سیزین سازا و سؤزه هوسینیز، نه زاماندان باشلاییب؟اوستادینیز کیم اولوب؟

من ائله اوشاقلیق ایللریندن، سازا علاقه یئتیرمیشم. منیم 12 یاشیمدان سازیم وار. ائله او ایللردنده ساز چالا بیلردیم. 15-16 یاشیمداندا تویلارا ساز چالماق اوچون گئدیردیم. منیم ساز اوستادیم غیرمستقیم اولاراق، آشیق اسلان اولوب.

سازبندلیکدن دئیین، بو ایشی هاچاندان باشلاییبسینیز، اؤیره نمگه؟ اوستادینیز کیم اولوب؟

من 15-16 یاشیمدان ساز قاییرمانی اؤیره ندیم. سازبندلیگیده آشیق تقی خویلو وار، اوندان اؤیره نمیشم. ایندی ده سازبندلیک ائدیرم.

بورادا اولان وسیله لرینیزی هاردان آلیرسینیز؟

بو وسایلین چوخونو اؤزوموز دوزلتمیشیک. بازاردا بونلارین چوخو یوخدور.

بیر سازی باشا یئتیرمگه نئچه گون واخت لازم دیر؟

سازین تخته لری حاضر اولورسا، بیر سازی بیرگون بیر دانا قورتارارام. البته اگر بو آرادا تمام واختیمی قویام و سحردن آخشاما قدر ایشله یم. آما یوخ بیر آز دوزلدم، بیر آز استراحت ائدم و یا آیری ایشلره باخام. نئچه گون چکر بیر سازی دوزه لتمک.

سازلاردا قوللاندیغینیز آغاجلار جنسی نه دیر؟ هارادان گتیریرسینیز؟

قوپوز تخته سینین، چاناغی توتدان، قولو جویزدن و قولاقلاری آرموددان اولار. آما ایگده دنده دوزلدنلر اولوب. من اؤزوم اقاقیا، اریک و آغجا قایین(افرادان) قوپوز حاضرلامیشام. آغاجلاردا گرك، دئم آغاجي اولا.

قوپوزون تخته لرینی نه جور حاضرلاییرسینیز؟

بو تخته لری، چؤلدن گتیردیکدن سونرا، 4 خال اندازه سینده کسیریک. سونرا شیره سی چیخماق اوچون، سودا قاینادیریق، سونرادا قورودوروق و قالبه سالاراق، ساز اوچون حاضرلاییریق. سازدا دوققوز قابیرقا اولار. آرتیریلدیقجادا سازین چاناغی یومورو اولور، اودا سازی گؤزل گؤستریر.

مختلف نوع آغاجلاردان سازلار حاضرلاییبسینیز، بونلاردا آغاجلارین دگیشیمی، سازلارین سسینده تأثیری اولوبمو؟

بلی، اولوب. او آغاجلار کی، تخته لری برک اولور، سسلری زیل چیخیر. آما او آغاجلاری کی تخته لری پوک اولار، سسلری بم اولار. قالیب او آشیغین سسینه کی، بم اولا و یا زیل اولا. منیم اؤزوم افرادان بیر ساز حاضرلامیشدیم، سسی زیل اولموشدو. چالماق دردینه دگردی. اوخوماغا ایش وئرمزدی، چون چوخ زیل ایدی.

قوپوزلارین قولو و چاناغینا بیر استاندارد اندازه وارمی؟

قوپوزدا، چاناق خشتگه قدر، نه اندازه ده اولسا، قوپوزون قولودا او اندازه اولمالیدیر. آما چوخ واختلار سازلاری 23 سانتی متر دوزه لتدریک. چاناغیندا 23 ائنی و 23 سانتی متر درینلیگی اولار.

سازلارینیزین مشتریلری کیملر اولوب؟

اورمیه دن،ماکی­دان، خوی دان، تبریزدن و قوشاچایدان منیم مشتریلریم اولوب. بیرده سازدی دا، الدن اله دولانیر. من دوزه لتدیگیم سازلار گؤرورسن، هئچ اؤزوم بیلمه دیگیم یئرلره چیخیر، گئدیر.

