دونيا شهرتلي، آدليم اوزانيميز اوستاد آشيق حسن اسكندري ايله دانيشيق.

دونيا شهرتلي، آدليم اوزانيميز اوستاد آشيق حسن اسكندري ايله دانيشيق.

دانيشيق آپاران: احمد اسدي

اشاره: آشيقلار ايله سيرا دانيشيقلاريميزدا، يوردوموزون بؤيوك اوزاني، دونيا شهرتلي اوستاد آشيق حسن اسكندري ايله گئديب گؤروشوب دانيشيق آپارميشيق. يوردوموزون آدليم آشيقلاريندان و چوخ مهربان و صاف اوره كلي اولان، آشيق حسن اسكندري قاراداغ ماحالي نين كاللا كندينده آنادان اولوب. ايندي ليكده تبريزده ياشايير . آشيق حسن تبريزده بير موسيقي مكتبي(آموزشگاه موسيقي) آچاراق، بو شهرده اورانين مديري وظيفه سينده چاليشير. يوردوموزون قالارگي آدلاريندان و سسلريندن اولان آشيق حسن حياتي بويو بير چوخ خارجي اؤلكه يه گئده رك، اؤز كولتوروموز دونيايا تانيتديريبدير. اونون آذربايجان آشيقليغيندا اؤزل و اؤزونه مخصوص يئري واردير. بير مثل وار دئيه رلر، تبريزه گئتدين آشيق حسني گؤردون، ائله بيل آشيقلارين هاميسيني گؤروبسن. ائله بونا گؤره ده گئديب آشيق حسن ايله گؤروشوب دانيشيق آپارميشيق. اوخوماغينا سيزي دعوت ائديريك.

اوستاد يوردوموزدا ، سيزي تانيمايان و یا آدینیزی ائشیتمه ین انسان دئمك اولار چوخ آزدير. آما بونونلا بئله ايسته ييريك، اؤز ديلينيزدن اؤزونوزو تانيتديراسينيز؟

من آشيق حسن اسكندري،1326/11/2 كاللا كندينده دونيايا گلميشم. قديملر كنديميزين ياخشي اوزوملري اولاردي. آنامدا نباتي نين كنديندن و اوشتيبينلي ایدی. 9-10 ياشيمدا تبريزه كؤچموشوك. تبريزده خالي توخوموقلا مشغول اولموشام. سونرا اورمويا گئتميشم و اورمودا بير مدت ايشله ميشم. 1343-جو ايلده ده تهرانا گئتميشم. تهراندا موسيقي كلاسلاري وارايدي. ايكي ايل 1345-47 يه قدر آواز ايراني ايشله ميشم. 1347-جي ايلده ائولنديم. 1348-جي ايلدنده يئنه ده قاييتديم تبريزه.  تهراندا اولدوغوم واختلار آشيقلارا چوخ علاقه يئتيره رديم. تهراندان تبريزه، آشيق نوارلاريني آلماق اوچون گلرديم. سونرادا او دؤورون آشيقلاري ايله تانيش اولدوم و آشيقلار مندن ال چكمه ديلر، دئديلر گل بيزيم يانيميزدا سنده اؤيره ن. بيرينجي دفعه ده رحمتليك آشيق عيسي دئشن وار ايدي، اونون يانيندا قاوال ايشله ديم. بير آي آشيق عيسانين يانيندا قالاندا سونرا، رحمتليك آشيق عبدالعلي نوري ايله بير ايل ايشله ديم. سونرادا آشيق علعسگر مرندي ايله ايشله ديم. ائله قاوالچي اولدوغوم واختلاردادا سازي اؤيره نيرديم. سونرالار تصميم توتدوم كي يا من آشيق اولاجايام و ساز چالاجايام، يادا دا قاوالي قوياجايام قيراغا. ائله او گوندن اينديه قدر بو تصميمين اوستونده يم و ائليميزين خدمتينده يم.

آشیق علعسگر ایله آشیق حسن اسکندری

اوشاقليق ايللرينيزده بيرينجي آشيق كيمي گؤرموشدونوز؟

من آشيق خيرالله وار ايدي، بيرينجي دفعه كنديميزه او گلميشدي. منده اونو كنديميزده اولان تويدا گؤردوم. آشيق حسين جاوانين شاگردلريندن ايدي. اوغلودا قياث آديندا بير بالابانچي ايدي. اوغلو، بالاباندا چوخ يوخاري سويه ده ايدي.

اوستاد، آشيق مكتبلرينين سازلاريندان و قورولوشوندان دانيشاق. آشيق مكتبلرينه باخساق، گؤره جه ييك، مثلا اورمو تك سازدير. بورچالي تك سازدير. آما قاراداغ-تبريز و بير چوخ يئرلرده آشيق اوچلوگو(ساز-بالابان-قاوال) و ايكي ليگي(ساز-بالابان) وار. بو فرقلر(سازلارين تركيبي) نه زماندان وار؟

آشيق اولده، اورمو مكتبي كيمي تك ساز اولوب. بو كلي حالتده اولوب. يعني بوتون مكتبلر بئله اولوبلار. سونرالار، موقعيته گؤره، بالابان آرتيريليب. سونرالار 70-80 ايله ياخين اولاركي قاوالدا آشيق دسته سينه آرتيريليب. بيزيم اؤز منطقه ميز، قاراداغي نظره آلساق، بالابان-قاوال آشيق دسته سينه قاتيلماميشدان اؤنجه، دؤهول وارايميش. عيني اورميه كيمي تويلاردا دؤهولو ائشيكده چالارميشلار و آشيقدا ايچريده مجلسر قورارميش. قاوالدا بونا گؤره آرتيريليب كي، گؤروردون مجلسده آشيقدان ماهني و تصنيف ايست هينده قاوالچي اونو اوخوياردي و مجلسده اولانلاري راضي سالاردي. آشيقدا اؤز هاوالاريني و مجلس داستانيني سؤيله ردي. قاوالي بونا گؤره آشيق صنعتينه آرتيريبلار. من اؤزومده قاوالچي اولدوغوم واختلار، ماهني و تصنيفلري اوخويارديم.

آشیق حسن تبریزین تربیت کتابخاناسیندا-۱۳۵۶

هانسي ايلدن الينيزه ساز گؤتوروب، آشيقليغا باشلادينيز ؟

من 1350-جي ايلدن آشيقليغا باشلاديم.

يئنه ده بالابان ايله قاوالين آشيق صنعتينه گلمه سيندن دانيشاق، بو ايكي سازين آشيق مكتبلريميزده بوراخديغي تأثيردن عزيز اوخوجولاريميزا بويورون؟ ائتگيسي نه اولوبدور؟

بيرينجي سي هاوالاردا منفي تأثير بوراخماييب. هاوالاري ريتملنديريب و گؤزللنديريبدي. هاوالاريميزي اجتماعي  ائديب. سونرادا داستانلاردادا هئچ تأثيري اولماييب.

بالابان و قاوالين آشيق ياراديجيليغيندا تأثيري نه اولا بيلر؟ يعني دئديگينيز بو مثبت عامللر ائده بيليب، آشيق صنعتينه يئني هاوالار بخش ائده و آشيغي يئني هاوالار ياراتماغا شوقا گتيره؟

يوخ. بو موضوعدا تأثيري اولا بيلمز. يئني هاوا ياراتماق، آشيغين اؤز هنرينه و استعدادينا قاليب. گرك او قدر مهارتي و استعدادي اولا كي، بير نفر ائده بيله يئني هاوا يارادا. اودا هر كسين اليندن گلن بير ايش دگيل. اؤزوده گرك ائله هاوا يارانا كي، خالق هاوالارينين سيراسينا كئچه. بئله اولمايا كي، ايكي-اوچ آي چاليب اوخونا سونرادا يادلاردان چيخيب گئده. ايندي ليكده، آشيق چنگيز مهدي پور بو ايشي گؤروب. آشيق علي خداداددا يئني هاوا ياراديب و نوتا كئچيب. من اؤزومده 4-5 هاوا ياراتميشام، آما هله اؤزومو راضي سالا بيلمه ميشم. نه زمانكي بيلسه م، مندن سونرا بو هاوالار قالاجاق، اوندا اؤزومو راضي سالا بيلرم.

اؤز ماحالينيزين قديم آشيقلاريندان هانسي لارينين آديني  خاطرلاييرسينيز؟

آشيق اوروج، آشيق خيراله، آشيق نادر، آشيق عبدالعلي، آشيق حسين جاوان.

تبريز-قاراداغ آدلانان مكتب وار. دانيشيقلاريميزدان بئله دوشوندوم، تبريز شهريندن كئچميشلرده آشيق اولماييب و بو شهرين آشيقلاري قاراداغدان گليبلر. بئله ديرمي؟

دوزدو. تبريزدن آشيق اولماييب. تبريز آشيقلارينين چوخو قاراداغداندير.

آشيق داستانلاري نه اوچون يارانيب. موضوعلاري نه اولوب؟

اوچ نوع آشيق داستاني واريميزدير.

1-حماسي داستانلار- كوراوغلو داستاني. بو داستاندا قهرمانليق وار.

2-محبت داستانلاري وار. جماعتين صميميتيندن، دوزلوگوندن دانيشير.

3-سئوگي داستانلاريدا وار. عشق و معشوقدور.

آما موضوعلارا باخماياراق، نئجه كي آدام گئدير بير فيلمه باخير و آخيردادا او فيلمين نتيجه سي اولور. بو داستانلاردا اونلارا تاي. بونلارين نتيجه سي وار و گركده بئله اولا. بو داستانلار هاميسي ائليميزين ياشاييشيندان آيريليب و ائل ايچينده اولان مسئله لري نظمه چكيبدير. بو داستانلارين بير سئريسي واقعيتده اولماسادا، بير تعدادي واقعيتدير. مثلا خسته قاسمين سؤز-صحبتينه باخين. اوستادلار بئله ائشيتميشم كي دئيه رديلر، هركس خسته قاسمين بوتون سؤزلريني بيلسه دا هئچ يئرده معطل قالماز و آيري سؤز-صحبته احتياجي اولماز. كي بو حقيقت داستاندير. يا گرگرلي محمد وار. اولولو كريم وار. عباس توفارقانلي وار. بونلار حقيقي دير. بير تعداددا وار، قاراناغيل ديلار. افسانه و روياديلار. قاراناغيللاردادا حقيقتدن دانيشيلير. عبرت وار.

قديم تويلاردا، سيزين ماحالدا هانسي داستانلاري چوخ ايسته يرديلر؟

قورباني، اصلي-كرم،واله، عباس توفارقانلي.

آشيقليغين فلسفه سي نه اولوب؟ آشيقليق نه اوچون يارانيب؟

شعر ايله موسيقي انسان يارانان گوندن يارانيب. موسيقي انسانين وجودوندادير. آشيقليقدا موسيقي ميزين بير بؤلومودور. موسيقي نه دير؟ موسيقي تكجه چال-اوينا دگيل كي!! موسيقي ميز اونلاردان علاوه همده ملتميزين، ائليميزين دردي، كدري، سؤزودور. آشيغين اؤزونه بير دوروشوغو واردي. باخسانيز نيه آشيقلار قهوه ده اوخويوبلار؟ نيه آياق اوسته اوخويوبلار؟ بونلار هاميسي آشيغين رسالتين گؤسترير. آشيق او يئرده اوخويارميش كي، نئچه نفر بير يئره توپلانا و او ائده بيله سؤزونو ملته يئتيره. آياق اوسته دورماغيدا، بونو نشان وئريركي آشيق هميشه آماده دير.

آشيقلقدا سؤز اؤنملي دير يا ساز؟ بيرده گنج آشيقلارا بويورون آشيغين ائل ايچينده نئجه دولانديغي و داورانديغيني؟

آشيقليقدا اول سسدير، سونرا سؤزدور، سونرادا ساز. بو منيم نظريمدير. نئچه ايللردير تجربه بونو منه ثابت ائله ييب. دوزدور هره سي گرك اؤز يئرينده اولا. آما سس اؤنملي دير. آشيق اولاندا گرك، ائل ايچينده آغير-سنگين اولا. گؤزو پاك اولا. هانسي ائوه گئتدي، او ائوي اؤزوندن بيله. يوخسا ائله دليلدن، نصيحتدن، عبرتدن دئيه سن و اؤزون عمل ائله مه يه سن، اولارسان عالم بي عمل. آشيق گرك خالقينا معرفتدن، حقيقتدن، نصيحتدن دئيه و اؤزوده اؤز سؤزونه گرك عمل ائله ميش اولا. حتي بو صنعته مذهبي باخيش ايله باخساق، بير عرفاني صنعتدير. آشيق نه قدرده كيچيك اولسا ياش باخيميندان، 90 ياشينداكي كيشي اونون نه اوخودوغونا گؤز تيكر، تا اوخودوغو سؤزلردن، دليلدن، حقيقتدن بهره لنسين. بو قوجا كيشي او آز ياشلي آشيغين اؤزونه يوخ، صنعتينه دگر وئرير. يعني بو صنعت ائله صنعتدير. فضاسي ائله دير. بؤيوك بير مكتبدير. علم دير.

آشيق هاوالارينين نوتلارا كئچمه سيندن دانيشاق، بير سيرا آشيقلار بو ايشي لازم گؤرسه لرده بونا قارشي دورانلاردا آز اولماييب. سيزجه ياخشي دير مي؟

موسيقي چي گرك نوت بيله. دونيادا نوت ايشله نير. نوت يازيلسا ياخشي دير. اودا يالنيز گروهي كنسرتلرده ايشلتمگه گؤره. باخين نيه بيز بئش نفر بير يئره توپلاناندا هماهنگ اولونجا مصيبت چكيريك،. بودا او نوتون يازيلماماسي دير.

آذربايجاندا آييرا بيله جگيميز نئچه آشيق مكتبميز وار؟

اوچ مكتب واريميزدير كي، او بيريلر ايله بوتؤولوكده فرق ائله يير. اودا اورمو، همدان و هئشتري مكتبلري دير. او بيري لرده بير-بيرلرينه اوخشايير و ياخينديلار. مثلا زنجان ايله هئشتري ياخينديلار. او تايدادا گنجه-باسار، گده بگ، شيروان وار. او تايدادا شيروان كلاً آيري دير. او بيريلرده ده فرقلر چوخ آزدير.

اوستاد هانسي اؤلكه لرده سفرده اولوبسينيز؟

31 اؤلكه يه گئتميشم. بير سوريه دن سونرا كي زيارته گئتميشم. قالاني كونسرت اولوبدور.

آمريكايا، ژاپونا، چينه، فرانسه يه، توركيه يه، آلمانا، كانادايا، آذربايجانا و ... .

بعضي لرينه ده چوخ گئتميشم مثلا آلمانا 8 دفعه گئتميشم، فرانسه يه 5 دفعه گئتميشم و ....

خارجي كنسرتلرينيزدن دئيه جگينيز سؤز وارسا بويورون؟

او كنسرتلر چوخ گؤزل اولور. اورالاردا هر شئيه علمي باخيرلار. سالونلاردا گؤرورسن 10 دقيقه قالير كنسرت باشلايا، آما هئچ كس گلمه ييب. بير دقيقه گؤرورسن سالون هاميسي دولدو و هله آياق اوسته قالانلاردا اولدو. خارجي كنسرتلرده آشيق داستانلاريميزدان و حكايه لريميزدنده دئيه رم، كنسرت قورتولاندان سونرا گلرلر سوروشارلار و دئيه رلر خوش بئله ملتين حالينا كي بو حكايه لري وار و بئله موسيقي سي وار. اونلار چوخ يوخاري سويه ده ديلر و هر نه يه علمي باخيرلار.

