوالارینا, بو مکتبین هاوالاری او تایدادا چالینیر. بو اؤزو یئنی لیگه بؤیوک کؤمکدیر. چون اورادادا علمی صورتده بو هاوالاری ایشله ییرلر و نوتا کئچیرلر. بو هاوالار قالارگی اولاجاق. آما اورمو آشیق مکتبی یالنیز غربی آذربایجان اوستانیندا چالینیر. بو مکتب اوسته ایندیه­جن علمی صورتده ایشله نیلمه­ییب و نوتدا یازیلماییب. اگر بیز بو هاوالاری نوتا چکسه­ک، ان آزی هاوالاریمیزی ایندیکی کیمی گله جگه ساخلایا بیله­ریک. موسیقیچیلرده بو نوتلار اوستوندن هاوالاریمیزی گله­جکده چالارلار. هاوالاردا یاددان چیخماز. ایندی یالنیز گرک مکتبیمیزی علمی لشدیرک و گله جگه ساخلایاق.

یئنی لیکلرین تأثیری آشیقلیقدا اولا بیلرمی؟ یعنی بئله دئییم ایندی ائده بیلریک کئچمیش اوستادلاردان فرقلی اولاراق، یئنی گوللر هاوالارا آرتیراق و هاوالاری یئنی اصولدا چالاق؟

ائله مکتبیمیزین بیر نجات یولودا بودور. بیز گرک گوجوموز یئتدیگی قدر یئنی لیکلرین دالیندا دوراق. نه اولار، کئچمیش اوستادلار بیرجوره چالیبلار، اونلارین سازی و هنری قارشیسیندا همیشه باش اگیرم. آما گرک بو زمانه یه اویغون اولاراق، هاوالاردا بیر دگیشیکلر ائدیب، هاوالاری جذاب ائده ک. خالقین دقتینی بو مکتبه چکک. باخین تبریز آشیقلارینا 50 ایل بوندان اؤنجه نه چالیردیلار، ایندی نه چالیرلار. آشیق چنگیزه تای اوستادلار، اورانین هاوالارینا یئنی دن جان باغیشلادیلار.

اوستاد آشیق نئجه اولمالی­دیر؟

آشیق اؤزودور، سؤزودور، سازیدیر. بو اوچو گرک مکمل اولا. یعنی اؤزو یاخشی اوخویا، سؤزلرین یوخاری شعرلردن و دگرلی سؤزلردن سئچه و سازیدا اعلا حدده چالا. بونلاری دوز یئرینه یئتیرسه، اوستاد آشیقدیر. آما کامل اوستاد اولماغا منجه، آیری شرطده لازمدیر. ایندی باخین بیزیم اورمو مکتبی و تبریز-قره داغ مکتبی واریمیزدیر. کامل اوستاد اولماغا گرک تبریز و اورمیه مکتبی­نین هاوالارینی بیله سن و ایسته نیلن هاوانی چالاسان. یعنی هر ایکی مکتبه عائد اولان هاوالاردان باش قورتاراسان. بو منیم نظریمدیر. ایندیده من بیلدیگیمه گؤره بئله آشیق یوخدور.

سالماس آشیقلاریندان، نئچه سنین آدلارینی بویورون؟

قول هارطون وارایمیش. دقیق بیلمه ییرم آما یوز اللی ،ایکی یوز ایل بوندان قاباق یاشامیش اولا بیلر. آشیق میرزاعلی، آشیق زینال، آشیق محمود، آشیق مناف، آشیق محبوب، آشیق علی بایرامی، آشیق نادر لکستانی، آشیق جبرائیل شکریازیلی.

سون سؤز اولاراق، یئنی نسله و جوانلارا ، اؤز یاشیدلارینیزا نه دئیه بیلرسینیز؟

نئجه کی، مثلاً فلان تاریخی اثر وار. نئچه یوز ایل بوندان قاباقدان بیزه میراث قالیب و هامی او اثره دقت یئتیریر و قوروماغا چالیشیر. بو آشیقلیقدا ائله اونا تایدیر. صنعتیمیز نئچه مین ایللرین سیناغیندان کئچیب بوگونه چاتمیشدیر. بیزه ارث یئتیشن، بیر دگرلی وارلیق کیمی باخمالی ییق و اونو قورومالی ییق.

بو دانیشیغا حوصله قویوب، سواللاریمیزا جواب وئرمه گینیزه گؤره تشکر ائدیرم. چوخ ساغ اولون.

سیزده ساغ اولون.