بلی دوستلار اوسته کی ماجرایا باخدیقیمیزدا، بیر شئیی دوشونمه لی ییک، بیزیم چئشیدلی دیلیمیز، دینیمیز، اؤلکه میز و یوردوموز اولماسینا باخمایاراق، بیر دونیامیز وار و هامی میز بو دونیالی ییق و بونودا هئچ کس دانانماز و کیمسه ده مجبور ائده بیلمزکی بو سؤزو بیر آیری شخص دانا.

ائله محض بو عامله گؤره، اوستون شخصیت لریمیز بوتون دونیانین دیر و بو سببدندیر کی کئچمیش ایللرده یونسکو طرفیندن مولوی، نسیمی، فضولی و یا دده قورقوت ایلی دونیادا اعلام اولونوبدور. اگر اونلار تکجه آذربایجانین اولسایدیلار، بو بؤیوکلوکده بیر تشکیلات سیزجه بونلارین آدینا و افتخارینا ایل اعلام ائدردی می؟

ایندی ده عزیز دوستلاریم، یوخاریدا ماجرایا باخاراق، دئمه لی یم کی فضولی ، نسیمی ، مولوی  ویا سعدی و خیام کیمی بؤیوک شخصیتلری، دده قورقوت، کوراوغلو ، ماناس و حتّی ایلیاد ، باهارات کیمی نهنگ داستانلاری و افسانه لری یالنیز بیر خالقا سیغیشدیرماق اولماز. چون اونلار بیر خالقدا و بیر توپلومدا یارانسالار بئله،  تکجه او خالقلارا عائد دگیل لر و بو دونیانیندیلار. دونیا دوردوقجا، انسانلار یاشادیقجا اونلار یاشایاجاقلار.

اگر بیز فضولی نی ، نسیمی نی ، مولوینی و یا خود آیری بیر اولو شخصیتی ، آذربایجان قالسین هله قیراخدا، تورک دونیاسی نین شاعرلری و عارفلری بیلسک، اونو کیچیلدرک، بیر توپلوما مخصوص ائتمیشیک. ممکن دیر بعضی لری چیخا دئیه بلی فضولی تورک شاعری دیر و تورک دونیاسینیندیر. کسین لیکله ائله دی ، آمّا بو  عقیده ده اولان دوستلاریما دئمه لی یم کی سیز دئدیکلرینیزدن علاوه، اونلار همده دونیا شاعرلریدیلر. اگر بیز فضولی نی تورکلره مخصوص ائتسک، اونون دونیا گؤروشونده اولان فکرلری هارایا یئرلشدیره جه ییک؟ و یا عرب و فارس دیوانی نی ، او دیوانلار کی هر ایکی ادبیاتین افتخارلارینداندیرلار، اونلاری نه ائده جه ییک؟

نسیمی نین بو شعرینه نه جوابیمیز اولاجاق،اوردا کی هله بو دونیانین سینیرلارین آشاراق، بو دونیایادا سیغینمادیقین سؤیله ییر:

منده سیغار ایکی جهان، من بو جهانه سیغمازام

گؤهر لامکان منم، کون مکانه سیغمازام

صورته باخ و معنی نی صورت ایچینده تانی کیم

جسم ایله جان منم ولی، جسم ایله جانه سیغمازام

گرچی محیط اعظمم، آدیم آدامدیر، آدمم

طور ایله کن فکان منم، من بو مکانه سیغمازام

جان ایله هم جهان منم، دهر ایله هم زمان منم

گؤر بو لطیفه یی کی من، دهر و زمانه سیغمازام

انجم ایله فلک منم، وحی ایله هم ملک منم

چک دیلینی و ابسم اول، من بو لسانه سیغمازام

ناره یانان شجر منم، چرخه چیخان حجر منم

گؤر بو اودون زبانه سین، من بو زبانه سیغمازام

گرچی بوگون نسیمی یم، هاشمی یم، قریشی یم

مندن اولودور آیتیم، آیته، شانه سیغمازام

 

و یا:

مکانسیز اولدو نسیمی، مکانی یوخدور آنین

مکانا سیغمایان اول بی مکان مکانی نئدر؟

 

مولوی نین عارفانه و حکیمانه فکرلرینی نه ائده جه ییک؟ بو اوجا و اوستون فکرلری بیر ملته و توپلوما عائد ائتمک سیزجه دوغرودورمو؟ منجه یوخ!

هر حالدا بودا بیر یئنی یازی اولاراق، بو وبلاگدا یازیلدی. بو یازیلار منیم فکرلریمی عکس ائتدیرن بیر یازی دیر. اومودوم وار کی بگنه سیز و نظرلرینیزله منی داها آرتیق هدایت ائدرک، بیلگی لریمی چوخالداسینیز و آخساقلیقلاریمی اصلاح ائتمکده یاردیمجیم اولاسینیز .یئری گلمیش کن ، آللاهدان اولو شاعریمیز حاج عبدالرحمن طیارا(دده کاتبه) رحمت دیله ییرم.

بو آرادا بونا سئوینیرم کی، دده کاتبین منیم آتام لا دوستلوق علاقه سی اولماسیندان دولایی، ائده بیلدیم او اوستون شاعریمیزین محضریندن آزدا اولسا فایدالانام و بعضی حکمت لی سؤزلریده اؤز بیلگی لریمه آرتیرام.