آشیق علعسگردن بیر مرثیه شعری
آشیق علعسگردن بیر مرثیه شعری
بوگونده
قان آغلا، گؤزوم، شاه شهیدانه بوگونده
اوغلونو وئریب امته قوربانه بوگونده
بوگونده بیلین عرش و سماوات قان آغلار
گاو ایله سمک، کلّی کائنات قان آغلار
دوستلاری علی دائم الاوقات قان آغلار
بیر لحظه باخان زینبی نالانه بوگونده
قان آغلا، گؤزوم، شاه شهیدانه بوگونده
اوغلونو وئریب امته قوربانه بوگونده
ایندیکی دگیل، قال و بلادندی بو پیمان
اینجیمه، اولوم هاشمی خاللارینا قوربان
ایلقار ائله ییب حق ایله اول شاه شهیدان
اصغری وئریب اوخلارا نشانا بوگونده
قان آغلا، گؤزوم، شاه شهیدانه بوگونده
اوغلونو وئریب امته قوربانه بوگونده
بیر یاندا گرک دوغرانا اول اکبر نورس
بیر یاندا قاسم تویو اولا ظلم ایله گؤر یاس
بیر یاندا قلم اولدو اوزون قوللاری عباس
بیر یاندا گرک خیمه لر اودلانا بوگونده
قان آغلا، گؤزوم، شاه شهیدانه بوگونده
اوغلونو وئریب امته قوربانه بوگونده
خیمهیه یانار ایوانی، اوتاغی اولانلار
اسیره یانار اسیری، دوستاغی اولانلار
ای سینه سیده قارداش اوغول داغی اولانلار
گرک گله سیز شور ایله افغانه بوگونده
قان آغلا گؤزوم، شاه شهیدانه بوگونده
اوغلونو وئریب امته قوربانه بوگونده
زهرا باش آچار، عرشده شمس و قمر آغلار
مور ایله ملخ، جنّ وبشر سربه سر آغلار
شمرون ستمیندن قضا آغلار، قدر آغلار
تازیانه وورور سکنه یی سوزانه بوگونده
قان آغلا، گؤزوم، شاه شهیدانه بوگونده
اوغلونو وئریب امته قوربانه بوگونده
انصاف دگیل دهرده بو ظلم و ستم لر
گؤر، نه نؤع ایله غارت اولور خانهی حیدر
قیرخا یاخین اول قارا معجر نازلی حرملر
سوار اولاجاق ناقهی عریانه بوگونده
قان آغلا، گؤزوم، شاه شهیدانه بوگونده
اوغلونو وئریب امته قوربانه بوگونده
بو جور و جفایا، بیلین، هئچ جان دایانانماز
قلبی داش اولا، جسمی گر آهن، دایانانماز
لیلا نئیله سین، واللاه، هئچ انسان دایانانماز
نیزه ده گئدن کاکلی الوانه بوگونده
قان آغلا، گؤزوم، شاه شهیدانه بوگونده
اوغلونو وئریب امته قوربانه بوگونده
معدنی سخا دستینه اول قانی توتوبدو
آتیب هاوایا، سرخ اولوب، آسمانی توتوبدو
یازیق علعسگر، عصیانین دونیانی توتوبدور
بسته دوشه رم، شافعِ عصیانه بوگونده
قان آغلا، گؤزوم، شاه شهیدانه بو گونده
اوغلونو وئریب امته قوربانه بوگونده
آدیم احمد اسدی دیر. اورمودا یاشاییرام.