آشیق حسن فرانسادا

آشیق حسن آغ سارایین اؤنونده

 آشیق حسن ژاپونیادا

آشیق حسن چینده

آشيقلار اوخوياندا گرك نه يي نظرده توتالار؟

گرك آشيق يكنواخت اوخومايا. مثلا هاميسي 8/6 ريتيملي هاوا اوخومايا. هر ريتمده اولان هاوالاردان سئچه و اوخويا. اونداندا علاوه سؤزلري سئچنده ده دقت ائده كي نه سؤزو اوخوياجاق. سؤزده چوخ اؤنملي دير.

سون سؤال اولاراق، بويورون ائليميزه و گنجلره نصيحتينيز  و سؤز صحبتينيز؟

سؤزوم بودوركي، گرك هر قوم و يا ملت اؤز فرهنگينه و موسيقي سينه صاحب چيخا. اؤز موسيقي سينه گله قولاق آسا، گؤره نه دير. سونرا گئده آيري فرهنگلره و موسيقي لره دقت يئتيره. 

دگرلي واختينيزي بيزيم اختياريميزدا قويدوغونوزا گؤره تشكر ائديرم. چوخ ساغ اولون.

سيزده بو صنعته و هنره زحمت چكيب بورالارا گلديگينيز اوچون ساغ اولون.

 

 

 

آشیق حسنین چکیلمیش رسمی(اثر: صابر بقال اصغری)



آشیق حسن گنجلیک چاغلاریندا( تبریز-گولستان باغی-سولدان ایکینجی نفر)

آشیق حسن تهراندا-سولدان بیرینجی(۱۳۴۸)

احمد اسدی و آشیق حسن اسکندری

آشیق حسن گروهو ایله بیرلیکده

دونياليق آغ چليك گونو مناسبتينه، آشيق علي قلندري ايله دانيشيق.

 

دونياليق آغ چليك گونو مناسبتينه، آشيق علي قلندري ايله دانيشيق.

دانیشیق آپاران: احمد اسدی

اكتبر آيي نين 15 و يا خزل آيي نين 24 دونياليق آغ چليك گونودور. 1950-جي ايلده بوگون بيرلشميش ملتلر تشكيلاتيندا آغ چليك قانونو عنواني ايله بير قانون تصويب اولوندو. بو قانوندا آيدين اوره ك و گؤز نعمتيندن محروم اولان انسانلارين حاقلاري قورونور. دئييلنلره گؤره ايراندا، 400 مين نفره ياخين آيدين اوره ك و يا ياري گؤرمه ين انسان وار. آما بونلاردان تكجه 76 مين نفري سياهيه آلينيبدير. هر ايل ايلگي لي قوروملار بو گونه گؤره اؤزل مراسملر و تؤرنلر توتورلار. ائله بونا گؤره ده بوگونكو دانيشيغيميز  آذربايجانيميزين، آيدين اوره ك و متانتلي آشيغي، آشيق علي قلندري ايله اولوب. آشيق علي قلندري 1348-جي ايلده اورموشهريندن 20 كيلومتر آرالي اولان گؤلمانخانا كندينده آنادان اولوب. 3 ياشيندا ايكن گؤزلريني قيزيلجا نتيجه سينده ايتيريب. آشيق علي ائله دوغولدوغو كندده هله ده ياشاماقدادير. آشيق علي بير جهتدن اؤنملي بير وظيفه داشي يير، اودا دوللو مصطفانين نئچه واسطه ايله شاگردلريندن حساب اولونور. اونون صنعت شجره نامه سينه باخساق، بئله بير خريطه اوزه چيخير.

دوللو مصطفي-------<آشيق ميكائيل-------< آشيق محمد-------< آشيق جواد-------<آشيق فرهاد-------<آشيق عزيز-------<آشيق مختار-------<آشيق علي قلندري

آشيق علي ايله بير دانيشيق آپارميشيق. سيزي بو دانيشيغي اوخوماغا دعوت ائديريك.

آشيق علي عزيز اوخوجولاريميزا بويورون، هانسي ايلدن آشيقليغا علاقه تاپيبسينيز؟

من 1360-جي ايليندن دئمك اولار، بو صنعته علاقه يئتيرديم. او زمانلار اوخويارديم، آما ساز چالا بيلمزايديم. 1372-جي ايلدنده اليمه ساز آلديم. آما ائل ايچينده آشيق اولاراق، 1379-جي ايلدن چيخيش ائتديم.

آشيقليقدا اوستادينيز كيم اولوب؟

منيم اوستاديم، ائله اؤز كنديميزدن اولان، رحمتليك آشيق مختار اماني ايدي.

آشيق مختاردان دئيين، اونون حاقدا نه دئيه بيلرسينيز؟

رحمتليك آشيق مختار چوخ خوش اخلاق ايدي. سؤزه و صحبته ده چوخ وارد بير انسان ايدي. اوستادي تانيانلارداندا سوروشا بيلرسينيز، او بيلن داستانلار و سؤز-صحبتلر چوخ-چوخ ايدي. اوستاد 1379-جي ايلده وفات ائتدي.

نئچه ايل شاگردليك ائتدينيز؟

من 1372-جي ايلدن آشيق مختارين يانيندا ايديم تا وفات ائدنه قدر، يعني 1379-جي ايله قدر.

اؤز سازينيزدان دانيشاق، بو سازي كيمدن آلدينيز، نئجه اؤيره ندينيز؟

دوزونه باخاسان، من سازي آلماميشدان اومود ائله ميرديم، ساز چالا بيله­م. ووردو، بيزيم كندده بير توي اولدو. رحمتليك آشيق مختاري گتيرديلر. منده بو تويا گئتديم، آشيق مختار يانيجا آشيق بولودو گتيرميشدي. ، آشيق مختارين يانينا گئتديم. دئديم، اوستاد منده ساز چالا بيلرم؟ دئدي، نيه چالانمازسان. ائله من او سؤزو ياديمدا ساخلاديم. نئچه واخت سونرا، آشيق مختاري قارداشيمين تويونا گتيرميشديك. او زمانداندان منيم علاقه م داهادا چوخالدي. سونرا گئتديم، آشيق مختارين يانينا و ساز اؤيره نمگه باشلاديم. سازيمي دا آشيق بولوددا بير ساز وارايدي، آشيق مختار اونو بگندي و او زماندان باشلاديم ساز چالماغا و اؤيره نمگه. آشيق مختارين مجلسلرينه گئدرديم، قولاق آسارديم گؤرم، مجلسي نئجه دولانديرير.

آشيق مختار منيم بارماقلاريمي آلاردي الينه، پرده لر اوستونده دولانديراردي. يا دئيه ردي اليني قوي اليم اوسته گؤر من نئجه چاليرام.

آشيق مختارين اوستادي كيم اولموشدو؟

آشيق عزيز اولموشدو.

آشيق عزيزدن نه دئيه ردي؟

دئيه ردي، چوخ گؤزا چاليب اوخوياردي. همده اخلاقي و معرفتي چوخ يوخاري ايميش. پولا قول دگيلميش.

بيرينجي هاوا و بيرينجي داستان هانسيني اؤيره ندينيز و نئچه داستان بيليرسينيز؟

هاوالاردا ديوان، تجنيس.

بيرينجي داستان ايسه  سئيدي، سونرالاردا حيدر-بهرام، نجف، ابراهيم و صحبتلرين چوخونو. 30 صحبت بيلرم. آما 20 صحبتي تكميل بيليرم. 10 داستاني بعضاً سؤزلريندن بيلميرم. آما داستانين بوتونلوگونو بيليرم.

داستانلاريميز نه دئمك ايسته يير؟

داستانلار دليل نصيحت اوستونده قورولوب. داستانلار بيزه وطني سئومگي اؤيره دير. ايلقاريندان دؤنمه مگه تاپشيرير. غريب ايله شاه صنمين داستانينا باخسانيز بئله دير.مردليك و جوانمردليك داستانلاريميزدان كوراوغلويا باخا بيلرسينيز.

آشيق علي نين سئوديگي هاوالار هانسي دير؟

منيم اؤز اوره گيمه ياتان هاوا جمشيدي دير.

داستانلاردان هانيسيني خوشلاييرسينيز؟

من كوراوغلو ايله سئيدي داستانيندان خوشوم گلر.

كيمين شعرلريني چوخ اوخويارسينيز؟

سؤز-سؤزو گتيرر، آرشين بئزي.قاليب يئرينه.هانسي شاعرين شعريني بگنسه م اوخويارام.

دوللو مصطفي، بالوولو مسكين، قاسم، بهزادنيا، بهرام اسدي و ... شاعرلردن اوخويارام.

آشيقليق نيه يارانيب؟فلسفسه سي؟

باخسانيز، آشيق مجلسي باشلاياندا، ديوان ايله باشلايير. گؤرورسن، بير نفره بير شخص ظلم ائدنده، دئيير گئت آللاه سنينله منيم آرامدا ديوان ائيله سين. ديوان يعني دوزلوك، عدالت. اودوركي، آشيق دوزلوكدن و عدالتدن باشلار. آشيق عدالت ايستر. آشيق اوخويان سؤزلره ده باخسانيز، يوزه دوخساني حقيقتدن، معرفتدن، شريعتدندير.

سيزين اؤز كندينيز و اطراف كندلرده آشيقليغا علاقه نه حدده دير؟

30 ايل بوندان قاباغا قاييتساق، چوخ گؤزل بير فضا وار ايدي. تويلار، مجلسلر آشيق سيز اولماز ايدي. آما زمان ائله گلدي، آشيقليق بيزيم منطقه لرده بير مدت رونقدن دوشدو. آما شوكور  اولسون،4-5 ايل دير، يئني دن جانلانيب و ايسته يير، قديمكي رونقين تاپا.

حوزه هنرينين آشيقلار درنگينين عضووسوز، اورا گؤره نه دئيه بيلرسينيز؟

آللاه بو كانونون آچيب يولا سالانلارين ايشين راست گتيرسين. چوخ ياخشي بير يئر اولوب. اورايا بيزلر گئديريك، چاليب اوخويوروق و بير-بيريميز آرتيق تانييريق. آشيقلارا صاحب چيخيبلار. آقاي عليزاده دن چوخ –چوخ تشكر ائديرم.

آشيق علي، سيز بيمه هنرمندان طرحيندن استفاده ائديبسينيز؟

بله. من 1386-جي ايلدندير،ارشاد طرفيندن بيمه اولموشام و بو طرحدن استفاده ائديرم و هر آي بيمه پولو تؤكورم.

بهزيستي طرفيندن نئجه سيزه بير ايش گؤروبلر؟

والله. ائله هامي معلوللارا تاي منه آيدا 60 مين تومن پول وئريرلر.

آشيق علي سيز آنادان اولما آيدين اوره ك اولوبسينيز؟

يوخ، من 1351-جي ايلده يعني اوچ ياشيمدا قيزيلجا توتدوم و گؤزلريمي الدن وئرديم.

آشيق علي بو سؤزو بونا گؤره سوروشدوم كي، بعضي انسانلار ائله مختصر ياشاييشلاريندا بير قضا و اتفاق گلير باشلارينا، دا اومودسوز اولورلار و دونياني قورتولموش بيليرلر، آما آدام سيزين كيمي انسانلاري گؤرنده، هم فخر ائدير و همده اؤزوندن اوتانير. بئله اومودسوز انسانلارا نه دئيه بيلرسينيز؟

انسان اودور اراده سي اولا، اؤزوندن اوره ك نشان وئره. توانين گؤستره، دئيه باخين منيم بو توانيم وار. . بير اؤلومدن سونرا ، دونيادا اولمايان ايش يوخدور. اؤلومون علاجي يوخدور.هركسدن ايسته گيم بودور اؤز گوجلري قدر، اؤزلرينين اراده لريني گؤسترسينلر.

جوانلاريميزا نصيحتينيز و سؤز-صحبتينيز؟

جوانلارا كيچيك قارداش عنوانيندا بونو دئيه بيلرم، گئتسينلر، ياخيندان آشيق مجلسلرينده اوتورسونلار، اوندان سونرا قضاوت ائتسينلر. قولاق آسسينلار، آشيق دئيه ن سؤزلره و نصيحتلره. گؤرسونلر آشيق نه دير، آشيق موسيقي سي نه دير. اوزاقدان ائله دئمه سينلر، آشيق نمنه دي؟ مطمئنم ائشيتسه لر و دوشونسه لر، آشيقليقدان ال چكه بيلمزلر. بو هنري قويماسينلار، آرادان گئده. سؤزوم بودور.

واختينيزي بيزيم اختياريميزدا قويدوغونوزا گؤره،چوخ ساغ اولون.

سيزده ساغ اولون.

قهرمان سولدوزون، ایگید ار اوغلو

قهرمان سولدوزون، ایگید ار اوغلو

آشیق رضا پوینده ایله دانیشیق.

دانيشيق آپاران: احمد اسدي

سولدوز ديارينين سئويلن و آدليم اوزاني، آشيق رضا پوينده 1344جو ايلده سولدوزون عجم كهريزه كندينده دونيايا گليب.  9-جو صنيفينه قدر ائله اؤز كندلرينده، ديپلوما قدرده شهرده تصحيلاتينين آرديني توتوبدور. آشيق رضا گؤزل اوخويور، همده گؤزل چالير. گؤزل چاليب اوخوماقدان علاوه ده اونون بير بيلگيلي و مطالعه ائدن آشيق اولماسي و هابئله هاوالاردا سئچديگي يئني سؤزلر و شعرلر اونون او بيري آشيقلاردان فرقلي اولماسينا سبب اولور. آشيق رضا ائل آشيغي دير، ائلين درديندن دئيير، ائلين درديني سؤيله يير، آناديليندن اوخويور، پارلاق كئچميشيميزي ساز هاوالاري ايله جانلانديرير و آيدين گله­جكلره اومود وئرير هر بير اوخوماغي چاغداش دوروموزه اويغون و هر بير هاواسي ائلين درديندن سؤز آچاندير. دگرلي اوستاديميز آشيق علي قره آغاجي­نين تعبيري ايله دئسه­ك، آشيق رضا اورمو مکتبینده اولان آشيقلارين دده­قورقودودور.آللاهدان حؤرمتلي آشيغيميزا ياشاييشيندا باشاريلار ديلركن، سيزي اونونلا آپارديغيميز دانيشيغي اوخوماغا دعوت ائديريك.

آشيقليق صنعتينه گليشينيزدن دئيين، سيزي بو صنعته ماراقلانديران نه اولدو؟

منيم داييم اوخويان ايدي. آشيق هاوالاريندا اوخوياردي. ائله اولده اونون اوخوماقلاريني گؤروردوم. سونرادا راديودان آشيق درويش ايله آشيق دهقان و او بيري آشيقلار اوخويارديلار. منده اونلار اوخودوغو واختلار آز قالاردي راديونون ايچينه گئده­م، بير دقيقه ده راديودان باشيمي قووزاماز ايديم. ائله اوشاقليق ايللريندن اوخوماغا باشلاديم. آشيق درويشين وورغونو ايديم، ائله اونون قايداسيندادا اوخويوردوم.  سونرالار 1365-جي ايلده بير دنه ساز آلديم. سولدوزدا رحمتليك عليرضا واحدي آديندا بير نفر معلم وار ايدي. اونون يانينا گئتديم و ساز هاوالاريني اؤيره­نمگه باشلاديم. داستان سؤزلريمي ده آشيق مختار گؤلمانخاناليدان اؤيره­نديم. اوندان سونرادا يولومو قوشاچايا سالديم، آشيق هدايت موسي اوغلونون يانينا گئتديم و ايكي ايلده اونونلا بيرليكده دولانديم.

آیری ایشه باخمادینیز, ائله اولدن  آشیقلیغا گلدینیز؟

من آشیقلیقدان اؤنجه، دئمک اولار پلیس اداره­سیندن قبول اولدوم، قرار ایدی دا گئده­م، آما گئدن گونو آتام دئدی اؤلرم آما قویمارام منیم یانیمدان گئده­سن. من ده دا آردینی توتمادیم. ایندی بیر دوستوم وار, ائله من قبول اولاندا اودا قبول اولموشدو، سولدوزدا فرمانده پادگان اولوب.

