قوشاچاي شهرينده بايرام دبلري/ سؤيلهين: قمر خداوئرديوند
قوشاچاي شهرينده بايرام دبلري/ سؤيلهين: قمر خداوئرديوند
توپلايان: احمد اسدي
چرشنبهلر
يالانچي چرشنبه: ائولري تميزلمگه باشلارديلار و هیسینی آلارديلار.
قويروقلو و يا خبرچي چرشنبه: بو چرشنبه ده چوغان ايله، پالتارلاري يووراديلار و هیس آلما دوام تاپاردي.
كوله چرشنبه : بو چرشنبه ده توكلرين اوجلارين وورارديلار. گؤيلرين باشين ووراديلار.
آخير چرشنبه :
چرشنبه خونچاسيندا بونلار اولارميش، بوغدا، كشمش، مكه، قووورقا، حالوا، سمني، ايگده، گيردكان، الوان شيرنيلر. سامان، سوغان و نار قابيغي ايله يومورتالاري بويارديلار. بايرام آييندا، اؤزلليكلهده چرشنبه لري يومورتا چاققيشديرارديلار و يومورتاسي سينان اودوزاردي.
نشانلي اوغلانلارا عرقچين و جوراب توخويارديلار. گلينلرهايسه، قیرمیزي پارچا آپارارديلار. بير مجمعهيه كشمش، بادام، گردكان، ايگده و ... قويوب و اوستونه قیرمیز پارچا چكيب، قيز ائوينه پاي آپارارديلار. باجالاردان شال ساللارديلار، بگ ساللايان شالي قيز ائوي تانييب، همن جوراب و عرقچيني اوغلانا پاي وئررديلر. بعضي اوغلانلاردا شوخلوق اوچون دئيهرديلر، قيزيدا باغلا. شال ساللايانلارادا، پاييني باغلاياندان سونرا دئيهرديلر: چك، آللاه مطلبيني وئرسين.
قاپي داليندا قولاق آسما دبي و سو سپمه دبي
چرشنبه آخشامي بير ليوان سو الده، گئدرديلر قاپي دالينا و قولاق قويارديلار. ائودهكيلرده گرك خوش سؤزلر دانيشارديلار. مثلا دئيهرديلر: آي قيز او حناني گتير، اليميزه قوياق.- او شيرنيلردن گتير آغزيمي شيرينلهدك. – بير چاي قويون، آغزيميز شيرين اولسون. قولاق آساندا سئوينيب دئيهردي، آغزينيز شيرين اولسون، گلن گونلري خوش و آيدينليقلا اولسون. سونرا اللريندهكي سويو قاپيا و يا باجايا سپيب گئدرديلر و دئيهريدلر ، كئچن گونلريميز كئچدي گئتدي، آللاه گلن گونلريميزي آيدين و خوش ائلهين. ائولرده گول ايله آينا قويارديلار.
بو گونده اود اوستوندن آتيلاراق، بئله دئيهرديلر: آتيل، ماتيل چرشنبه / گون كيمي بختيم آچيل چرشنبه و دئيهرديلر: آللاه گلن گونلريميزي خير ائلهسين، بختيميزي آچسين. آغزي شيرينليگه چيخاق و آيدينليق اولسون.
اودو داملار اوستونده يانديرارديلار و دامين دؤرد بوجاغينا داش قويارديلار، سونرادا دامين دورهسينه جيزيق چكرديلر . بو جيزيغي حاصار بيلرديلر و بو سؤزلري اوخويارديلار:
حاصار حاصار
كيليديم آغام اميرالمومنين آچار
چرشنبه گونونده سو گتيرمه دبلري
بو گونده كوزه ده سو گتيررديلر. او گتيريلن كوزه گرك يئره قويولمايايدي. او كوزهني بايرام گونو چاتينتجايا قدر بير بوشقابين ايچينه قويارديلار. قديملر ايلده بير يول دويو بيشيررديلر. همن او كوزه و يا تونگولهدهكي سويو، بايرام پيلووونون اوستونه ، بيرده ائوين دؤرد بوجاغينا تؤكرديلر و دئيهرديلر: گلن گونلريميز آيدين اولسون.
سو قيراغينا گئديليردي و شيرني آپارارديلار. كوزه يه تپه جك تيكرديلر و كوزه نين باشينا قويارديلار. گئده-گئده بو سؤزلر اوخوناردي:
بوردان بير يول وار دول ديزهسينه
اوردان سو دولدورور يار كوزهسينه
سونرا گیردکان قابيغيندا بير شمع يانديريب و نيت ائديب سويا اؤتوررديلر. گؤي آپارارديلار فال توتارديلار. جويز قابيغي سو اوزونده قالسايدي، نيتلر قبول اولاردي. اؤزلري ايله شيريني و يا قند آپارارديلار و ديشله ييب سويا آتاراق بئله دئيهرديلر: بيز سنين آغزيني شيرين ائلهديك، سنده گلن ايل بو زاماناجن بيزيم آغزيميزي شيرين ائله.قيز-گلينلر سورمه آپارارديلار سو قيراغينا گؤزلرينه چكرديلر و بير قيچي ايله، كيرپيكلرينين و ساچلارينين اوجونو قيرتارارق، آتارديلار سويا و بئله دئيهرديلر: آللاه قرامتيمي، قارا گونلريمي آپارسين، گلن ايلده گونلريميز خوش اولسون. ياخشي سؤزلره نيت ائدرديلر.