بیر آزدا صدفلی سازلاردان دانیشاق، بو صدفلری هارادان گتیریرسینیز؟

صدف وورما ایشی ایله، سازبندلیک آیری دیر. سازبندلریمیز وار، صدف ایشینه باخمازلار. آما صدف دوزنلریده وار. من اؤزوم صدف دوزرم. صدفلریمیز، بندرعباس، بوشهر طرفلریندن گلیر


هانسی عملیاتلار ایله صدفلر دوزولور و نئچه گونه بیر سازین صدفله مه سی باشا چاتیر؟ هارالاردان ساز صدفله مک اوچون سیزه مراجعت ائدیرلر؟

بو صدفلری بیز مختلف شکیللرده دوغراییریق، و خیردا- خیردا اندازه لره چیخارداراق، سورتوب و صافالدیریق. سونرا سازین اوستونو قازاراق، بو صدفلری اورا یئرلشدیریریک. بیر سازین صدفله مه سی، تمیز ایش گؤره سن، آزی اون بئش گون چکر. منه ائله اؤنجه خاطرلاتدیغیم، شهرلردن مشتریلریم اولوب. حتی بیر دفعه دانمارکدان بیر سازی صدفله مه سفارشی وار ایدی، کی اونو صدفله دیک و دانمارکا گؤندردیک.

صدف دوزمه نئچه یه باشا گلر؟

معمولی بیر صدف دوزمه، ان آزی 300 مین تومنه باخار. قالیب ایشینه، بیری ساده طرح ایسته ییر، بیری گؤزل و اینجه طرح یوزه یوز بونلاریندا قیمتلرده فرقی اولاجاق.

سفارش آلدیغینیز قوپوزلارین قیمتی آلیجی یا نئچه یه باشا گلیر؟

سازلارین زحمتینه و دقتینه گؤره قیمتلری دگیشیر. بیر ساز وار، سسی چوخ گؤزلدیر، بیری ده سسی متوسط دیر. بونلارین قیمتلرینده فرقلری اولمالیدیر. ایندی 150-200 میندن توت گئت 500-600 مینه قدر ساز سفارش وئرنلر اولور. بیرده سازی آشیق ارزشه میندیرر، ائله سازلار وار، کی مثلاً بیر متوسط سازجا سسی وار، آما او آشیغین آدینا گؤره، قیمتی یوخاری اولور. اگر آلان اولسا، 4-5 میلیونا قیمتی چیخار.

کئچمیشلرده بو نایلون پرده لرین یئرینه چیگیت باغلاردیلار، ایندی-ایندی بعضی لر دئییر، قاییداق چیگیت پرده سی(باغیرساقدان حاضرلانان پرده) باغلایاق، اوندا سس گؤزللشر. بو سؤزه نه دئیه بیلرسینیز؟

چیگیت پرده، ایندی ییغیشیب. اؤزوده گرک ییغیشاردی، چون بیر مجلسده و یا تویدا گؤروردون آشیغین الی ترله ییب و پرده لر اویان- بویان اولوردو و سازین سسی دوز چیخماییردی. بیرده باخین علم قاباغا گئدیب، سازدا ائله اونا تای. کئچمیشده بو نایلون پرده لری باخیبلار، گؤروبلر، سسی گؤزل چیخیر. اؤزوده دا چیگیدین دردسرلری یوخدور، اونا گؤره ده سئچیبلر. دا گئریه قاییتماق اولماز، گرک بو سازی قاباغا آپاراق و آیری فکرلر ائده رک، یئنی اصولدا دوزه لدک تا سسی بونداندا گؤزل اولا. هله لاپ قدیملرده دئییرلر، سیملریده چیگیتدن دوزلدیرمیشلر. آدام او زمانا فکرلشنده دئییر، بونلار نه جور چالیرمیشلار، چون چیگیت کؤکه گلمز. ائله گونلرینی سوورموشلار. آما بیر سؤزوده دئییم، بلکه یوز ایلدن سونرا بیزه دئیه جکلر، اونلار نه جور چالیرمیشلار، گونلرینی سوورموشلار.

سئودیگینیز آشیق هاوالاری هانسی لاریدیر؟

من خوی امراهیسینی، چوخ سئوره م، چون منی آشیق ائدن بو هاوا ایدی. چوخ یئرلرده ده چالیشارام، بو هاوانی اوخویام. پناهی، اورمودا گولشانی(خوی دا قیزلار گؤزللمه سی دئیه رلر)، تاجری، گرایلی لار، ترکمه لر. هامیسی خوشدور، آما پناهی، خوی امراهیسی، گولشانی بونلاری چوخ سئوه رم.

آشیق داستانلاریمیزا گؤره دئیه جگینیز سؤز وارمی؟

آشیق داستانلاری حقیقتدن قایناییب، جوشور. دوزدور هامیسی دوز دگیل، آما چوخ حقیقتدن باشلاییر، سونرا افسانه لر ایله قووشور و روایتلر یارانیر.