آشيق مختاردان دئيين، نئجه ايدي؟

بؤيوك اوستاد ايدي. اونون كيمي داستان دئيه­ن هله ليك يوخدور. اوستادلارين اوستادي ايدي.

بعضي لر سيزه آشيق درويشين شاگردي و بعضي لرده ائله بو دورون درويشي دئييرلر، بيزده اونلارا تاي سيزه بو دورون درويشيده دئسه­ك،آما بيليريك سيز درويشين شاگردي دگيلديز، نيه بئله دئييرلر؟

بونو دئمه لي يم كي هئچ كس آشيق درويش اولا بيلمز. آما من آشيق درويشين قايداسيندا چاليرام. مني اوستاديم رحمتليك عليرضا واحدي آشيق درويشين شاگردي ايميش. اينديليكده­ده قوشاچايا، ماراغايا، بينابا تويلارا گئدنده منه دئيه رلر درويشين باجي اوغلوسو گلدي. نه قدر دئميشمده كي من درويشله قوهوملوق نسبتيم يوخدور. يئنه ده ائله مني درويشين باجي اوغلوسو چاغيرارلار. سونرادا ائله آشيق درويش بيزيم هامي­ميزين اوستادي­دير، بو قاپيني(آشيقليغي) اونلار آچيبلار.

سيزي بير بيلگي­لي آشيق تاني­ييرلار، همده نئچه مكتبين هاوالاريني چالان بيريسي. هانسي مكتبين هاوالارين چاليرسينيز؟

باخين مكتب فرقيميز يوخدور. هامي آشيقلار آذربايجان آشيق مكتبي­ديلر. آما من هم سولدوز، هم اورمو، همده بير تعداد تبريز-قره داغ آشيق هاوالاريني چالارام.

سولدوزون اؤزونه مخصوص نئچه هاواسی وار؟

تقریبی اولاراق, 40 هاواسی وار.

هانسي هاوالاري بگنرسيز؟

من اورمو هاوالاريندان تركمه، تاجري، امراهي تبريز هاوالاريندان گؤيچه گولو، جليلي. هاميسي گؤلدير، دئمك اولمور بو پيسدير بو ياخشي.

سينه دفتر نئچه داستان بيليرسينيز؟

من 20 داستان سينه دفتر دئيه بيله­رم. آما رحمتليك آشيق مختاردان 40 داستان دفتريمه يازميشام.

داستانلارين مفهومو نه دير؟

داستانلاريميز نئچه بؤلوم اولورلار. بعضي لري حماسي ديرلر، بعضي لري عاشق-معشوق، بعضي لري عرفاني-مذهبي ديلر. قديملر امكانات اولماديغي اوچون، بو داستانلار ايله ملته دوز يولو گؤستريرميشلر و اگريني دوزدن سئچيرديرميشلر.

آشيق دئيه­نده سيزين فكرينيزه نه گلير؟ آشيقليغين فلسفه­سي نه­دير؟

آشيق دئيه­نده منيم ذهنيمه هميشه ايشيق كلمه­سي گلر. آشيق يعني ملتي ظلماتدان ايشيغا چيخاردان. قارانليقلاري يوخ ائدن. هله بونا آي ايشيقدا دئييبلر. بلكه ده ائله آشيق بو كلمه­دن دوزه­ليب. ظلماتلارین ایچینده، ایشیغی گؤرونن شخص.

ائله آشيقليغيندا فلسفه­سي بودور. بيرده بير نفر آشيق آديني اوستونه قويورسا، گرك اؤزونه هدف سئچه. اؤزوندن سوروشا من نه­يه گؤره آشيق اولورام. هدفي اولمايان آشيق منجه بير آز دوز آشيق اولا بيلمز. آشيق ديلسيزلرين ديلي­دير. آشيق اولان ملتينين درديني دئيه­ر، سونرادا اونون درمانيني دئييب، ائلينه يول گؤسترر. يالنيز دردي دئمكله ايش دوزه­لمز، گرك يولونودا گؤستره.

بهرامي­يم دوشوم داغ داشي چاپيم

هر ديلدن آغيزدان بير مطلب قاپيم

عاقل اولسام گرك آختاريم تاپيم

چونكو هر معلولا بير علت گرك

چوخ ياخشي، بس سيز نه هدف ايله بو يولا گليبسينيز؟

منيم هدفيم كولتورومو قوروماق، ائليمه خدمت ائتمك و دينيمه و ديليمه حؤرمت قازانديرماقدير.

بيلديگيمز كيمي سيز يئني سؤزلردن چوخ قوللانيرسينيز و بوگونوموزه اويغون شعرلردن چوخ اوخويورسينيز، نيه بئله بير يولو سئچيبسينيز؟

انسان گرك زمان ايله قاباغا گئده. سؤزلريميز گرك يئني­لنه. بو يئني­لنمه هر شئيده اولوبدور. گرك آشيقليقدا و اوندا ايشله­نن سؤزلرده­ده اولا. بو سؤزومه مخالف اولانلارا دئييرم، اولار بيز ايندي تراكتورو قويوب، جوت ايشله­دك؟ البته اولماز.

آما بودا بئله اولمايا كي كئچميشيميزي و كئچميش اوستادلارين سؤز-صحبتلرين اونوداق. كئچميشه باخاق، ايره­ليه گئده­ك. گرك ائله ائدك، ياتاني داهادا يوخلاتماياق، آزدا اولموش اولسا بير آز ترپه­دك.

آشيق گرك ائل ايچينده نئجه دولانا، نئجه داورانا؟

آشيق تئز لكه گؤتورر. آشيق ائل ايچينده تانينميش بيريسي اولاراق، دائماً دئمك اولار هامي­نين نظري آلتدا اولار. بير دنه كيچيك خطاسي هامي­يا عيان اولار. بودا آشيقليغين ملت ايچينده سئويلديگينين نشانه­سي دير. نيه كي آشيغي اؤزوندن بيلير، اونا اهميت وئرير. آشيق گرك دوز اولا. گؤزو پاك اولا.

ييرمي-اوتوز ايل بوندان اؤنجه تويلاريميزين دئمك اولار بوتونو آشيقلار ايله اولوردو، آما ايندي بئله دگيل، اركستلر آشيقلارين يئرلريني توتدولار. سببي نه­دير؟

سببي تهاجم فرهنگي­دير. بونلاري ائل ايچينده يايانلار، بيزيم اصالتيميزي و فرهنگيميزي هدف توتوبلار. اصيل موسيقي­ميز داغيلتماق اوچون بو موسيقي­لر ياييلير. اؤز موسيقي­ميز آرادان گئتدي، ملتيميز آغاجدان قوپموش بير يارپاغا اوخشار. يئل هايانا اسسه اودا او طرفه گئديب، لاپ چوخور اولان يئرلره دوشه­جك. انسان اؤز كؤكوندن قوپسا، دا او هئچ نه­ييني قورويا بيلمز.

ائليمزين گرك آييق اولا، ياخچيني ياماندان سئچه و دوز يوللار چكيله. انسان اولان گرك اؤزو اؤز يولونو سئچه، هرنه دئديلر قولاق آسمايا، انسانين عاغلينا نه گليب.

دلي كؤنول صراف اولوب دونيادا

ياخشي­ني ياماندان سئچه­سن گرك.

بداصيلدن هرآن اوزاقلاشاسان

اصيلين سمتينه قاچاسان گرك.

بو حالدا كيمين اليندن بير ايش گلر، آشيقلار يوخسا ائليميز؟

ائليميزين اليندن هر نه ايش گلر. آشيق بير نفردير. آشيغين هم معنوي و همده مادي دستكه احتياجي وار. آشيق اؤزونو فدا ائديب، دونيا ماليندان هر نه دن كئچيب. آيري ايشه باخماييب. آشيغين نه حقوقو وار، نه گليري وار، نه ده بيمه و ... . بو دورومدا اونون اومودو ائليدير، ائليده اونو آتسا و توي-بايراملاردا مجلسلرينه آپارماسا اوندا نه اولار.

آشيقليق صنعتيني بونداندا ايره­­لي آپارماغا نه ائده بيلريك؟

گرك بيلگي­لريميز يوخاريا آپاراق. بير نفر بيلن انسان، اللي نفر بيلمه­يندن قاباقدير. اؤز كيمليگيمزدن ياپيشاق. هم سازي قاباغا آپاراق، همده سؤزو. سؤز ايندي بو دؤورده مجلسلرده چوخ تأثير قويور. سؤز كسني قيليج كسه بيلمز.

قوربان اولاق دوز يوللارا

آنا ديللي اوخوللارا

زهتابي تك اوغوللارا

گوجلو ياراد مجالی تورک

آشيقلارا نه سؤزونو اولا بيلر، يادينيزدا اولسا بير مجلسده ايديك، دده قورقوت داستانيني تعريفله­ييردينيز، چوخلو آشيقلاردا وارايدي، هامي سيزين سخندانليغينيزدان و بيلگيلي بيريسي اولمانيزدان مبهوت  و حيران قالميشدير، حتي او مجلسده اوستادلاريميزدان اولان آشيق علي قره­آغاجي سيزه خطاب دئدي، آشيق رضادا بيزيم دده قورقودوموزدور. يئني داستانلاري اؤيره­نمگه آشيقلاري دعوت ائديرسينيزمي؟

باياق دئديگيم كيمي، گرك زامانلا ايره لي گئده­ك. منده بونلاري گئجه ياتيب سحر اؤيره­نمه­ميشم، گئديب دده­قورقود كتابيني اوخويوب، او سؤزلري اويغون هاوالارا چكميشم. اينديده بو داستاني هامي بگنير. حتي گؤره سن بلكه قديم داستانلاردان بير تعدادين خوشو گلمه يه، آما من بو داستاني هارادا دئميشم بگنيبلر. حتي توركيه ده سئن اوسته من دده قورقوت داستانيني تعريفله ديم، قورتولاندان سونرا هامي منه طرف گلدي و بونو نئجه اؤيره­نديگيمي سوروشدو. آشيقلارادا دئييرم، دئمه­يين من اؤيره­نديم قورتولدو، انسان گرك هميشه اؤيره­نه و اؤيره­نمك داليسيجا اولا. بير-بيرلري ايله رقابت ائتسينلر.  هميشه اومودلو اولسونلار، انشاء الله گله­جكده ائليميز آشيقلارين قدريني بيلر.

كيملرين شعرلريني چوخ اوخويارسينيز؟

منه شاعر فرق ائتمز، هر شعركي گؤزل اولا، تأثيرلي اولا و محتواسي دوز اولا من اوخويارام. بيرده بير سؤز وار، دئييرلر اوره­كدن چيخان اوره­گه ياپيشار. گؤرورسن شاعر وار دئيير بئله ائتمه يين بئله ائدين آما اؤزو اؤز شعرينه عمل ائتمير. بئله شاعرلرين شعرلري اوخونولماييرلار و تاريخده قالماييرلار.

من اؤزوم اسماعيل بهرامي، سولدوز دگيرمانچي اوغلو، محرم پريزاد، اورخان، رشيد پورقبائيدن چوخ اوخويارام.

بيلديگيميز كيمي سيزين اؤز شعرلرينيزده وار، بس نيه اونلاردان اوخوماييرسينيز؟

بلي اؤز شعرلريمده وار. آما من دئديگيم كيمي سؤزه چوخ دگر وئريرم. هانسي سؤز چوخ گوجلو اولسا اونو سئچه­رم. اونا گؤره اؤز يازديغيم شعرلري هله ليك بگنمه­ديگيم اوچون، گوجلو شاعرلريميزين شعرلريني اوخويورام.

بعضي آشيقلار ائله نئچه قاطار سؤز اؤيره­نيرلر و هر يئرده اونلاري اوخويورلار، سيزجه بو دوزدومو؟

يوخ. هر يئرين بير سؤزو وار. آشيق گرك اوخودوغو يئري تانيا و دوشونه بو يئركي من اوخويورام هارادي؟ قهوه خانادير؟ توي­دور؟ رسمي و اداري يئردير؟ دانشگاهدير؟

آشيق گرك مختلف سؤزلر ايله مختلف طيفدن اولان انسانلاري آشيقيغا جذب ائده. جوانا جوان سؤزو، قوجايا قوجا سؤزو ،ساوادلي يا ساوادلي سؤزو ساوادسيزا ساوادسيز سؤزو اوخويا. آشيق گرك موقعيت شناس اولا.

هانسي ياريشمالاردا و يا فئستيواللارا قاتيليبسيزو مقام گتيريبسينيز؟

من دئمك اولار، ايراندا اولان آشيق فئستيواللارينين چوخونا چاليشميشام قاتيلام. آما 4 اوستان آراسيندا قورولان اورمو آشيقلار ياريشماسيندا ايكينجي يئري توتدوم.1390-دا قوشاچايدا اولان فئستيوالدادا اوچونچو اولدوم. ايراندا اولان مختلف جشنواره لره قاتيلميشام، بير دفعه ده توركيه آشيقلار بايرامينا گئديب اورادا اون ايكي گون مدتينده چيخيشلاريم اولوب.

آشيقليقدا بير دنه خوش خاطره بير دنه ده پيس خاطره لرينيزدن بويورون؟

گئتديگيم يئرلرين هاميسيندان خوش خاطره لريم وار. نيه كي ائليميز هاميسي منه احتراملا ياناشيب و حؤرمت قويوبلار. آما پيس خاطره م يزد شهرينده قورولان اوستانلار آراسي موسيقي فئسيتوالي ايدي. بو فئستيوالدا بيزيم حاقيميزي يئييب، لرستانين نماينده سينه وئرديلر، منده دوز گئتديم اوردا اگلشن خانه موسيقي نين رئيسي نين يانينا دئديم: آقاي كلهر اگر اطلاعاتين يوخدور بيل، سيز دئمك ايله دگيل، آذربايجانين موسيقيسي دونيادا تكدير. بونو هامي دئيير.

شاگردلرينيزدن بويورون، شاگردينيز وارمي؟

وار.آشيق وحيد ايرواني، قوشاچايدا آشيق رحيم عباديودند، منوچهر صبوري و نئچه نفرلر وار كي يئني اؤيره­نير. سولدوزدا آيري يئرلرين عكسينه بو صنعته گئتديكجه علاقه آرتير.

اينانيريق، بونون ندني سيز اولوبسينيز؟

يوخ، سولدوزون ملتي ائل دبلري و اؤز كولتورونه باغلي بيريسي ديرلر.

بو شاگردلرينيزه و يئني بو يولا قدم قويانلارا و بو صنعتدن اوزاق گزنلره نصيحتينيز نه اولا بيلر؟

مني بير كيچيك قارداش اؤزلرينه بيلسينلر. قارداش قارداشا اؤز اوره­ك سؤزونو دئيه­ر. دوز يولا چكر. بير سؤز دئييرم و بير سوال سوروشورام، انسانا آدامين اؤز آناسي ياخشي باخار يا آناليغي؟ البته كي آدامين اؤز آناسي. بس گلين اؤز آناميزين قدريني بيله­ك و بو ائلي، بو كولتورو و بو موسيقيني قوروياق. يوخسا آناليق آدامين باشينا هرنه اويون گتيرر.

ائللريم چيخارتسا اؤز گونشيني، اؤزگه گونش بيزه ايشيقليق وئره بيلمز. آما گونش اؤزوموزونكو اولسا ايشيغيدا اؤزوموزه وئره­جك.

دگرلي واختينيزي بيزيم اختياريميزا قويدوغونوزا گؤره سيزدن تشكر ائديرم. چوخ ساغ اولون.