چرشنبه گونونون افسانهسي
دئيهرديلر: آخير چرشنبه گئجهسي، گئجهنين بير واختيندا آخار سولار دورار. او زاماندا بير شخص پاكدامن و مومن اولوردورسا و گئجهني او سويون قيراغيندا ياتيرديرسا، او سو دورماني گؤروب و او آن هر آرزو ائتسهايدي قبول اولارميش. ائله بونا گؤرهده بير گون بير قاري، گئديب سو قيراغيندا ياتير و گئجهنين ياريسي سويون آخارليغي دايانير. بو وضعيتي گؤرن قارينين ديلي باغلانير و دئيير اوغلوم قيزيل. او گئجه قورتولور، گلير ائوه باخير گؤرور اوغلو قيزيلا دؤنوبدور. بو قارينيندا تكجه بو اوغلو وارايميش و چؤرك گتيرنيده او اوغلان ايدي. گونلر كئچير بو قاري پولسوزلوقدان بو قيزيل اوغلانين بير بارماغيني قوپاردير و بازاردا ساتير. بو وضعيتدن ناراحت اولان قاري گلن ايلين چرشنبهسيني گؤزلهيير و چرشنبه گونونده بير داها سو قيراغينا گئديب و سويون دورماسيني گؤزلهيير. يئنه همان ايش تكرار اولور. بو دفعه قاري آللاها سسلهنهرك دئيير: اي آللاه اوغلوم آدام اولسون، سماواريم قيزيل. سونرا گلير ائوينه، باخير گؤرور، اوغلو يئنه انسان اولوب، آما بارماغيندان قان گلير و سماواريدا قيزيل اولوب. او تاريخدن اوتورورلار و گئنه-بولونا خرجلهييب و يئييرلر.
چرشنبه گئجهسي روزي ، بركت، نيت گئجهسيدير. هرنه نيت ائتسن چرشنبه گونو قبول اولار.
چرشنبه ننهنين ماجراسي
او زامانلار آغارتما يوخ ايدي. گئدرديلر، آغ تورپاق گتيريب وتشته توتارديلار. بو آغ تورپاق و سوپورگهايله چيرپما چيپارديلار. اوتاق آغاراندان سونرا، اليميزي اونا و شيرهيه باتيريب و تاخچالارين دورهسينده ناققيش چكرديلر. سونرا تاخچالارين آراسيندا چرشنبه ننه چكرديلر، او چرشنبه ننهنين آغزينا بير دنه يئميش قويارديلار. اونون آغزيندا يئميش اولدوغو حالدا، انسانلاريندا آغزي شيرين اولماسينا اعتقاد وار ايدي.
گؤي گؤيرتمه واختي
بايراما اون سككيز گون قالان، باشلارديلار، گؤي گؤيرتمگه. قديملر ائولر سويوق اولدوغونا و گؤيون بايرام گونونه حاضرلاشماسينا گؤره بو قدر تئز گؤيرتمگه باشلارديلار.
اؤلولر بايرامي و قره بايرام
ايلين آخير 5شنبهسيني اؤلولر بايرامي توتارديلار و گئديب قبرلري زيارت ائدرديلر. قره بايراملاردادا ايلين آخير گونونده اوتورارميشلار، يعني كؤهنه ايله سالارميشلار. بوگونلرده شيرنيات قويمازلار. فقط بير استكان چاي و حالوا اولاردي.
ايل تحويلي
قوران، شيريني، گؤي، آينا قويارديلار. دوعا اوخويوب و صلوات چئويريرديلر.
ايل تحويل اولدوغو گون، كيچيكلر بؤيوكلرين ائوينه گئديب و اونلارلا گوروش ائدرديلر. كوسولولر باريشارديلار. بؤيوكلر كيچيكلره بايرامليق وئررديلر. چوخلاريدا طايفا بؤيوگونون يانينا ييغيشارديلار و اوردا بايراملاشارديلار.
13 گونو
نئچه قونشو ييغيشيب پول ييغيب، ات آلارديلار. او اتلري گتيريب چؤلده چاي قيراقلاريندا كوفته بيشيررديلر. بايرام گؤيرتديگي گؤيلري آپاريب چؤله آتارديلار.
14-جو گون
13-جو گونون عكسينه ملت ائولره ييغيشارديلار و چاي ايچرديلر.
آدیم احمد اسدی دیر. اورمودا یاشاییرام.