بیلدیگیمیز کیمی، سیزین شعرلرینیزده وار، ایکیسینی اوخویون لطفاً؟

بیر دنه جناس-دیوان دئییم:

بولبول اولوب خسته کؤنلوم اوینور گول بوداغینان

دوز یولدا آیاق گئتمه ین، گئدیر چؤل بوداغینان

سون چاغیندا مجنون اولوب آختاریر لیلی یارین

کرم تک اودا آلیشیب، اولور کول بوداغینان

***

دئدیم کؤنول چاتا بیلمز گئدن یارا یار داها

یالواریرام بو دردیمه ائده چارا یار داها

آل خنجری باغریم باشین ائیله یارا یار داها

بلکه دردین دئیه بیلسین ائیله دیل بوداغینان

***

سن دوشوبسن عشق اودونا دلی کؤنول یان یانا

آغاریبدیر، باشین توکون، قاش کیرپیگین یان یانا

گؤرورسن کی، یار-یولداشین دوزولوبدور یان یانا

اؤلدورر ای اورین سنی، آخیر بیل بوداغینان

بیر دنه ده قوشما اوخویوم:

یابانچی کولتورو غالب اولوبدور

تئللی سازا گولنه باخ گولنه

افلاطون سؤیله ییر هرکس اؤزونو

سن آللاهین بیله نه باخ بیله نه

***

قورخوم یوخ سؤزومو ائده رم آشکار

قیامت گونونده یانسین باعث کار

بو عادت دیر بیز ملتده پئشه کار

گؤر کفن سیز اؤلنه باخ اؤلنه

***

بایقوش طعنه وورور، باغدا بولبوله

دولوب غم کدری گولشاندا گوله

دئدیم ائللر گلین وئرک ال اله

حسرت گؤزوم گلنه باخ گلنه

***

قوتور کئچی سو آختاریر گؤزه دن

قاچیر ساغا-سولا ایچمیر کوزه دن

داش باغلامیش باغریم باشین تزه دن

غم غبارین سیلنه باخ سیلنه

***

غم کدر آخیدیر گؤزومون یاشین

باغلیام بو ائله آتانمام داشین

ای اَورین سون زامان باغرینین باشین

نئشتر ووروب دلنه باخ دلنه

اورینده منیم تخلصومدیر، سازلاریمین اوستونه ده اورین آدینی یازارم. بو آدی آشیق قوربان منه دئییب سئچه م. اورین خویدا بیر داغ آدی دیر.

نه زاماندان شعر یازیرسینیز؟

من 1372-جی ایلدن شعر یازیرام.

قدیم سازبندلردن نئچه سینین آدینی چکین، لطفاً؟

تبریزده سازبند محمود وحمید ، اورمودا ایشو ایله داداش وارایمیش .خویدا علعسگر ایله فرج وار ایمیش.

غربی آذربایجاندا سیزدن باشقا آیری سازبندلرده وارمی؟

بلی وار.ایندی 4 نفریک. خویدا آشیق تقی ایله غلام سازبند، قوشاچایدا آشیق بهروز، اورمودا ایسه منم. بیر نفرده اورمودا سازبند واریمیز ایدی. آما کئچن ایللرده سکته ائدیب و دا سازبندلیک ائده بیلمه ییر. آدی اوستا یعقوبدور.

بیر سازبند آشیق اولاراق، بو صنعته گؤره نه دئیه بیلرسینیز؟

آشیقلیق سومر دؤورونه گئدیر، چاتیر. تاریخی قدیمدیر. سونرالاردا گلیب، اسلامیت ایله قاریشیر. قدیملر اوزان دئیه رمیشلر. کئچمیشده نه تلویزیون وارایدی، نه سینما نه تئاتر، نه کامپیوتر. هر نه ائله بو آشیق ایدی. تهیه کننده، کارگردان، بازیگر، یازیچی ، موسیقیچی تکجه بو آشیق ایدی. هرنه آشیغین بوینوندا ایدی. اودا داستانلار ایله، جماعاتی مشغول ائیله ییرمیش. آشیق داستانلاری اؤزو بؤیوک بیر نمایشنامه دیر. آما بو نمایشنامه نین، هر نه یی آشیقدیر.

قوپوزا گؤره سؤز-صحبتینیز وارسا، بویورون؟

بو ساز بیزیم وارلیغیمیزدیر. بو سازی قوروماق بو یورددا یاشایان هر بیر انسانین بورجودور. گرک بو قوپوزا بیزلر صاحب دوراق. قویمایاق، نئچه مین ایللردن گلیب، چاتمیش قوپوز بو عصرده آرادان گئده. ائلیمیزی اؤز فرهنگیمیزه صاحب چیخماغا چاغیریرام.

دگرلی واختینیزی بیزیم اختیاریمیزا قویدوغونوزا گؤره تشکر ائدیرم. چوخ ساغ اولون.

سیزده ساغ اولون

.