سيزده ساغ اولون. رسمدیر آشیقلار مجلسین سونوندا بیر دستان هاواسی اوخویارلار. منده دانیشیغیمیزین سونوندا بیر دیکدابانی دستان سیزه و عزیز اوخوجولاریمیزا اوخویورام.

بو ایشینیزی ممنونیتله قارشیلاییریق، بویورون.

دیکدابانی دستان+ تیکلایین و ائندیرین= 3.6 مگابایت

 

دقت: بو سسین حجمینی آزالتماق اوچون، کیفیتینی آشاغی یا دوشوردوم، بیر آز کیفیتی دوشسه ده باغیشلارسینیز.

یاخشی حؤرمت ایله یاخشی آد ایله/ دولانمیشام آذربایجان ائلینی

یاخشی حؤرمت ایله یاخشی آد ایله/ دولانمیشام آذربایجان ائلینی

قوشاچایلی آشیق هدایت موسی اوغلو ایله دانیشیق.

دانیشیق آپاران: احمد اسدی

اورمو آشیق مکتبینی بوگون یاشادان اوچ اؤنملی شهر وار. بیری اورمو, بیری خوی, بیریسیده قوشاچای. بو شهرلر هم آشیقلارین سای باخیمیندان, همده اوردا اولان آشیقلارین اوستادلیقلاری ایله او بیری شهرلردن سئچیلیرلر. بو آرادا قوشاچای شهرینین آذربایجان آشیق مکتبینده اؤزونه مخصوص یئری وار. نیه کی بورادا اولان آشیقلارین چوخو ایکی آشیق مکتبینه عائددیلر و بعضی واختلاردا اوچ آشیق مکتبینه عائد اولان آشیقلاردا تاپیلیر. قوشاچای اورمو, هئشتری و تبریز-قره داغ آشیق محیطلرینین اورتاسیندا یئرلشدیگینه گؤره بو خصوصیته مالک اولوبدور. ایندی لیکده بو شهرین آشیقلارینین چوخو هم هئشتری آشیق هاوالارینی همده اورمو آشیق هاوالارینی ایفا ائدیرلر. اورمو آشیق مکتبینی نظره توستاق, بو شهرین بیر بؤیوک و اؤنملی اؤزللیگی وار. اورمو آشیق مکتبی­نین دئمک اولار, 70-80% گنج آشیقلاری بو شهرده یئرلشیر. ایندیلیکده بو شهرده نئچه نفرلر اورمو آشیق مکتبینی اؤیره­نمگه باشلاییب, اورمو آشیق مکتبینه بو سون ایللرده گلنلرین سای باخیمیندان آز اولماسینی نظره توتساق بو ایش چوخ اؤنملی و دگرلی بیر مسئله دیر. ان آزی اومودوموز وار، قوشاچایدا بو مکتبی یاشادان انسانلار اولاجاق. آما کئچه­ک دانیشیغیمیزا. بو دفعه آشیق هدایت موسی اوغلو آدی ایله مشهور اولان, هدایت مهری ایله گؤروشموشوک. آشیق هدایت 1336-جی ایلده قوشاچایین یاریجان کندینده آنادان اولوب. آتاسینین آدی آشیق موسی ایدی. آشیق موسی بیر زمانلار قوشاچایین ساییلان آشیقلاریندان ایمیش. ائله بونا گؤره­ده ایندی غربی آذربایجاندا اونو آشیق هدایت موسی اوغلو آدی ایله تانییرلار. آشیق هدایتین اوغلو داوودبگ­ده آشیقلیق صنعتینی اؤیره­نیب آشیق اولماق ایسته ییر. آشیق هدایت قوشاچایین اوستاد آشیقلارینداندیر. حتی جرأت ایله دئمک اولار, بلکه ده بیرینجی آشیغی دیر. آللاهدان اونا و عزیز اوغلونا جان ساغلیغی و صنعتینده باشاریلار دیله­یرکن سیزیده بو دانیشیغی اوخوماغا دعوت ائدیرم.

اوستاد بو مکتبه گلیشینیزدن دئیین، نه زماندان گلدینیز آشیقلیغا؟

آتام آشیق ایدی. ائویمیزده ساز اولدوغونا گؤره ائله اوشاقلیق ایللریندن ساز ایله تانیش ایدیم. دئیه بیلرم ائله عاغلیم کسندن بو صنعتی سئومیشم. قدیم اورمو رادیوسوندا رحمتلیک آشیق درویش و آشیق دهقان اوخویاردیلار. اونلاردا باعث اولدولار علاقه م چوخالا. 1353-جو ایلدنده رسمیتده آشیقلیغا باشلامیشام. اوگوندن بویانادا ائله آشیقلیق ائدیرم و ائلیمیزین خدمتینده یم.

آشیقلیقدا اوستادلارینیز کیملر اولوبلار؟

منیم آتام آشیق موسی ایدی. اوندان اؤیره نمیشم. سونرادا آشیق دهقاندان سازی اؤیره نمیشم. داستانلاریمیزدادا آشیق مختار گؤلمانخانالی، آشیق حسین اوزانلی، آشیق تیمور قوشاچایلیدان استفاده ائله میشم. آما اصلی اوستادیم، آشیق دهقان اولوبدور.

داستانلاردا اوستادینیز اوچ آشیق اولوب، دئیه بیلرسینیز بو آشیقلاردان ائشیتدیگینیز داستانلار نئچه دنه ایدی؟

من اؤزوم سینه دن و ازبردن 17 داستان بیلرم. آما اوستادلاردان ائشیتدیگیم داستانلار، 45 داستاندیر. بونلاری من بو اوستادلاردان ائشیدیب دفتریمده یازمیشام.

45 داستان اؤزو بؤیوک بیر مجموعه دیر، سیزجه بو قدر داستانین آنلامی نه دیر؟ نه یه یارانیب؟ بو داستانلار نه دئمک ایسته ییرلر؟

قوی سیزه خلاصه سینی دئییم، بیزیم بو داستانلار بیر فیلم کیمی دیر. ایندیکی فیلملرین نئجه نتیجه سی وار. بیزیم داستانلاریندا نتیجه سی وار. نتیجه سیده خالقیمیزا حقیقتی، معرفتی و اسلامی تبلیغ ائتمه دیر. حتی اونلارداکی، شوخ سؤزلر وار ایچینده اسلامیت و حقیقت آیدین گؤرونور. سونرادا مردلیک، نامردلیکدن دانیشیر. مثلا کوراوغلویا باخین، کوراوغلو خالقین ایچیندن باش وئرمیش بیر ایگیددیر. کوراغلو ظالملردن، ملتین حاققینی یئیه ندن، اؤز ملتینین حاققین آلیردی.

بونادا دقت ائده­ک داستانلاریمیزین بیر باشلانیشیندا آللاه آدی گلیر و بیر قورتولوشوندا آللاهی یاد ائدیرلر.

قوشاچای نئچه آشیق مکتبینین اورتاسیندا یئرلشیر،بویورون هانسی آشیق مکتبی قوشاچایدا واردی؟

بیزیم شهرده ایندی اوچ مکتب وار، اورمو آشیق مکتبی، تبریز-قره داغ آشیق مکتبی و بیرده قوشاچایین اؤز هاوالاری و مکتبی، بودا همان هئشتری مکتبی دیر. بیزیم قوشاچای ماحالینین هاوالاری هئشتری ایله بیردیر، یعنی ائله هئشتری ایله بیر ماحالیق.

شاگردلرینیز اولوبمو، واردی ایسه، آدلارینی بویورون؟

بیری اؤز اوغلوم داوود مهری دیر. سونرا عادل احمدی ،مرتضی جهانی و سهراب رشیدی. شاگردلریم یئنه ده وار، آما اصلی یولا دوشنی بونلاردیلار.

آشیق هاوالاریندان هانسی لاری چوخ سئویرسینیز؟

هاوالاریمیز خوشدورلار و هامیسی شیریندیر. قالیب او چالان آشیق او هاوانی نئجه ایفا ائده. بیری وار تاجری نی خوش چالیر. آدام اونون تاجریسینی سئویر، بیریده گؤروسن آیری هاوانی خوش چالیر، آدام اونون او هاواسینی سئویر. آما منیم نظریمه، تاجری هاواسی چوخ شیرین هاوادیر. بو تاجرینی چالان اولا، چوخ گؤزل اوخومالی و چالمالی هاوادیر. رحمتلیک درویشده بو هاوانی چوخ چالاردی.

قوشاچای آشیق محیطینه مخصوص آشیق داستانیمیزدا واردیمی؟

وار. حسین ایله خانبم داستانی وار. بو مخصوص بیزیم شهریندیر و تکجه قوشاچای آشیقلاری بیلر. بو داستانین ماجرالاری حاجی بهزاد کندینده اولور. حاجی بهزادکندی قوشاچای شهرینه چوخ یاخین بیر کنددیر.

ائشیتمیشدیک، بیر دنه ده کربلایی آدی گؤزل داستانی وار، اودا قوشاچای ماحالینا عایددیر، بئله دگیل می؟

بو داستانین احوالاتی ملک کندینین بایقوت کندینده اولوب و بیزیم ماحالین داستانی دیر، آما تبریز آشیقلاریدا بیلرلر.

چوخ کیملرین شعرلریندن اوخویارسینیز؟

من اؤزوم چوخ داستاندا اولان شعرلردن اوخویارام، آما یادیما دوشدوکجه علعسگردن، قاسمدان، دوللو مصطفادان، مسکیندن، دده کاتبدن، او تایلی شاعرلردنده بهمن وطن اوغلو، آزافلی میکاییل، اکبر جمیلدنده اوخویارام. اؤزومونده شعرلریم وار. هردنده اؤز شعرلریمدن اوخویارام.

شعرلرینیزدن نئچه سینی اوخویون؟

اول اویاق

دلی کؤنلوم آت باشیندان غملری

حقّین درگاهیندان سن دوشمه اوزاق

داده یئتیر یئرین- گؤیون لنگری

عارف اول غفلتدن آییل اول اویاق

*******

غملی کؤنول لری گولدورن آللاه

آغلایان گؤزلری سیلدیرن آللاه

عالمه بیرلیگین بیلدیرن آللاه

چکیلسین ظلمت لر گؤرونسون شافاق

*******

 سنه قوربان اولوم ذات پرقدرت

کرمیندن وئریب عالمه زینت

آشیق موسی اوغلویام آدیم هدایت

حقّین درگاهیندان ایسترم دایاق.

 

دگمز

باجارسان دوستلوغو مردایله ائیله

نامرد دولاندیریر یولونا دگمز

بیرگون داردا قالسان آتاجاق سنی

شاهاسیز تنبلین پولونا دگمز

***

ذاتیندان بارسیزدیر سؤیود بوتاسی

یولقون کؤلگه سینین اولماز صفاسی

نامردین ایلقاری عهدی وفاسی

یووشان سوپورگه نین کولونا دگمز

***

نامرد ایله گزمه جنت باغیندا

زهردن آجی بیل بال قایماغیندا

مخمر دؤشکلری آغ اوتاغیندا

مردلر ایوانیندا چولونا دگمز

***

موسااوغلو سؤزلرین نصیحتی وار

بیلنه یازمیشام قالسین یادگار

مردین ارزشی لعله برابر

نامرد قزیلین قیلینا دگمز

 

 

کؤنول دور-دولان باشینا

کؤنلو- گؤزو توخ انسانین

حقیقتده لیاقتده

معرفتی چوخ انسانین

***

نامرد نانین یئمک اولماز

هر نانا نان دئمک اولماز

هر سؤزه جان دئمک اولماز

سؤزو واردی اوخ انسانین

***

دیل وار دردین درمانیدی

دیل وار باشین سلطانیدی

دیل وار قتلین فرمانی دیر

فرقینه بیر باخ انسانین

***

اسلام دینین حق گؤرموشم

دوشمنلرین یوخ گؤرموشم

موسااوغلویام چوخ گؤرموشم

اعتباری یوخ انسانین

قوشاچایین قدیم و اسکی آشیقلاریندان هانسی لاری خاطرلاییرسینیز؟

آشیق عباس بیگی وار ایدی، تزه وفات ائدیب.آشیق حسن قاشیقچیلی،آشیق عوض وار ایدی. آشیق تیمور واردی کی، ایندی قالیر آما چوخ قوجالیب. آشیق نوروز وارایدی. آللاه بو صنعتده زحمت چکیب گئدنلرین هامسینا رحمت ائیله سین، هره­سی اؤز یئرینده زحمت چکیب عؤمورلرینی بو یولدا قویوبلار.

40 ایله یاخین آشیقلیق ائدیبسینیز، آشیقلیغی نه ده گؤردونوز؟ بو مکتب نه یه گؤره یارانیبدیر؟

من اؤزوم چوخ ساز چالماغا گؤره آشیق اولمامیشام. من بو مکتبین عرفانینا گؤره آشیق اولموشام. من اؤزومو تانیاندان اؤزومه وظیفه بیلمیشم، میدانا گیریب بو مکتبه خدمت ائیله یم. آشیق اولان، آللاه یانیندا باش اوجا اولار. ائلینه شادلیق وئرمگه گؤره، ثواب ایش گؤرر. بیرده کئچمیش سؤزلری سینه دن سینه یه، کئچمیشدن بوگونه، گتیریب چاتدیرماقدا یوردوموزا و ائلیمیزه بؤیوک خدمتدیر. من سؤزلره- صحبتلره عاشق اولموشام، چوخودا ساز چالماق دگیل.

قدیملردن دئیین، قدیم تویلار نئجه اولاردی؟ بوگون نئجه دیر؟

قدیم تویلار اوچ گون ایدی. بیرگون دم دئیه ردیلر، بیرگون خینا توتما، بیرگونده بؤیوک توی. بؤیوک تویدا گلین چیخارداردیلار. آشیقدا اوچ گون توی ائوینه قوناق اولاردی. آشیقلاردا داستانلاردان دئیه ردیلر. آما ایندی تویلار بیرگون اولوب. او بیرگونوده، تاپشیریرلار، ارکسته. بودا بیزیم فرهنگیمیزه بؤیوک ضربه لر وورور.  ایندی قوشاچایدا آشیق تویو چوخ آزالیب. آما هئشتری ماحاللاریندا، داهادا یاخشی لاشیب. تویلارین چوخو آشیق ایله کئچیریلیر. قاباقکیلارداندا نظملی و عظمتلی اولور. ائله قدیمکیلره تایدا اوچ گون یئرینده دیر. هئشتریده تویلارا ارکست آپارمازلار.

شاگردلرینیزه و گنج آشیقلارا نصیحتینیز نه اولا بیلر؟

من همیشه رحمتلیک بؤیوک اوستادیمیز آشیق علعسگرین سؤزونو دئیه رم،

یاخشی حؤرمت ایله یاخشی آد ایله

دولانمیشام آذربایجان ائلینی

پیره آتا دئدیم جوانا قارداش

آنا=باجی بیلدیم قیزی گلینی

***

هرکس بو دونیانی فانی بیلمه سه

هم ثوابی هم احسانی بیلمه سه

ناموسو گؤزله ییب نانی بیلمه سه

علی ذوالفقاری قیرسین بئلینی

***

آدیم علعسگردیر، کمتر بیر قول

ناقابل سؤزلری ائتمه رم قبول

بنده خدایم امت رسول

دوست توتموشام شاه مردان علی­نی

بو جور سؤزلری دئیه رم، گرک آشیق حقیقتدن معرفتدن اوخویا. آیری موسیقی لره باخماسینلار. آشیق ائلی یولدان چیخارتماز. باخسینلار، آشیق علعسگر، خسته قاسم نه لر دئییبلر. آشیق درویش کیمی اولسونلار. آشیق درویش و کئچمیش اوستادلار  نه لردن اوخویوب، اونلارین یوللارینی توتسونلار. بیرده تزه بو یولا گیرن آشیقلار گرک، ساوادلاری ایله، بو صنعتی قاباغا آپارالار. هاوالارا تزه گوللر اضافه ائتمکله و یا یئنی هاوالار دوزلتمکله بو صنعتی داهادا گؤزللشدیره لر.

