گلدي عاشورا
گلدي عاشورا
گلدي عاشورا گينه يئر - گؤي بوتون قان آغلادي
قاره معجر چكدي هر كوچه - خيابان آغلادي
مرتضي اوغلو حسينين ماتمينده شيعهلر
ياس توتار ماتم قيلار قاره گئيهر شيون ائلر
هر سحر- آخشام هر ائودن آه - واويلا گلر
ايندي هر مسجد اولوب بير ماتمستان آغلادي
*****************************
بو نه طوفاندير ايلاهي هر گلن قان آغلايار
ياحسين سسلر اوشاقلار ائيلر افغان آغلايار
اودلانيبدير قلبلر آخشام - اوباشدان آغلايار
اولدو بو ماتملره هر سينه شان - شان آغلادي
*****************************
جمع اولاركن انبيا آچميش بو گون ياس مكتبي
احمد مختاردان چونكي شهيد اولموش صبي
ياس توتان آدم صفيدير نوحه خوان نوح نبي
داوود آوازين كسيب سلطان سليمان آغلادي
*****************************
حرمله آتدي اوخو سسلندي اوف - اوف تير ده
شمر الينده گؤر نئجه قان آغلادي شمشير ده
سيزلاييردي سجادين بوينونداكي زنجير ده
شام خراب قالميشدا هر بايقوشلو ويران آغلادي
*****************************
شاد اولوب سفيانيلر جشن ائيلهدي آل يزيد
خارجي اولدو حسين ايشكنجهسي اولدو شديد
گؤر مسلمان آدينا اونلار كيمي قيلدي شهيد
بو مسلمان ظولمونه هر نامسلمان آغلادي
*****************************
ائتديلر دعوت حسيني كوفيلر تزوير ايله
چيخديلار لاكن سلامه قان ايچن شمشير ايله
كيم گؤروب پئشواز اولونسون كؤرپه قانلي تير ايله
بو مصيبتدن داحي هر آدي انسان آغلادي
*****************************
اي خيانت مظهري قيرخ اوزلو دينسيز كوفيلر
حشر اولونجا قارغيشا - نفرينه گلديز كوفيلر
بير نئجه شرم ائتمهديز آللاهدان سيز كوفيلر
باغلانان مكتوبلاريزدا عهد - پيمان آغلادي
*****************************
كربلا اي كربلا قيلدين نه آل طاهايا
بير بئله غارتلري سالدين نه آل طاهايا
آخرت يوردو آخر اولدون نه آل طاهايا
غبطه قيلدي داشينا لعل بدخشان آغلادي
*****************************
اي فراتين گور سويو آخدين نئجه دريايه سن
آل طاهاني سوسوز ييخدين نئجه صحرايه سن
آل طاهادان سورا باخدين نئجه دونيايه سن
گؤرمهدين معصوم اوشاقلار چؤلده عطشان آغلادي
*****************************
آلدي مشكي چيگنينه اوز قويدو دريا سمتينه
قيردي ظولمو حضرت عباس يار اولدو دينه
دولدوروب مشكي سوسوز دؤندو لبي عطشان يئنه
بير بئله جومردليگه درياي غلطان آغلادي
*****************************
ائتديلر قولسوز حسينين تشنهلب سقّاسيني
سقّاليقدان قويدولار سقّا رشيد عبّاسيني
سالديلار آتدان يئره تا معرفت درياسيني
قارداشيم واي سسلهينده قانلي ميدان آغلادي
*****************************
اي حسين اي پاك قانيايله شانلي معراجه چيخان
اي آليب قان دستمازين قانلي معراجه چيخان
اي آليب جان آللاهيندان جانلي معراجه چيخان
معراج اوستونده ملكلر صف چكيب قان آغلادي
*****************************
اي يگانه جنگ ائدن مينلر قودورقان خصمايله
اي اولان اسلامه ضامن بير مبارك رسمايله
اي ائدن قورآني بيمه قطعه - قطعه جسمايله
قطعه - قطعه جسمينه آيات قرآن آغلادي
*****************************
اولدو كؤنلوم بير داها بيچاره زار و بينوا
گلدي ماتم فصلي گلدي بير داها آه و نوا
قلبيميزده آلدي يئر آلام شاه نينوا
گلدي عاشورا گينه يئر - گؤي بوتون قان آغلادي .
بهرام اسدي
آدیم احمد اسدی دیر. اورمودا یاشاییرام.