اوچ نفر اوستادلاردان آدلارینی چکدینیز، بونلاردان آشیق درویشی گؤروبسینیز، شاگردلرینیزه تاپشیردینیز درویشه تای اولالار. آشیق درویش نه ائتمیشدی؟

هرکس بو اوستادین مجلسینده اوتورسا ایدی، لذت آپاراردی. هم سازیندان هم سؤزوندن، همده سخندانلیغیندان. چوخ شیرین دانیشاردی. مجلسده دانیشسا ایدی، هامی دوروب اونا قولاق آساردی. نصیحتده، معرفتده، داستانلاردا کامل اوستاد ایدی.

بیزیم ایستگیمیزی یئرینه یئتیریب, بو دانیشیغا قاتیلدیغینیز اوچون, درین تشکرومو بیلدیریره­م. چوخ ساغ اولون.

سیزده ساغ اولون.

 

 

.

 

 

ائلیمیزین گنج استعدادی ، آشیق مجید عنبری ایله دانیشیق.

ائلیمیزین گنج استعدادی ، آشیق مجید عنبری ایله دانیشیق.

 دانیشیق آپاران: احمد اسدی

آشیق ادبیاتی و موسیقی­سینین دگرلی هوسکارلاری، بو دفعه­کی، دانیشیغیمیز سالماس شهرینده یاشایان، عزيز دوستوم و محترم يولداشيم آشیق مجید عنبری ایله اولوبدور. سالماس شهرینین گنج آشیغی مجید عنبری 1362-جی ایلده بو شهرده آنادان اولوب. اونون آشیقلیغا علاقه سی اوشاق ایکن باشلاییب. آشیق مجیدین گنج اولماسینا باخمایاراق، اورمو آشیق مکتبینین هاوالارینی اوستاجاسینا ایفا ائدیر. هاوالاردا اولان مهارتی، اونون گله جکده بیر اوستاد آشیق کیمی تانینماسینا ندن اولاجاق. آشیق مجید هاوالاری اصولی و گؤزل چالیر، همده گؤزل اوخویور. او همده یئنی لیکلر دالیسیجادیر. بو دگرلی آشیغیمیزا جان ساغلاغی و اوزون عؤمور دیلرکن، آرزو ائدیریک، ائلیمیزده اونون کیمی گنجلر چوخ اولوب، اؤز کیملیکلرینی قورومادا چالیشالار. سیزی آشیق مجید ایله آپاردیغیمیز دانیشغی اوخوماغا دعوت ائدیرم.

 

دانیشیغی و شکیللری ادامه مطلب بؤلومونده باخا بیلرسینیز.....

ادامه نوشته

بو صنعت بیزیم وارلیغیمیزدیر، گرک قویمایاق آرادان گئده

بو صنعت بیزیم وارلیغیمیزدیر، گرک قویمایاق آرادان گئده

آشیق بولود ساعد ایله دانیشیق/ دانیشیق آپاران: احمد اسدی

 

اشاره: گنج آشیقلار بلوقونون دگرلی اوخوجولاری، بو دفعه گئدیب آشیق بولود ساعد ایله دانیشیق آپارمیشیق. آشیق بولود، اورمونون آدلیم آشیقلارینداندیر. او هم گؤزل یوردوموزدا، همده یوردوموزدان ائشیکده خارجی اؤلکه­لرده­ده تانینمیش بیریسی­دیر. آشیق بولود 1338-جی ایلده ملکندینین(ملکان) باباکلک کندینده دونیایا گؤز آچیب. 6-7 یاشی اولدوغو واختلاردا عائله­سی ایله بیرلیکده اورمویا کؤچور و بو شهرده قالارگی اولور. آشیق بولودون اوغلودا آشیقدیر و اورمو بؤلگه­سینده آشیق فورماسیندا فرقلی چیخیشلاری ایله تانینیر. آللاهدان آشیق بولود ساعد و اونون خلف اوغلو سایین عسگر ساعده باشاریلار دیلرکن، دانیشیغیمیزی اوخوماغا دعوت ائدیرم.

دانیشیغی و شکیللری ادامه مطلب بؤلومونده باخا بیلرسینیز...

ادامه نوشته

جانسيز ، جانلي لاردان خوش دانيشير.

جانسيز ، جانلي لاردان خوش دانيشير.

(آشیق سازی نئجه جانلانیر؟/ سازبند آشیق میرخلیل میرزینالی ایله دانیشیق)

دانیشیق آپاران: احمد اسدی

اشاره: شفاهی خالق ادبیاتیمیزین جارچیلاری اولان آشیقلار اوزون ایللر بویو چالیب، اوخویوب یازیب یاراتمیشلار. بلوقوموزدا یئری گلدیکجه آشیقلاریمیزلا دانیشیق آپاریب اونلاری تانیتدیرمیشیق. آنجاق آشیق ادبیاتیمیزا قوللوق ائدنلردن بیر قولودا سازبندلر اولوبلار. بو سئری دانیشیغیمیز اورمودا فعالیت گؤسترن سازبندآشیق میرخلیل میرزینالی جنابلاری ایله اولوبدور. میر خلیل میر زینالی 1354-جو ایلده خویون سیدتاج الدین کندینده آنادان اولوب، 6-7 یاشلاریندان خویا کؤچوب.سونرالاردا اورمویا کؤچرک، بو شهرین ساکنی اولور. نظرینیزی بو سیخ و صمیمی دانیشیغا چکیریک.

شکیللری و دانیشیغی ادامه مطلب بؤلومونده گؤره بیلرسینیز.

 

ادامه نوشته

نسلی آز آفتاب آشیق موسیقی سی فئستیوالینین بیرینجی سی، ایله دانیشیق

اشاره: کئچن گونلرده «نسلی از آفتاب» فئستیوالینین بیرینجی لری تانیناراق قورتولوش مراسمینده، اؤدوللرینی آلدیلار. بو فئستیوال ویاریشما مختلف بؤلوملرده قورولموشدور و مختلف اختصاصلاردا اولان صنعتکارلار، بو یاریشمایا قاتیلمیشدیلار. بو فئستیوالین آشیق موسیقی سینین اورمو مکتبی بؤلومونده ، آشیق نباتعلی علیزاده بیرینجی اولدو. بونا گؤره ده اونونلا بیر دانیشیق، آپارمیشیق. سیزی بو دانیشیغی اوخوماغا، دعوت ائدیریک.

ادامه نوشته

طنز و ساتيرا شاعري، علي شجاع جنابلاري ايله دانيشيق/

 

طنز و ساتيرا شاعري، علي شجاع جنابلاري ايله دانيشيق

دانيشيغي آپاران: احمد اسدي

 اشاره : علي شجاع شهريميزين دگرلي و سابقه­لي شاعرلريندن ساييلير. شجاع مختلف موضوعلاردا و قالبلرده شعر يازسا دا ايندي شهريميزين شاعرلري و اوخوجولار اونو بير طنز و ساتيرا شاعري كيمي تاني­ييرلار. شجاع طنزده اؤزونه مخصوص سبك و اوسلوب صاحبيدير. آشاغيدا اونونلا آپارديغيميز دانيشيغي تقديم ائديريك.

ادامه نوشته

اوستاد آشیق یوسف اوحانئس ایله مصاحبه/دانیشیق آپاران: احمد اسدی

اوستاد آشیق یوسف اوحانئس ایله مصاحبه/دانیشیق آپاران: احمد اسدی

گنج آشیقلارین سایین اوخوجولاری بو دفعه اورمو شهرینین آغ ساققال و قوجامان آشیغی، ها بئله اورمو آشیق مکتبی­نین اوستادلاریندان اولان آشیق یوسف اوحانئس ایله مصاحبه ائتمیشیک. آشیق یوسف ایللر بویودور، بو مکتبده چالیشیبدیر. او بیر مسیحی آشیق اولاراق، همیشه مولاسی علی­دن یاد ائدیب و هاوالارینین چوخوندادا پیغمبردن و علی­دن اوخویور. اونو تانیمایان اولماسا، آشیغین بیر مسلمان شخص  اولدوغونو دوشونر. تاریخ بویو اورمو آشیق مکتبینده مسیحی آشیقلار و شاعرلر اولوب، او جمله­­دن قول هارطون، خویلو وارطان، آشیق یعقوب و ... آدینی چکمک اولار. آما بونلارین سونونجو قالیقلاری و نشانه لریندن اوستاد آشیق یوسف اوحانئس دیر.آشیق، تورکجه و آسوریجه نی گؤزل دانیشارکن، کوردجه و فارسجانیدا بیلیر. او همده بیر ایل بغداد و ایکی  ایل کویتده یاشاماغینا گؤره عربجه ایله ده تانیش دیر و دانیشا بیلر. اورمو مسیحی لرینین اصلیتی تورکدور، آما قاجار دورونده آمریکالی و آوروپالی مسیونرلر و کشیشلرینین الی ایله دیللری چؤنوب.( دوکتور آیریملونون دئدیکلرینه اساسلاناراق). آشیغیمیزین آتاسینین آسوری دیلینین بیلمه مه سیده بونا بیر دلیل اولا بیلر. بو سببدنده مسیحی لر ایچینده ده آشیقلار اولوبلار.  اوستادیمیزین 85 یاشی اولماسینا باخمایاراق، هله­ده گؤزل اوخویور و هله­ده گنج اوره­گی بو مکتبین عشقینه دؤیونور. آللاهدان عزیز اوستادا جان ساغلیغی دیله­یرکن، سیزی دانیشیغیمیزی اوخوماغا دعوت ائدیریک.

ادامه نوشته

آشیق میکاییل سلیمانی ایله مصاحبه/ دانیشیق آپاران: احمد اسدی

آشیق میکاییل سلیمانی ایله مصاحبه/ دانیشیق آپاران: احمد اسدی

عزیز اوخوجولاریمیز،  بو یازینی یازماغا گؤره یولا دوشوب، 9/1/1391 تاریخینده قوشاچایین گؤل کندینه گئدیب ، قوجامان و آغ ساققال آشیغیمیز اوستاد میکاییل سلیمانی ایله گؤروشموشوک. گؤل کندی قوشاچایین گونئیینده یئرلشیر و بو شهردن 15 کیلومتر آرالی­دیر. ائشیتمیشدیک اوستادیمیز بیر آز خسته احوالدیر، بونا گؤره اونونلا گؤروشمگی اؤزوموزه بورج بیله­رک، گؤروشونه گئتدیک. گؤل کندینه یئتدیگیمیزده ، آشیغی شهره دوکتورا آپارمیشدیلار، بونا گؤره آشیغین اوغلونا زنگ آچیب و آشیغین حالیندان نگران اولدوغوموزا گؤره، اوندان آشیغی سوردوق. حالینین یاخشی اولدوغونو ائشیتدیگیمیزده سئوینه­رک، کندده اونون یولونو گؤزله­دیک. نهایت آشیق میکاییل گلیب، چاتدی. اوستادیمیزلا، گؤروشدوگوموزدن سونرا اونونلا صمیمی بیر دانیشیق آپاردیق. اوستادیمیزین تزه دوکتوردن گلمه­سینه باخمایاراق، بیزی ایستی و سئوگی دولو قوجاقلا قارشیلاماسی بیزه بیر قوناق پرورلیک درسی اولدو. اوستادیمیزا جان ساغلیغی آرزیلایاراق، سیزی دانیشیغیمیزی اوخومایا دعوت ائدیرم.

ادامه نوشته

اورمولو شاعر، سایین بهزادنیا جنابلاری ایله مصاحبه

اورمولو شاعر، سایین بهزادنیا جنابلاری ایله مصاحبه/ دانیشیق آپاران: احمد اسدی

اشاره:

اورمو شهرینین، آغ ساققال شاعری سایین بهزادنیا جنابلاری ایللر بویودور، آشیقلار ایله گئت-گلی اولوب. بهزادنیا جنابلاری 50 ایلدن چوخدور، آشیق محیطینده و آشیقلار ایچینده یاشاییبدیر و ائله بو عامله گؤره آشیقلارین سؤز دریاسینا اودا وصلدیر. شاعر بهزادنیا اورمو آشیقلاری ایچینده سئویلن بیر شخصدیر و اورمو ادبیات سئورلریده اونو بیر باش آشاغی و آلچاق کؤنوللو انسان کیمی تانییرلار و اونو تانیان هر کیمسه، اونون اؤزونه مخصوص اولان متانتینه و خوش رفتارینا گؤره، مطلق سئومه لی اولورلار. بیزده گئدیب بو آغ ساققال شاعریمیزله گؤروشموشوک و گؤروشوموزون سیراسیندا بیر مصاحبه ائتمیشیک. سیزی بو مصاحبه نی اوخوماغا دعوت ائدیریک.

ادامه نوشته

بیز بو ائلین آشیغی­ییق/ آشیق حمید عباس­زاده ایله مصاحبه

بیز بو ائلین آشیغی­ییق/ آشیق حمید عباس­زاده ایله مصاحبه

دانیشیق آپاران: احمد اسدی

آشاغیدا اوخودوغونوز دانیشیق، آشیق حمید ایله آپاردیغیم مصاحبه­دیر. آشیق حمید چوخ مهربان و اینجه اوره­کلی بیر انساندیر. او چوخ باش آشاغی و متواضعدیر. ائشیتمیشدیم اوستادیمیزین مختصر کسالتی وار، بونا گؤره ده 20/12/1390 تاریخینده اوستادیمیزین ائوینه گئدیب و اوستادلا گؤروشمگی اؤزومه بورج بیلدیم.  آشیق حمیدی سیز عزیز دوستلاریمادا تانیتدیرماق اوچون، بو آشاغیداکی دانیشیغی آپاردیم. سیزی بو دانیشیغی اوخوماغا دعوت ائدیرم.

اوستاد اؤزونوزو تانيتديرين، لطفاً؟

من آشيق حميد عباسزاده، 1329-جو ايلده قوشا بولاق كندينده دونيايا گلميشم. البته شناسنامه­ده آديم جبراييلدي، آما هامي مني حميد چاغيرار. قوشا بولاق كندي چالديران، قره ضياءالدين و ماكينين آراسيندا يئرلشير. بيزيم كند بايازيد ماحاليندادير. 10 ياشيما كيمي اورادايديم. ارباب ايله داعواميز چيخديغينا گؤره، 10 ياشيمدا آغ بولاق كندينه كؤچدوك، داييلاريمين يانينا. چون اونلارين سؤزلري او ماحالدا كئچيردي. 20 ايل ده قوشابولاقدا ياشاديق. 30 ياشيم وار ايدي اورميه­يه گلديك.

قديملردن تعريفله­يين، قديم لر ايله اينديني مقايسه ائدين؟

قديم بيزيم كندده هئچ زاديميز يوخ ايدي. ائله بير اينك، بير اؤكوز، ايكي كئچي، بير ده قويون. آما هئچ نه­يين غمين ائله­مزديك. گونوموز خوش، كؤنلوموز شاد ايدي. آما ايندي آللاها شوكور هر نه­ييميز واردي، بير بئله امكانات ايله، او گونلرين خوشلوغونون حسرتينده­يم. قديملر احترام وارايدي، آشيغا احترام قويارديلار. جوانلار آشيغي گؤرنده ال-آياقلارين ييغارديلار. آشيق رئيس پاسگاه حؤكمونده­ايدي. آما ايندي دا اوّلكي احترام آرادان گئديب.

سيز ساز اوسته، بير سئري سكته ائديبسينيز، دوغرودورمو؟

بلي، دوزدور. من انقلابين اوللرينده، 8 ايل مدتينده سازدان اوزاق قالديم. منيم عادتيمدير، گرك گونده چالام، حتي ياتماميشدان قاباق، من بير-ايكي هاوا چاليب سونرا ياتارام. بو ساز منيم غمخواريمدير. فقط محرم آييندا چالمارام. او زامانلار، درديمي سازا دئيه بيلمه­ييرديم. ائله سازين غمي، منه زور گلدي و سكته ائله­ديم. بير ايل مدتينده اؤزومو بيلمه­ديم، ياتاقدا قالديم. سونرالار، بالا-بالا آياغا دورا بيلديم. نئجه دئميشلر، اؤلمه­ينه اؤلوم يوخدور. آللاهين ايشيدير.

آشيقليق سيزين عايله­ده ارثي بير مسأله­دير، سيزين آتا-بابالارينيز دا آشيق اولوبلار، اونلاري بير يادا سالين، كيم ايديلر؟

منيم اؤز آتام آشيق مجيد ايدي. آتامين آتاسي آشيق اوجاق­قولو ايدي، اونون دا آتاسي آشيق همت ايدي. آشيق همت، شعر ده دئيه­ردي. منيم آتام 1380-دا دونياسيني دگيشدي. آتامين 4 ياشي اولاندا ، آتاسيني الدن وئرميشدي، يعني 1300-جو ايلده. آشيق همت ده تقريباً 120 الي 150 ايل بوندان قاباق وفات ائديبدير. آما سازي هله ­ده وار، هله­ ده قالير.

آشيق همتين شعرلريندن خاطريزده اولسا دئيين؟

ذهنيمده يوخدو. دفترلريمين آراسيندا وار. ذهنيم يئتيرديگي قدر قوي دئييم. ایرادلیدا اولسا دا باغیشلارسینیز. ذهنیمده بو قدر قالیب.

خاليق ايله ايسته­سن دوز اولاسان

كنديني پاك ائيله اماميني تاپ

بهشت گول قصرده اوردا قالاسان

فقيره رحم ائله بير كعبه­ني ياپ

***

آل دستماز، توت اوروجو، قيل نماز

قوچ قورباندير، يئددي دعا گول نياز

علي حقدير، اون بير اولاد، بير ده ياز

پيغمبر يانيندا اول حاضر جواب

***

همت دئيه­ر زلال اولوب اريننم

شريعتين هر گولونه بوروننم

او مولانين قدمينه سوروننم

يوخدو غير از اوندان بيزلره صاحاب

                        يا صاحب كتاب

ياديمدا يوخدو، آما بونو دا قوي دئييم:

وارانماديم باشا، يئتيش اوستادا

ناغافلدان سؤزو دئمه بير به بير

آليجي قوش تك، وورما لاچين هاوايا

يولورلار، قاناديني دوشور بير به بير

***

وارانماديم آشيقليغين كانينا

يوز ييرمي دؤرد پيغمبرين سانينا

يازيليبدير مسلمانين شأنينه

اون ايكي امامين آدي بير به بير

***

دؤردطرفه اونون قاپيسي باخار

آياغينا گئدن دؤشه­نيب قالخار

ايچينده مزارا حقدن نور ياغار

عالم بورويوب، قيزيل جام بير به بير

***

همت دئيه­ر سؤزون سؤيله مردانا

يولون دوز توت يئتيش دينه- اركانا

بو دونيا فانيدير، قالماز انسانا

وارليسي، يوخسولو كؤچر بير به بير

سيز نئج اولدو آشيق اولدونوز؟

منيم آتا-بابام آشيق اولدوغونا گؤره، آشيق محيطينده بؤيوموشدوم. ياديمدادير، 4-5 ياشيم وار ايدي، آتام ساز چالاردي، منه گتيريب، بير ساز وئريب، دئيه­ردي گل سن ده چال. من ائله او ساز ايله بويا-باشا يئتيشميشم.

آشيقلار گرك نئجه اولالار؟

آشيقليق اؤزو بير آيري عالمدير. آشيق اولان گرك، اؤز احتراميني ائل ايچينده ساخلايا. آشيق اولان، گرك رحمتليك درويش كيمي اولا. ادب، معرفت، اركان هر نه بو كيشي­ده وار ايدي. لياقتلي بير انسان ايدي.

آشيق درويش نه ائتميشدي؟

هئچ كسه آجي سؤز دئمزدي. هئچ كس ايله آتيشمازدي، توققوشمازدي. هامييا احترام قوياردي، حتي اؤزوندن چوخ كيچيك اولانلارا دا. هاميدان چوخ سؤز-صحبت بيلردي، آما بير دفعه ­ده دئمه­دي من چوخ بيليرم. مثلاً مجلسده بير ضعيف آشيق اوخوسايدي، هئچ واخت اوخومازدي و بهانه گتيرردي. دئيه­ردي، من اوخوسام، بيردن ملت مني تعرفلر و او بوردا خجالت اولار. هئچ واخت پولا گؤره چاليب، اوخومازدي.

آشيق درويشي تورپاغا تاپشيراندا دئييرلر، سيز اوخودوز، دوزدورمو؟

دوزدور. او لحظه من آشيق درويشين باجيسيني گؤروردوم كي، باياتي دئيه دئيه آغلاييردي. من ده چوخ ناراحات ايديم. دا اؤزومو ساخلايا بيلمه­ديم، اوره­گيم پاتلاييردي، بهمني هاواسي ايله نيسگيللي –نيسگيللي بو سؤزلري اوخودوم، من اوخوياندان سونرا، هامي باشلادي آغلاماغا.

داد ائيلرم بو فلگين اليندن

آشيقلارين قهرماني گئديبدير

هئچ كس ايله باشا وارمايان دونيا

شيرين لهجه اوستا درويش گئديبدير

***

ياسيندا من گؤردوم دؤرد دنه اوغلان

سؤزلرين اولوبدور ائللرده دستان

دانيشاندا دئردي گؤزلره قوربان

شيرين لهجه اوستا درويش گئديبدير

***

اؤزوندن كيچيگه دئيه­ردي بلي

اسمعلي­دير، شاگردلرين اوّلي

نغمه دئدي آشيق حميد ماكيلي

آشيقلارين قهرماني گئديبدير.

قديملر تويلار نئجه اولاردي؟ آشيقلاري تويلارا نئجه دعوت ائدرديلر ؟

او زامانلار، تويا ايكي گون قالان، گئديب، آشيق ايله بؤيوك توي گؤررديلر. مجلسده آشيق اولاردي، كوچه­ده ­ده بؤيوك توي چالاردي. تويلار دا 3 گون اولاردي. 2 گونون توي صاحبي يئمك وئرردي. بير گونون ده اوزاق يئرلردن گلن­لر، قونشولارا قوناق اولارديلار. آشيقلار دا آخشام اوستو ايكي ساعات چالاردي. سونرا ياتارديلار. سحر ناهاردان قاباق، آشيق يئنه ايكي ساعات چاليب، اوخوياردي. بير بگ چؤرگي وئررديلر، بير ده باش قيرخما چؤرگي. هر ايكيسينده ­ده پول سالارديلار. باش قيرخما دا بئله ايدي، بگي اوتوردارديلار، سلماني ­ده گليب، اونون باشيندان يالاندان نئچه توك قوپارداردي(چون قاباقجا قيرخميشديلار)، قوپارتماميشدان قاباق، نئچه دنه گولمه­لي سؤز دئييب، مجلسي گولدورردي و ملتدن سوروشاردي قوپارديم يا يوخ؟. سونرا ياساووللار گليب، بگي مجلسه گتيررديلر. گتيرمه­ميشدن، گليب آغ ساققاللاردان اجازه ايسترديلر. دئيه­رديلر، اجازه واردي، بگ مجلسه گله. آغ ساققاللار دا دئيه­رديلر، اجازه بگ ايله­دير، گلسين. آشيق مجلسده اولدوغونا گؤره، بؤيوك تويون سسي گرك مجلسه گلمه­يه­يدي. سونرا گئديب، كوچه­ده بؤيوك توي ايله اوينارديلار و ياللي گئدرديلر. آما ايندي ائله اولوب، هله بو ارگلارين سسي ايچري گلمكدن علاوه، آشيغي مجلسدن ائشيگه اؤتورورلر. بو تزه جوان موسيقيچيلر دئييرلر، يا آشيق گتيرين يا دا بيزي. آشيق اولان يئره بيز گئتمريك. هله اوندان دا علاوه، گليب، مجلسين لاپ باشيندا تشكيلاتلارين قورورلار. او يئرده كي ، آغ ساققاللار گرك اوتورا. آغ ساققاللار دا قاپي آغزيندا اوتورورلار. سونرا دا جوانلار قوجالاري زور ايله چكيب اويناديرلار.  احترام قالماييب. دا آشيقليق گئتدي، شاعرين، آشيغين زحمتي بو ائلده باتدي. كيچيك كي بؤيوگو اويناتدي، دا بئله اولار. ايندي ناي ناي زاماني­دير.

قديملر تويلار دا  بؤيوك آتلار اولاردي. اوزاق كندلردن گلين گلنده، بؤيوك آتلاري صفه دوزرديلر. يا آللاه دئيه­نده، آتلاري قووارديلار، تا قيز ائوينه چاتالار.  بيرينجي اولان، آتين بوينونا شال باغلارديلار و او مراسمه بؤيوك گلدي دئيه­رديلر، يعني گلين آتاسي ائويندن چيخدي. بيرينجي آت قاباغا دوشوب گلردي. او بيري آتچيلار دا ديل آلتدا يامان دئيه-دئيه اونون داليسيجا گئدرديلر. بيزيم كندده 25-30 آتلي وار ايدي.

ياساووللاردان دئيين؟

ياساووللار، همن ساغدوش، سولدوش ايديلر. يعني بگين محافظي ايديلر. چومباقلاري اولاردي. هر كيم بگه بير سؤز دئسه­يدي. گئدرديلر، اونو دؤيمگه. آما منيم اؤز تويومدا، چومباقچيلاريم، مني قوروماق عوضينه شوخلوق اوچون سامانليغين ايچينه آتديلار.

تويلاردادا بگه گتيريب، بير پالتو، بير دنه ­ده لبه­دار بؤركو قويارديلار و دئيه­رديلر، دا سن كيشي اولدون. منيم اؤزومه بير لبه­دار گتيرديلر، هئچ ده ياراشميردي!!!

آشيق داستانلاريني دا يادا سالين، نه دئيه­ بيلرسينيز؟

قديملر تويلاردا، آشيقلار داستان دئيه­ردي. تعريف چوخ آز اوخويارديلار. ائله تويلار اولاردي بير كندده، داستان ياريمچيليق قالاردي، آيري تويدا اونو قالانيني دئيه­رديك.

ايندي دئيه­لر، نئچه هاوا چالين، هانسيلاري سئچيب، چالارسينيز ؟

هاوالار هاميسي خوشدور. آما اول باشدا، ديوان تجنيس اوخويارام. سونرا دا پناهي، نارنجي(ماكيدا كسمه كرمي دئيه­رلر)، وطن امراهيسي(اورمودا خوي امراهيسي دئييلير، تبريزده ده قره­چي هاواسي آدلانير).

مازندراني هاواسي نه­دير؟ آچيقلايا بيلرسينيز؟

مازندراني منيم ساز اوستونه گتيرديگيم بير موسيقيدير. من 1349-جو ايلده مازندراندا عسگر ايديم. و اورانين ايكي دنه محلي هاواسيندان، الهام آلاراق، آشيق سازينا گتيرديم و نئچه سئري تويلاردا و مجلسلرده چالديم و آشيقلار ايچينده آدي مازندراني هاواسي قالدي.

سيز دوداق دگر اوخويارسينيز و بيلديگيميزه گؤره ايندي يالنيز ايكي نفر بئله اوخويا بيليرلر، بيري سيز، بيري ده آشيق عباس داش خاتين. بونا گؤره نه دئيه بيلرسينيز؟ اصلاً بو دوداق دگر نه­دير؟

دوزدور، فقط بيز ايكيميز اوخويا بيلريك. بونون دا ماجراسي بودوركي، بيز اوخويان هر كلمه­يه بير  و يا ايكي دنه ب حرفي اضافه­له­ديريك. ائشيدنده ائله بيلير هاميسي ببببببب­دير. و هئچ زاد باشا دوشمور. او زرگري ديل واردي ها، بو دا بببب ديلدير!!! مثلا شيروان---- شيبيبيروان   شكي---- شبيبيكي. بئله ها. دوداق دگر آدين دا اورمودا آشيقلار قويدولار، يوخسا بو آد يوخ ايدي.

قديم آشيقلاردان كيملري گؤروبسونوز؟

من آتامدان علاوه آشيق صفرعلينين يانينا گئتميشديم و اوستاديم آشيق صفرعلي ايدي. 32 ايلدير اؤلوبدور. سونرا دا ماكيدا آشيق نصير تقي­زاده وار ايدي. آشيق نصير منه چوخ سؤز اؤيره­تدي. رحمتليك هئچ كسه سؤز اؤيره­تمزدي. آما منه دئدي، چون منيم اوستاديمين اوستادي، يعني آشيق حسينين اوستادي، آشيق اوجاق قولو يعني سنين بابان اولوب، اونا گؤره سنه اؤيره­درم. آشيق يوسف وار ايدي، اينجه كنديندن ايدي. چوخ گؤزل اوخوياردي، آما تئز اؤلدو. قالسايدي ايندي اوندان اوستاديميز دا يوخ ايدي. مرگنلي آشيق زولفعلي ده وار ايدي.

قديم دبلردن دئيين، نه لر يادينيزدا قالير؟

قديملردن، قوي اؤز شولوقلوقلاريمدان دئييم. من چوخ شولوق ايديم، يئرده گؤيده دورمازديم.  بيللي-بيللي گئجه­سي بيزيم طرفلرده، باجالاردان الده سو سپرديلر. اونلار دا دئيه­رديلر، سو آيدينليقدير. آما باخ گؤر اوشاقليقدا بيز نه ائدرديك، يئكه سطيل­لر ايله، آفتافا ايله سويو باجادان ايچري تؤكرديك. بير نفر ده قاپينين اوستونده نگهبان قويارديق. قاپيني آچسايدي، او دا باشينا تؤكه­جك ايدي. آما بير مزه­لي احوالات تعريف­له­ييم سيزه، بيزيم كندده بير آقاي كاكايي وار ايدي. اونون اوشاقلاري، جماعاتين باجالارينا چوخ سو تؤكموشدولر. دا ملت جانا گلدي و تصميم توتدولار، بونلار دا اونلارين ائولرينه سو تؤكسونلر. 7-8 نفر گئتدي، هره­نين الينده بير سطل سو وار ايدي. بير نفر ده قويودان هئي سو چكيردي، بونلارا يئتيريردي. بو آقاي كاكايي بيلميشدي. تئز ائوينده باجانين آلتيندا بير چالا قازيب و او چالاني قازا-قازا آپاريب، دوواردان كئچيريب، حيه­طين دالينداكي باغچايا اؤتورموشدو. اونلار نه قدر سو تؤكوردولر، او چالادان دوز گئديردي باغچايا. آخيردا كندليلر يورولوب، دئديلر: دا بسدي. يازيغين ائويني سئل آپاردي. چيخيرميشلار گئده­لر، گؤردولر، دال باغچادا دووارين ديبيندن سو چيخير ائشيگه و كور- پئشمان قاييديب، گئتديلر.

آشيقليغا گؤره، سون سؤز نه دئيه بيلرسينيز ؟

آشيقليق چتيندير. آشيق گرك ائلدار اولا. بيز بو ائلين آشيغي­ييق. باخ بو يولا گلن ، گرك چتينليكلرين هاميسينا دؤزه. بير ده ايندي باخيرام آشيقلارا، قديملره باخاندا گؤرورم، او اوستادلار نئج اولدو كي هره­سي بير دريا ايديلر. ايندي بيزلر بير قطره او دريالاردانيق. اونلار بو يولا پول و يا شهرت اوچون گيرمه­ميشديلر.

واختينيزي بيزيم اختياريميزدا قويدوغونوزا گؤره تشكر ائديرم. ساغ اولون.

سيزده ساغ اولون.

 

 

آشیق حیدر نیرومندی ایله مصاحبه/ دانیشیق آپاران: احمد اسدی

آشیق حیدر نیرومندی ایله مصاحبه/ دانیشیق آپاران: احمد اسدی

گنج آشیقلارین عزیز اوخوجولاری و سئویملی یولداشلاری بو دفعه گئدیب، آشیق حیدر ایله گؤروشوب و مصاحبه ائتمیشیک. آشیق حیدر، اورمو آشیقلاری سیراسیندا پیشکسوت و آغ ساققال آشیق کیمی تانینیر. اونون آشیق سازی ایله تانیش اولماسی 1345-جی ایله گئدیر چاتیر و او ایللردن بری بو صنعت ایله مشغولدور. سیزی دانیشیغیمیزی اوخوماغا دعوت ائدیریک. بگنمیش اولاسینیز، انشاءالله.

اوستاد اؤزونوز عزیز اوخوجولاریمیزا تانیتدیرین لطفاً؟

من آشیق حیدر نیرومندی 1327-جی ایلده اورمونون آرناسا کندینده دونیایا گلمیشم.  آتا-بابادان اکینچی اولموشوق، ائله ایندی ده باغیم وار و آشیقلیقلا برابر اکینچی­لیکله­ده مشغولام.

اوستاد نئج اولدو آشیقلیغا علاقه تاپدینیز و آشیق اولدونوز؟

بیز اولدن اکینچی ایدیک. قدیملر یئرلریمیزده کل ایله اؤکوز ایله جوت قوشاردیق. منیم اول اوخوماغیم او زاماندان باشلانیب. او زامان بیز جوت قوشاندا  او کل لرین دالیجا یئل یئل اوخویاردیق. اؤزو بیر آیری عالم ایدی. سونرادا 10-12 یاشیم وار ایدی، من بیرگون زنجیر دروازاسیندان کئچیردیم، گؤردوم قهوه دن بیر کیشی ائشیگه چیخدی. آیری بیریسی اوندا سوروشدو؛ کیم اوخویور؟ اودا جواب وئردی: آشیق فرهاد. منده گئدیب قهوه خانانین پنجره سیندن بویلانیب باخدیم، گؤردوم بیر کیشی ساز چیگنینده اوخویور. ائله او صحنه منیم ذهنیمده قالمیشدی، تا سونرالار تقریباً منیم 18 یاشیم اولدو. گلدیم آشیق محمد قولونجولونون یانینا و اوندان سونرا یوز تومنه بیر ساز آلدیم و ساز اؤیرنمگه باشلادیم. سونرالار آشیق ممد مرندلی نین یانینا گئتدیم، سونرالار آشیق درویشین مجلسینه گئدردیم و آخیردادا  آشیق دهقانین مجلسلرینه گئتدیم و 20 ایلده اونون یانینا گئدیب و اونا خدمت ائتدیم.

اوستاد قدیملردن تعریفله یین، اوندا آشیقلار نئجه یدیلر؟

آه.

قدیملر، بئله دگیلدی کی. آشیغین احترامی وار ایدی. آشیق هر کنده گئدنده، اونون یولونو گؤزلردیلر. کنده یئتنده آیاغی آلتدا قوربان کسردیلر. هر نه ایسته سه یدی او آن حاضرلاردیلار. تویلار آشیقسیز اولمازدی. سحر تئزدن توی ائوینده ، یوخودان دورمامیش گلردیلر بیزدن واخت آلاردیلار آیری تویا، بیر قدرده پول بیع اوچون وئرردیلر. قهوه لرده ملت سئل کیمی گلردی و آشیقلارا قولاق وئرردیلر. آما تأسفلر جوی بیرجور سالدیلار، کی قهوه خانایا گئدنی چوخ آدام پیس گؤز ایله باخدی و گئتدیکجه آشیقلارا علاقه آزالدی.

اوستاد  ائشیتمیشک سیز قدیملر رادیودا چیخیش ائدردیز؟ هانسی ایللرده ایدی بو چیخیشلار؟

من تقریباً 1353-جو ایلدن رادیویا گئتدیم و اورمو رادیوسوندا چیخیشلاریم اولدو.1353-جو ایلدن انقلابا کیمی رادیودا اوخویوردوم. آما انقلابدان سونرا بیر نئچه ایل آشیقلاری رادیویا قویمادیلار. آما تقریباً 1362-جی ایلده منی رادیویا دعوت ائتدیلر و دئدیلر ملت افسرده اولور و بیز ایسته­ییریک یئنی­دن آشیقلاری رادیویا گتیرک آما تهران ایسته­ینی اوخویون. منده شهریمیزین دگرلی شاعری بیت الله جعفری نین شعرلرینی کی انقلابا یازیلمیشدی. بسته­له­دیم و ساز ایله ایفا ائتدیم و اونو اورمو رادیوسوندان تهرانا گؤندردیلر. تهران باخیب، بگنمیشدی و دئمیشدی اگر آشیقلار بئله اوخویاجاقلار، ایرادی یوخدور، گلسینلر یئنه ده اوخوسونلار. و ائله او ایللردن آشیقلار بیر داها رادیودا چیخیش ائتدیلر و منده بیرینجی آشیق اولدوم کی اورمو رادیوسوندان چیخیش ائتدیم. بو ایشیمیز آشیقلاری رادیویا یئنی دن گتیردی.

بایاق دئدیز منیم سازیمی سیندیرمیشدیلار، آما سونرا خاطرلاتدینیز دادگستریده قاضینین عملی سیزه دایاق اولاراق، سیزی اوره ­کلندیریدی ، آچیقلایا بیلرسینیز؟ ایندی وضعیت نئجه دی؟

(بورادا آشیغین گؤزلری دولدو. )بیر گون قهوه ده اوخوردوم، گلیب منی توتدولار، آپاردیلار ، دئدیلر سازینی سیندیر ، منده سیندیرمادیم. سونرا بیزی دادگاها یوللادیلار. آما قاضینی ساغ اولسون، اونلاری محکوم ائله­دی و او زامانین پولو هر سازا 50مین تومن جریمه تأیین ائتدی. آما هله ده وار هله دی او پولو آلمامیشام. سونرا منه بیر کاغاذ وئردی کی هئچ کسین حاققی یوخدور، آشیق حیدره بیر سؤز دئیه منده همیشه او کاغاذی جیبیمده ساخلاییردیم، تا هر یولدان کئچن منه توخونماسین. آما شکرلر ایندی آشیقلارا دگر وئریلیر. حوزه هنری تبلیغات اسلامی  طرفیندن بیر کانون آچیلیب و آشیقلار اورا گئدیب و چیخیش ائدیرلر. ارشاد طرفیندنده آشیقلار بیمه اولور و 60 یاشدان یوخاری اولانلارادا حقوق وئریلیر. بورادان حوزه هنرینی اداره ائدن شخصلره تشکرومو بیلدیریرم. ایندی وضعیت چوخ دگیشیلیب.

حوزه هنری آذربایجان غربی

 مصاحبه دن قیراق

((آشیق حیدر ایله، مصاحبه ائدرکن، اوستادیمیزین گؤزلری دولدو و دئدی من نه جور ائده بیلردیم، اؤز سازیمی سیندیرام، منه دئدی سن بیر لحظه اؤزونو منیم یئریمه قوی، گؤر نه حالا قالارسان.  من نئجه سازدان آیریلاردیم آخی. اوستادیمیزین او وضعیتی منی کدرلندیردی و اؤزوم بیلمه یه-بیلمه­یه منیمده گؤزلریم دولدو. ائله او آن بو سؤزلر اوره­گیمه گلدی و بو شعری آشیق حیدره تقدیم ائیله دیم.

حق سؤزودور، آشیق سؤزو

سؤزسوز نئجه یاشاییم من

بو ساز منیم نازیم گولوم

نازسیز نئجه یاشاییم

***

آشیق بو ائلین گؤزودور

تونقالین آلوو کؤزودور

بو ساز ارنلر ایزی­دیر

ایزسیز نئجه یاشاییم من

***

من بیر آشیق سازا بندم

ساز قوینوندا سؤزه بندم

اؤز ائلیمده یازا بندم

یازسیز نئجه یاشاییم من

***

قورقوت یولو دگیل عبث

سازا لایق دگیل قفس

منی سازدان آییران کس

سازسیز نئجه یاشاییم من))

 

سیزین هانسی شهرلرده و یا اؤلکه لرده چیخیشینیز اولوب؟

من دئیه بیلرم، اورمیه، خوی، قوشاچایدا و ها بئله بو شهرلرین کندلرینین چوخوندا توی مراسم لرینده چیخیشیم اولوب. اوندان علاوه تبریز، مراغا، تهران و بیر چوخ شهرده­ده توی مراسملری اوچون دعوت ائدیبلر. من مختلف آشیق فستیواللاریندا اشتراک ائتمیشم. ایرانداندا علاوه بیر دفعه ناخچیوانا دعوت ائدیبلر و اورادا گئدیب ساز چالمیشام، حتی اورانین رادیوسوندادا اوخوموشام. 1369-جی ایلده ده منی تورکیه­یه دعوت ائتمیشدیلر. اورا گئدیب بیر نئچه شهرینده چیخیشلاریم اولدو. تورکیه ده بیزه چوخ احترام قویوردولار. هر یئری دولاندیریردیلار. هر یئره و شهره گئدیردیک، او شهرین و یا ولایتین شهرداری و والی­سی ایله گؤروشوردوک. اورادان بیزه بیر قدر پول وئرمیشدیلر. ایرانا دؤنندن سونرادا دولت هر آشیغا بیر دنه رنگی تلویزیون وئردی.

ائشیتمیشیک سیز تورکیه ده اولاندا اورانین مشهور و آدلیم آشیغی آشیق ریحانی نین سازینی الیندن آلیب سینیز؟ دوغرودورمو؟

دوغرودور. اورادایدیق. آشیق ریحانی گلدی. دئدی، بیزده رسم بودور، ایکی آشیق بیر-بیره چاتاندا گرک باغلاشالار گرک. بیزده اورمودان 4 آشیق گئتمیشدیک. اول بو سؤزو جدی توتمادیق. ریحانی یئنه سؤزونو تکرار ائتدی. اورمولو آشیق یوسف دئدی: ریحانی قوی اوتوراق. دا بسدی. بونلار قوناقدیلار. ریحانی ائله نئچه سری سؤزونو تکرار ائله دی. منده دا دایانا بیلمه دیم. سازی گؤتوروب اورتایا گیردیم و باشلادیم اوخوماغا. ریحانی ایله 14 قاطار برابر اوخودوق، آما 15-جی قاطاردا ریحانی دایاندی. اوست-باشی جومجولاق سو اولموشدو. منده دئدیم، ایندی سازی وئر منه. سازینی الیندن آلدیم. یاریم ساعات کئچندن سونرا، ایرانین اوراداکی رایزن فرهنگیسی گلیب و مندن خواهش ائتدی سازی وئرک اؤزونه، منده قبول ائیله دیم.

آشیق داستانلارینا گؤره نه لر دئیه بیلرسینیز؟ نئچه آشیق داستانی بیلیرسینیز؟

من 40 آشیق داستانی بیلیرم. موضوعلاریدا بودورکی، بو داستانلار هامیسی عبرت نامه دی، نصیحت. حقیقت، شریعت، معرفت، طریقتدیلر. بو داستانلار اویئرده قورتولورکی، مرد نه جور اولدور، نامرد نه جور اولدو. آللاهی تانیان نه جور، آللاهی تانیمایان نه جور اولدو. یاخشی لیق ائدن نه جور ، یاخشی لیق ائتمه ین نه جور اولدو. بو داستانلار یاخشینی- پیسی، قضا-قدری، دونیانین اندر-دؤندرین نشان وئریر و انسانلاری دوغرو یولا و آللاها طرف چکیرلر.

هانسی هاوالاری لاپ چوخ خوشلارسینیز؟ یا بئله دئسه­ک هانسی لاری داها آرتیق مجلسلرده اوخویارسینیز؟

سماعی، محترمی،حربی،حلبی، دوبیتی، شکریازی، گؤزللمه، هجران، جمشیدی کیمی هاوالاری داها آرتیق اوخویارام. آما هاوالارین هامیسیندان خوشوم گلر.

اوستاد آشیق هاوالاریننین نئچه سینین آدلارینی چکدینیز، منجه سیز اوجا هاوالاری داها خوشلاییرسینیز؟ ائله دگیل می؟

اوجوردور. من اوجا هاوالاری داها چوخ خوشلارام. او هاوالارکی، اوج­دا اوخونور من داها چوخ بگنرم.

قدیم آشیق لاردان هانسی لاری یاد ائده بیلرسینیز؟

آشیق گولاب وار ایدی. آشیق علی آغداشلی، آشیق علی قولو، آشیق حسن قاشیقچی، آشیق عزیز بونلار یادیما گلیر. بونلار انقلابدان اؤنجه وفات ائدیبلر.

آشیق عزیزدن آد آپاردینیز، اونا گؤره نه دئیه بیلرسینیز؟

آشیق عزیز سامیرتیلی ایدی. او چوخ ادبلی بیر آدام ایدی. چوخ گؤزل ساز چالاردی. گؤزلده داستان دئیه ردی. نئچه سری مجلسلرینده اوتورموشدوم.30 داستان بیلردی. آشیق عزیز بیر آز فرقلی اوخویاردی، یعنی سبکی فرق ائدردی.

سیزین اؤز شعرلرینیز وارمی؟

من شاعر دگیلم و هاوالاریمدا شاعرلرین شعرلریندن استفاده ائدرم.  آما نئچه سری موقعیت ائله گلیب، شعر دئمگه مجبور اولموشام، بیر دفعه مشهده گئتمیشدیم. منیم یانیمدا بیر نفرین گؤزلری آچیلدی ، بودا منه چوخ تأثیر قویدو و ائله او آن بو سؤزلر اوره­گیمه گلدی.

ائشیدیب گؤرمه­ین ، تعریفین ائدیم

گلدیم خدمتینه امام رضانین

ائله بیلکی یاتمیش ایدیم اویاندیم.

دولاندیم باشینا او خراسانین

***

قیزیل ایوانلاری گون کیمی یانیر

او قاپیا گئدن حقی­نی تانیر

خداملاری ال-ال اوسته دولانیر

تعریفین دئییرم امام رضانین

***

زواری تؤکولوب هر یئردن گلیر

قویون-قوزو کیمی دوره­ده ملیر

هرنه عهد ائیله سن تئز قبول اولور

تعریفین دئییرم غریب آغانین

***

آشیق حیدر قییماز دئسین غریبدیر

او بیر شاهدیر، خراسانه گلیبدیر

معجزاتین مقامیندا گؤروبدور

جلالین دئییرم امام رضانین

 

آیری بیر شعریمیده  سیزه اوخویورام:

وطن سینه سی اوستونده

برقرارسان آذربایجان

جوانلارین بویو بسته

افتخارسان آذربایجان

 

داغلارین قورخماز دوماندان

چشمه لر آخیر هر یاندان

بولبوللر چیخماز  گولشاندان

گولعذارسان آذربایجان

 

صفالی دیر، بو داغلارین

میوه لی باغچا باغلارین

شاماما بسلر تاغلارین

گؤهر بارسان آذربایجان

 

دوستون گؤروب سلام ائیلر

دئسن اوخو او آن سؤیلر

تعریف دئییر آشیق حیدر

نه گؤزلسن آذربایجان

 

مژده اولسون سنه بولبول

یئنه ده نوبهار اولدو

آچیلیبدیر، سوسن سونبول

صحرالار لاله زار اولدو

 

قویونلار آرخاجدا قالار

بالاسین دؤشونه آلار

چوپان شوق ایله نی چالار

نه گؤزل خوش گذار اولدو

 

کؤرپه قوزو دؤرد نال وورار

قاچار آناسینی یورار

بیر دم گئدر بیر دم دورار

گؤر نه گؤزل باهار اولدو

 

آشیق حیدر ساز الینده

باهار نغمه سی دیلینده

بو آذربایجان ائلینده

باغچالار دولو نار اولدو

 

اوستاد دئدینیز یئر-یئر(یئل-یئل) اوخویاردینیز، اونلارین سؤزلریندن بیر نئچه­سینی سؤیله­یین لطفاً؟

(بورادا اوستاد ائله قدیملره سایاق، باشلاییر، آهنگ ایله اوخوماغا.)

آ بالام بوز باغلادی

(آ کللر)یانی یارپیز باغلادی

منی بیر گلین ووردو

یارامی قیز باغلادی

آ یئر یئر آ یئریئر آ یئر یئر

 

عزیزیم گئجه دن گئدر

کل بالام گئجه دن گئدر

گئجه اوزون همدمیم یوخ

زهله­م گئجه دن گئدر

آ دئی دئی آ دئی دئی آ دئی دئی

آ کل بالام دئی دئی دئی دئی آ دئی دئی

 

ائله دئییر قیز قالادی

(آ کللر) بو گؤرن قیز قالادی

قبریمی بیر گلین قازدی

تورپاغینی قیز قالادی

آ دئی دئی آ دئی دئی آ دئی دئی

 

عزیزینم سالماسا

(کللر )خویدان گئدر سالماسا

بنده بنده­یه نئیلر

خودام گؤزدن سالماسا

آ دئی دئی آ دئی دئی آ دئی دئی

ائله بو سؤزلری بیز اوخویاردیق، کللر بئله گؤزل- گؤزل خومارلانا-خومارلانا یئری بو باشدان او باشا شوخوملاردیلار. عجب منظره ایدی! سحر گون چیخاندان گون باتانا کیمی بونلار چکردیلر. بو سؤزلر ایله یورولماق بیلمزدیلر.

اوستاد آشیق هاوالاریندا هانسی شاعرلرین شعرلرینی چوخ اوخویارسینیز؟ چوخ قدیم شاعرلردن شعر اوخویارسینیز یا بو تزه و یئنی شاعرلردن؟

من خسته قاسمین شعرلرینی چوخ خوشلایارام. دوللو مصطفی، بالوولو مسکین، قول هارطون، دده کاتب، رحمتلیک پور آذر و رحمتلیک اوشناوالی قنبرینده شعرلرین اوخویارام.

اوشناوالی قنبرین شعرلرینده نئچه سینی اوخویون لطفاً؟

قادر آللاه هئچ بیلمیرم ندندیر

یوخسولون داواری آرتار یوز اولماز

چوخلار اؤزون کوراوغلویا بنزه دیر

 هر کیشی نین حول-قولو دوز اولماز

***

ایستیرسن یاتاسان چاغیر سبحانی

یئتیشر دادینا کرمین کانی

مجلسه گئدنده یئرینی تانی

بگ ایله اوتورسان دیز به دیز اولماز

***

بیر واخت اولار ایللر بویو اویارسان

بیر واخت اولور چاغیرارلار دورارسان

آدام واردی دانیشاندا دویارسان

آدام واردی خمیرینده دوز اولماز

***

او نه دی بینادان اویوقدور- اویوقدور

یومورتا قدیم­دی دئ گؤروم تویوق

نه چشمه دی هم ایستی­دی هم سویوق

هانسی چشمه گیله لنر بوز اولماز

***

چوخلار گلیب بو دونیادان کؤچرلر

چوخلار اکیب، چوخلار گلیب بیچرلر

چوخلار دالیسیجا قیلیج چکرلر

هئچ کس فلک ایله اوز به اوز اولماز

 

بیر دیوانیسینده اوخویورام

اول ابتدا بو جهانی یارادان پروردگار

انسان اوچون پرده چکیب آرادان پروردگار

کیمینین باشیندان تؤکوب هئچ بیلمه ییر غم نه دیر

کیمینین قلمین ووروب قارادان پروردگار

***

هانی سنلن گلنلر بیر-بیر اوچور قوش کیمی

کئچن گونه بیر فکر ائیله یاده گتیر دیش کیمی

چوخ شاهلاری تختدن سالیب گزدیریب درویش کیمی

چوخ درویشی شاه ائیله ییب تزه دن پروردگار

***

هامینی سن یارادیبسان ای خالق لم یزل

کیمی گئیه ر آل قوماشی کیمی سی عریان گزر

لطف ائیله ای کرم کانی اؤزون ائیله بیر نظر

یوخسولا بیر دؤن بیچیبسن هارادان پروردگار

***

بیر گون اولار گؤررسن کی اسرافیل بیر صور چالیب

اوندا اویان فقیر قنبر، گؤر دونیادا کیم قالیب

خوش او شخصین حالینا کی حسینی یاده سالیب

یاتانلاری تزه دندن اویادان پروردگار

اوشناوالی قنبرین سؤزلرینین چوخونو من بیلیرم و نه قدر ایسته سه نیز سینه دن ائده بیلرم سیزه دئیه م.

انشاءالله بیر آیری واخت قویاریق اونون شعرلرینه.

انشاءالله.

اوستاد سون سؤز اولاراق نه دئیه بیلرسینیز؟

سون سؤزده بونو دئیه بیلرم, بیزیم بو ائلیمیزدن انتظاریمیز چوخدور. گرک بو صنعتی قویمالار یادلاردان چیخا و سیلینه. بیز بو ائللرین آشیغییق. بیز ائلینیک، ائلده بیزیمدیر. انشاءالله او گون گله آشیقلار کئچمیش احتراملارینی بیر داها اله گتیره لر. آشیقلارا قولاق وئرنلر، هئچ واخت اگری یوللارا چکیلمزلر. ایندی باخین بیر بئله خلاف و نامردچیلیک چیخیب. اگر قدیم کیلر کیمی، آشیقلارین سؤزلرینه و داستانلارینا قولاق وئرسه لر، بو ایشلرین بیر قسمی اولماز. آما ایندی غربدن گلمیش موسیقیه قولاق آسیرلار و اونلاریندا سونلاری بللی دیر. بو موسیقیلر بیزیم وارلیغیمیزی هدف توتوبلار.

واختینیزی بیزیم اختیاریمیزا قویدوغونوزا گؤره تشکر ائدیرم. ساغ اولون.

سیزده ساغ اولون.

 

علی عاشقی ، ائل آشیغی - Əli aşiqi, el Aşığı

علی عاشقی ، ائل آشیغی

آشیق عبدالله اشرفی ایله مصاحبه

دانیشیق آپاران: احمد اسدی

Əli aşiqi, el Aşığı

Aşıq Əbdulla Əşrəfi ilə müsahibə

Danışıq aparan: Əhməd Əsədi

 

گؤزل اورمو شهری کئچمیشلردن بری چوخلو اوستاد آشیقلار یئتیریب، بسله­ییب و يئتيريب بسله­مكده­دير. بو آشیقلاردان بیری ده آشیق عبدالله اشرفی دیر.

آشیق عبدالله اؤز دئدیگینه گؤره بیر گون آشیق درویشین غربتی هاواسینی چالماغینی ائشیدیب ،  سازا عاشق اولوب و بو صنعتی  اؤیرنمک ایسته­ییب. هر سؤزونده مولا علی نين آدين چكن آشیق عبدالله، بو صنعتده مولاسی حضرت علی دن الهام آلاراق، حضرتلریندن هر ایشینه یاردیم ایسته ییب.

خوش و اوره­گه یاتان سسی ایله، آشیق درویشی خاطرلادان آشیق عبدالله، اؤز متانت و ادبی ایله هر یئرده اونون لیاقتلی تمثیلچی­سی اولوب. ساز چالماغینین و سسینین ده مرحوم درویشه اوخشادیغینا گؤره، هر مجلسه گئدنده آشیق درویشین لمسینی آلماق اوچون، اوندان آشیق درویشین سبکینده اولان هاوالاردان ایسترلر(شکریازی ، همدان گرایلی سی و ...)

 

ایندی ایسه قولاق وئرک، آشیغیمیزین اوره­ک سؤزلرینه:

اوستاد، اؤزونوزو  بیزیم عزیز اوخوجولاریمیزا تانیتدیرا بیلرسینیزمی؟

آدیم عبدالله اشرفی دیر. 1331-جی ایلده اورمودا دونیایا گلمیشم. ایندی ده ائله بو شهرده یاشاییرام. ایشیم اکینچی­لیکدیر و بیر تیکه حلال چؤرک اوچون، مولادان مدد ایسته­ییب، تورپاغی اؤزومه چؤرک آغاجی بیلیب و شوکور اولسون بوگونه کیمی ده هئچ کسه محتاج اولمامیشام.

 نئچه ایل دیر ساز چالارسینیز و کیمین شاگردی اولوبسینیز؟

37 ایلدیر ساز چالیرام و مرحوم آشیق درویشه خدمت ائله­میشم.

 ((بوردا اوستاد ،شاگرد  یئرینه  خدمت کلمه سینی ایشله دیر کی چوخ ماراقلی دیر))

آشیق درویشه نئچه ایل شاگرد اولوبسینیز؟

یئنه آشیق عبدالله خدمت سؤزونو ایشله­ده­رک دئییر: من 10 ایل آشیق درویشین یانیندا، او مرحوما خدمت ائله­ییب و درسیمی اوندان آلمیشام.

اورمودا دئییلن لره گؤره 72 هاوا وار، سیز نئچه سینی چالا بیلیرسینیز؟

من شاید بیر ایکی هاوانی یئرینه سالا بیلمه­یم، آما اوست اوسته 72 هاوانین هامیسینی چالیب و اوخویورام.

بو چالدیغینیز هاوالاردان هانسینی داها چوخ خوشلاییرسینیز و اؤزونوز بو هاوادان داها چوخ خوشونوز گلیر؟

واللاه چتین سؤال سوروشدون. هاوالارین هامیسیندان خوشوم گلیر و دئیه بیلمرم هانسی خوشدور و هانسی پیس. آما بو هاوالاری ،داها چوخ مجلسلرده چالماق ایسترم: غربتی، گؤزللـه­مه، جمشیدی، اکبری، همدان گرایلیسی، شکریازی، تجنیس.

بونلارین ایچیندن ده غربتی هاواسینی هامیسندان آرتیق سئوه­رم. علتی نی ایسته­سز بودور کی، منی آشیق ائدن بو هاوا اولدو. مرحوم آشیق درویشین حضرت علی­دن اوخودوغو غربتی­ني ائشیدرکن، او نیسگیللی سس منی بو مکتبه عاشق ائله­دی و تصمیم توتدوم، آشیق اولام. دئمک اولار منی غربتی هاواسی، عاشق ائدیب و آشیق­لیق یولونا چکدی.  بو هاوانی چالاندا و علی دن اوخویاندا، اوره­گیم شوقا و جوشا گلیر، ائله واخت اولور غربتی چالاندا اختیارسیز آغلاماق توتور منی.

آشیق عبدالله بوردا مولاسیندان بیر شعر اوخویور:

شاه مردان شیر یزدان روح قرآن یا علی

معدن علم و کرم سن بحر ایمان یا علی

ذوالفقارین ضربه سیندن دینی احیا ائیله­دین

اسم پاکین هر زاماندا درده درمان یا علی

 

اوستاد دئیه بیلرسینیزمی هانسی شاعرلرین شعرلرینی هاوالاردا چوخ ایشله­دیرسینیز؟

من کئچمیش شاعرلردن خسته قاسم، مسکین و دوللو مصطفانین شعرلریندن اوخویارام و بوگونکو شاعرلریمیزدن ده چوخ مختار صادق زاده نین شعرلریندن استفاده ائدرم.

گؤزل آشیق داستانلاریمیز وار،  اونلاردان نئچه سینی بیلرسینیز؟ آشیق داستانلاریمیزا گؤره بیر سؤزونوز ده اولسا بویورون؟

من 28 آشیق داستانی بیلرم. باشقا سؤزده بونو دئیه بیلرم کی بیزیم داستانلاریمیز یاددان گئتمکده­دیر. چون قدیم تویلار 3 گون اولاردی و آشیق ­دا داستانلاری بو اوچ گونده اوخویوب و تعریف ائده بیلیردی و یا قهوه­خانالاردا داستانلاری تعریف ائدردیلر آما ایندی قهوه­خانالاردا آشیقلار ییغیشیرلار . بیر هاوا من اوخویورام، بیرین آیری آشیق و  ... . ائله بونا گؤره داستانلار تکرار اولمور و بو تکرار اولماماق باعث اولور یادلاردان چیخا و من بونا چوخ ناراحاتام.

اوستاد هانسی شهرلرده و یا هانسی اداره لر ایله امکداشلیغینیز اولوب؟

منیم تهران، قوشاچای، مهاباد، خوی، سلماس و بیر چوخ شهرلرده چیخیشلاریم اولوب. ارشاد، حوزه هنری، صدا و سیما و کشاورزی تعاونی­لری ایله ده ساز چالماقدا همکارلیغیم اولوب و بعضاً ایندی ده اولور.

 

 سون سؤز اولاراق سیزین جوانلارا، نصیحتینیزی ائشیتمک ایستردیک؟

جوانلار گرک آرتیق چالیشسینلار.دوز یوللارا گئتسینلر. ایندی علم دؤورانی­دیر، هر ایشه گئدیرلر علم ایله گئتسینلر. ائله بونا گؤره ده گرک گله­لر و بو آشیقلیق مکتبینی علم ایله قاباغا آپارالار، اگر چالیشسالار مطمئن اولون، موفق اولاجاقلار. بیزیم آشیقلیق مکتبی بیر دریادیر، اوجسوز بوجاقسیز، نه قدر گئتسه­لر قورتولماغا گلمز، ایندی بو زماندا بیز بو عظمتلیکده دریانین بیر قطره سویوندان استفاده ائتمیشیک، هله اونو دا یاریمچیلیق. تک آشیق موسیقیسی یوخ، هامی موسیقیلر اؤزلرینه بیر دریادیلار، هر کیم دئسه من سونونا چاتدیم و هر شئیی بیلیرم، چوخ اشتباهدادیر، بو ایشی هئچ کس ائده بیلمز. فقط ائده بیلر کی، اؤز زمانیندا اطلاعاتی لاپ چوخ اولان موسیقیچی و آشیق اولا.

جوانلارا یاشاییشلاریندا آتا و آنایا حؤرمت ائتمگی ده توصیه ائدیرم:

دؤرد بیر یانین چمن اولا باغ اولا

باغرین باشی چاللی چالپاز داغ اولا

بیر اوغلان کی آتا آنایا عاق اولا

ساققالی آغارسا اوزو ده گولمز.

بیز آشیقلارین سؤزلری حقیقتدیر، نصیحتدیر. ائمه­دن و وطندن یازیلدیغی سؤزلره باخین نه دریندیلر. حضرت مولانین شأنینه یازیلان سؤزلره باخین، حضرت محمدین وصفینده یازیلمیش شعرلره باخین نه گؤزل و یول گؤسترندیرلر. کربلایا گؤره نه­لر دئییلیب آدامی لاپ آلیشدیریر.

بار الهی بیر گوناهکار بنده­یم

کرم قیل عفو ائیله کئچ گوناهیمی

سن کرم کانیسان من مقصرم

حسینه باغیشلا اشتباهیمی

 یا وطندن اوخویاندا آداما غیرت گلیر، بدن لوقایا دوشور  و انسان وطنینی حفظ ائتمگي دوشونور.

ساغ اولون، واختینیزی بیزیم اختیاریمیزدا قویماغا،

سیز ده ساغ اولون.